［愛情純愛］由嗰一個Kiss開始，我地唔再係青梅竹馬: 63. 醋意（上）

佢對梁玥嘉嘅感覺已經變咗質，名為「戀愛」嘅感覺令宋千辰打從心底變得霸道，正因為好中意，所以其他人掂一下都好似搶一樣

有時候宋千辰自己心裏都有啲疑惑：「到底我點解會中意嘉嘉⋯？」係因為梁玥嘉經常喺佢身邊？因為大家一齊長大，係最親近自己嘅異性？定係因為佢突然間發現梁玥嘉嘅可愛之處？

望住梁玥嘉對李子迪露出笑容時，宋千辰嘅內心都會妒忌萬分；連一個普通嘅笑容，宋千辰都唔想比其他人睇到⋯佢怕，怕梁玥嘉口中講嘅「中意嘅類型」係指李子迪⋯

「行嗰陣企直個人，怕跌就微微坐低少少⋯」

眼見李子迪一邊拉住兩個女仔小心翼翼地行，一邊講解，主要係佢唔中意見到梁玥嘉同李子迪咁親近



宋千辰諗都冇諗就飛快地去到梁玥嘉嘅身旁，梁玥嘉感覺到一陣寒風吹過，因為冰面濕滑，梁玥嘉企唔穩，李子迪眼明手快地捉緊梁玥嘉嘅手

楊楠恩雖然企嘅時候仍然有啲唔穩，但整體嚟講楊楠恩都算係平衡得到

「我鬆開手，你試下企穩個人。」李子迪慢慢鬆開梁玥嘉嘅手，「你跌嘅話我會扶實你。」

梁玥嘉見李子迪嘅手鬆開咗，心裏有啲緊張，企係企到但企唔穩，正當梁玥嘉左搖右擺企唔穩時，宋千辰同李子迪同時伸手扶住梁玥嘉，宋千辰嘅手托喺梁玥嘉嘅前臂下，捉住手肘附近嘅位置；李子迪一下子捉住咗梁玥嘉嘅手腕

「唔該～」梁玥嘉一抬頭便自然地朝李子迪微笑講道



宋千辰一臉不悅地望咗李子迪一眼，完全已經當咗李子迪係敵人一樣，幸好宜家嘅宋千辰無論李子迪做啲咩都好佢都睇唔順眼

「我帶你出去溜一圈呀？」宋千辰輕輕地拉咗梁玥嘉嘅手一下，梁玥嘉嘅注意力瞬間就落咗喺宋千辰身上

「但我都仲未識⋯！」梁玥嘉有啲慌張地講道，但宋千辰已經捉住梁玥嘉嘅雙手，準備將梁玥嘉帶離旁邊有扶手嘅地方，去中間嘅位置溜冰

「行下行下就學識㗎啦！」宋千辰一臉理所當然地講道，梁玥嘉嘅雙手放喺宋千辰嘅手上，宋千辰溫柔地捉住梁玥嘉嘅雙手

「吓⋯？楠、楠恩！」梁玥嘉回頭望向楊楠恩，只見楊楠恩一臉無奈，但宋千辰已經拉咗梁玥嘉出去



楊楠恩表面上同平時一樣，臉上露出溫柔嘅微笑，但實際上佢對梁玥嘉有少許敵意⋯

「又比佢霸住咗宋千辰添⋯」楊楠恩喺心中不悅地抱怨道，但表面上仍然擺出一副善解人意、溫柔體貼嘅模樣

「你唔介意嘅話，我嚟教你。」李子迪朝楊楠恩微微一笑講道

「嗯、嗯！好呀～」縱使心裏其實唔太願意，但喺人前都要擺出一副善良嘅模樣，於是楊楠恩便微微一笑道

李子迪拉住楊楠恩，小心翼翼地一步一步行出去，李子迪面向住楊楠恩，向後一步一步滑出去

「我扶住你慢慢行，你一步一步嚟。」李子迪耐心地教導楊楠恩，佢怕楊楠恩會緊張，所以希望咁樣講等楊楠恩放鬆啲，「左腳滑出去嘅同時，右腳向後踩，就好似助力推自已個人出去咁。」

「咁樣⋯？」楊楠恩緊緊地捉住李子迪嘅手，小心翼翼地踏出咗第一步，跟住李子迪嘅指示瞬右腳向後踩一下將自己個人推前

「嗯！另一隻腳都係咁樣，慢慢嚟。」李子迪嘅雙眼注視着楊楠恩嘅雙腳，見副楊楠恩做到之後點一點頭，「小心平衡唔到，唔洗急。」



另一邊廂，宋千辰拉住梁玥嘉圍住場嘅中心溜，梁玥嘉用力地捉住宋千辰嘅手，宋千辰望到企喺自己隔離一副驚慌同時緊緊地捉住自己嘅梁玥嘉，宋千辰嘅嘴角好自然就上揚起嚟

宋千辰忽然一個轉彎溜到梁玥嘉嘅面前，然後一個急停，梁玥嘉整個人撞上宋千辰，但幸好嘅係宋千辰企得好穩，冇因為比梁玥嘉撞一撞而跌倒

「你洗唔洗捉得我咁實呀？我隻手都要比你捏斷啦！」宋千辰帶着抱怨嘅語氣講着，但臉上嘅表情卻愉悅萬分

「咪就係因為你溜得咁快，又突然間急停囉！」梁玥嘉感覺自己好似坐完一轉過山車一樣，佢一臉不滿地望住宋千辰，然後望向楊楠恩同李子迪嘅方向，「你睇下人地，人地李子迪一步一步咁教楠恩㗎！你就直接拉住我出去快溜兩個圈⋯！」

宋千辰一聽到梁玥嘉咁樣講，心情瞬間變差，眼神都稍為冰冷起嚟，喺心中「唧」咗一聲

「咁你係想佢教嘅咪過去搵佢囉。」宋千辰嘅語氣喺梁玥嘉耳中聽起嚟就係忽然變得冷冷的，宋千辰一把捉起梁玥嘉嘅左手手腕，「我帶你過去。」

「我、我唔係咁嘅意思呀⋯！」梁玥嘉用右手捉住宋千辰嘅手臂，「你突然間做咩呀？」



「你想佢教你，我咪帶你過去囉⋯」宋千辰望咗梁玥嘉一眼，然後就拉住梁玥嘉向前滑起嚟，「我去教楊楠恩，佢睇起嚟易教好多。」

「你係想教楠恩嘅咪去囉⋯」梁玥嘉不忿地反駁道，宋千辰瞬間止住了步，梁玥嘉一怔，宋千辰稍微轉身望向梁玥嘉

「吓？你覺得我係想去教楊楠恩呀原來。」宋千辰嘅眼神冷冷的望住梁玥嘉，冷冷一笑




IG Link: https://www.instagram.com/nd_cotttocandy/?hl=zh-tw