［愛情純愛］由嗰一個Kiss開始，我地唔再係青梅竹馬: 64. 醋意（下）

梁玥嘉不忿地望住宋千辰，只感覺到宋千辰嘅眼神漸漸地冰冷起嚟，兩人都唔肯讓步

「你講到楠恩咁易教，你去教佢囉⋯！」梁玥嘉講道，宋千辰聽到之後唔嬲都變嬲，呢句唔係梁玥嘉嘅心底話

「好呀！」宋千辰一氣之下講道，然後拉住梁玥嘉去搵李子迪

「玥嘉你學完啦？」楊楠恩見到梁玥嘉同宋千辰行過嚟，便停低問道

「唔係呀～」梁玥嘉喺楊楠恩面前又露出笑容笑番，「李子迪教埋我呀不如～」



「梗係可以啦～」李子迪笑道，然後望向楊楠恩，「你要唔要自己試下行？」

「唔⋯」「我帶你出去溜。」

正當楊楠恩猶疑不決時，宋千辰望向楊楠恩問道

「可、可以呀？」楊楠恩一聽到宋千辰問，仲要係宋千辰主動提出問自己時，雙眼瞬間要放光似的，但為咗要保持應有嘅矜持都要假裝唔好意思咁問一句，「但我仲未溜得好⋯」

「都一樣啫，行下行下就識。」宋千辰見梁玥嘉叫李子迪教佢，佢偏要同梁玥嘉鬥氣



「咁⋯好呀！」楊楠恩高興地笑道，「你記得捉實我⋯！」

兩人「順利地」交換咗拍檔，楊楠恩捉住宋千辰嘅手腕，跟喺宋千辰嘅身邊出咗去溜冰場嘅中心；梁玥嘉則跟住李子迪一步一步行、一步一步慢慢學

出到去溜冰場嘅中心溜，旁邊冇扶手始終有啲緊張，一緊張起嚟楊楠恩就開始有啲手足無措

剛好此時旁邊又有一堆溜得好快嘅小朋友同佢擦肩而過，楊楠恩下意識躲避開，一時間失了重心企唔穩，畢竟對於初學者嚟講要靠鞋底嘅兩片薄刀片企穩都係一個難事

「呀⋯！」楊楠恩不禁嗌咗一聲，自然反應令佢緊閉上雙眼



當楊楠恩以為自己會跌坐喺冰面上時，佢卻發現自己仍然好端端地企咗喺度，佢緩緩地睜開雙眼，見到宋千辰緊緊地捉住佢嘅雙臂扶住咗佢

企喺溜冰場另一邊嘅梁玥嘉啱啱聽到有人叫，下意識望過去，卻見到宋千辰緊緊地扶住楊楠恩，難以言喻嘅感覺喺心底湧出

「千辰又會咁緊張咁扶實佢嘅⋯？」梁玥嘉定睛望住宋千辰同楊楠恩喺心中問道同時開始胡思亂想起嚟，「之前，千辰都唔會同其他女仔有咁親密嘅接觸⋯係唔係我高估咗自己嘅地位⋯？」

「唔、唔該⋯」楊楠恩嘅臉頰泛起淡淡嘅紅霞，心跳亦喺一瞬間變得好快，楊楠恩一臉腼腆地企番好微笑道，「唔好意思⋯都係我溜得唔好⋯」

「唔緊要，第一次溜係咁上下。」宋千辰平淡地講道

「唔洗擔心楊楠恩，有宋千辰睇住佢。」李子迪見梁玥嘉一直望住楊楠恩，以為梁玥嘉擔心楊楠恩於是開口講道

「嗯⋯」梁玥嘉擠出笑容點一點頭，收回落喺二人身上嘅視線

喺梁玥嘉收回視線嘅同時，宋千辰望向梁玥嘉，卻見到梁玥嘉正同李子迪有講有笑的，李子迪教佢，梁玥嘉睇嚟學得好開心一樣



宋千辰嘅心頓時「咯噔」一下似的，見到眼前嘅場境，心中有啲難受但又唔可以開口講啲咩，只好忍落嚟

「你擔心玥嘉呀？」楊楠恩留意到宋千辰嘅視線一直停留喺對面嘅梁玥嘉同李子迪身上，「放心啦～唔係有李子迪教佢咩？李子迪真係好有耐性去教人，啱啱佢教我嗰陣，好似溫柔嘅老師上身一樣，好有耐性咁講解同示範比我睇～」

楊楠恩定睛地望住梁玥嘉同李子迪，臉上掛着淡淡嘅微笑，但呢個微笑令人覺得有滿滿嘅違和感，什至有啲寒意⋯

「繼續？」楊楠恩伸手喺宋千辰嘅面前晃了晃

「吓⋯？」本來集中望住梁玥嘉嘅宋千辰回過神來，「好呀⋯」

楊楠恩再次伸手捉住宋千辰嘅手腕，宋千辰便邁步走，若無其事地露出笑容

喺宋千辰嘅心底裏，卻無法笑起嚟⋯心有啲難受，第一次感覺到因為一個女仔而難受嘅感覺⋯就好似一直喺身邊照顧你嘅一道光忽然間消失咗一樣



佢係佢開心嘅原因，同時，係佢難受嘅原因⋯

「佢係⋯我嘅寶物一樣⋯」宋千辰喺心中默念道，嗰個對佢嚟講似寶物一樣嘅女孩正企喺其他人嘅身邊開心咁笑着，縱使心裏想過去同梁玥嘉講都係自己教佢，但呢一刻佢講唔出口⋯

「其實你真係唔洗咁擔心玥嘉⋯」楊楠恩停低落嚟拉住宋千辰，宋千辰望向佢，眉頭輕輕一皺，「我睇得出你好擔心佢。」

「唔係⋯」宋千辰當然講緊反話，然後露出同平日一樣嘅笑容，「我怕嘉嘉太蠢，教極都唔識咋！」

「要唔要坐一陣再繼續？」楊楠恩體貼地問道，望一望向梁玥嘉嘅方向後再次望向宋千辰，「而且我都有少少攰啦～想休息一陣。」

兩人行到去場外嘅長櫈坐着，望着溜冰場裏來來回回嘅人






IG Link: https://www.instagram.com/nd_cotttocandy/?hl=zh-tw