［愛情純愛］由嗰一個Kiss開始，我地唔再係青梅竹馬: 62. 溜冰初接觸

「以前都冇發現你咁易喊⋯」宋千辰無奈地笑了笑，手輕輕地拍了拍梁玥嘉嘅背

梁玥嘉意識到自己攬住宋千辰，便迅速地縮手坐好，抽咗張紙巾然後抹抹眼淚

「喊包⋯」宋千辰微微一笑講道，「原來就係你。」

「唔係。」梁玥嘉企起身，順手拎起放咗喺床尾嘅柴犬攬枕，「聽日教我溜冰⋯」

「得啦得啦⋯」宋千辰點點頭，起身送梁玥嘉番去隔離單位嘅門口





宋千辰番到房之後灘喺床上，猜着梁玥嘉喊嘅原因

「到底係因為邊一句所以令佢喊⋯？」宋千辰喺窗簾邊滲出嚟嘅光喃喃自語地講道，「會唔會其實⋯佢都有啲在意我⋯？因為青梅竹馬關係以外嘅在意⋯」

宋千辰想梁玥嘉在意佢，想梁玥嘉以「因為我地係青梅竹馬」以外嘅原因而在意佢⋯而此時嘅梁玥嘉正將頭埋喺枕頭中

「我做咩喊呀突然⋯！」梁玥嘉用力地踢着腿自言自語着，本來有少許激動嘅佢平靜咗落嚟，「千辰係個好男仔，中意佢嘅人都應該唔會少得去邊⋯之前有一個邱凱棠，咁遲啲又會有邊個呀？」

梁玥嘉坐起身，諗到宋千辰遲早都會有女朋友一事，心中就覺得好不安，但不安嘅同時又因為宋千辰剛才講嘅說話而有一點安心





「呀！唔理啦！瞓覺！」梁玥嘉最後選擇直接躲到被中逃避

⋯

翌日係26號，係大家約好咗一齊去溜冰嘅日子，梁玥嘉對於呢一日嘅來臨緊張又興奮，一出門已經帶住小跳步

「你地咁早就到咗嘅？」梁玥嘉去到溜冰趁場嘅時候已經見到李子迪同楊楠恩

「你平時都好早㗎！今日又會咁晏嘅？」楊楠恩笑了笑道





「遲咗少少出門口⋯」「因為有人遲咗出門口囉。」

梁玥嘉同宋千辰異口同聲地開口，梁玥嘉一個回頭，一手打落宋千辰嘅手臂上，宋千辰朝梁玥嘉調皮地吐吐舌頭

「行啦！入去啦！」李子迪笑了笑講道

兩個男仔行喺前面，對冇去過溜冰場嘅梁玥嘉同楊楠恩嚟講，一切嘅事物都迎面襲來強烈嘅新鮮感

梁玥嘉同楊楠恩度一度腳嘅size，拎咗溜冰鞋，一拎上手時覺得原來溜冰鞋都唔輕，有啲重；佢地行到locker前面，除咗手機跟身之外其他嘢都塞咗入去locker入面

「呀⋯鞋帶要點⋯？」梁玥嘉望向楊楠恩，楊楠恩都一臉疑惑咁望住鞋帶

「你兩個仲未著完鞋呀？」已經著完鞋嘅宋千辰同李子迪行到兩個女仔面前，宋千辰先開口問道

「咁佢鞋帶上面要自己綁番嘛⋯」梁玥嘉講道，「係咪就咁繞番上去就得？」





「唔係你想點綁？」宋千辰沒好氣地反咗一下白眼，然後蹲低喺梁玥嘉面前拎起梁玥嘉鞋上嘅鞋帶，「示範。」

宋千辰示範咗一次要點綁上去，最後將長咗出嚟嘅部份塞入鞋入面，避免陣間絆倒

「另一隻自己綁。」宋千辰講道，梁玥嘉乖乖地綁埋另一隻腳嘅鞋帶，楊楠恩都已經綁好鞋帶

兩知女仔企起身邁步時先發現著住溜冰鞋行路真係舉步維艱，行起嚟總覺得有啲唔自在，但抬頭望住行喺前面嘅兩個男仔，佢地行起嚟卻好似平日行路一樣輕鬆

行到去真真正正嘅溜冰場入口，李子迪同宋千辰一下子就邁步行入去，穩穩地企喺冰面上；梁玥嘉同楊楠恩停低咗喺門口對望咗一眼

「唔洗驚㗎！」李子迪見到面對冰面而卻步嘅兩人笑道，「入嚟。」

李子迪朝兩個女仔伸手，好讓佢地放心地邁步踏入去





梁玥嘉先伸手，宋千辰見到梁玥嘉嘅手已經握住李子迪嘅手時，心中不禁「咯噔」一下，然後當梁玥嘉邁步一隻腳已經踩咗上冰面時，宋千辰伸手捉住梁玥嘉嘅前臂

梁玥嘉雙腳踏上冰面，感覺涼意從冰面傳嚟，不禁打咗一個冷震；楊楠恩跟喺梁玥嘉嘅身後，李子迪照樣扶住楊楠恩，而宋千辰則好似順手一樣扶咗一扶，呢一舉動頓時令楊楠恩得得心跳加速

「我地行入啲先，唔好喺門口。」李子迪面對住兩個女仔講道，「我拉你地過去呀～我地去到最遠嗰度。」

「好呀！」梁玥嘉一臉興奮地點點頭，然後伸出左手捉住李子迪嘅右手，右手捉住李子迪嘅手腕，楊楠恩則同梁玥嘉相反，捉住李子迪嘅左手

雖然楊楠恩更想扶佢過去嘅人係宋千辰，但宋千辰都不為所動，佢都只好放棄

宋千辰跟喺後面，望住梁玥嘉緊緊地捉住李子迪嘅手時，心底卻有股不安感來襲⋯

宋千辰心裏知道，其實自己比起以前更在意梁玥嘉，佢在意梁玥嘉嘅原因亦唔再係因為「我地係青梅竹馬係最親近、最了解嘅人」呢個原因⋯








IG Link: https://www.instagram.com/nd_cotttocandy/?hl=zh-tw