［愛情純愛］由嗰一個Kiss開始，我地唔再係青梅竹馬: 46. 冬天 · 雪糕 · 你

「嘻嘻⋯」梁玥嘉用笑容嚟回答咗宋千辰

「你有冇諗過點解你可以心情咁好？」宋千辰問道

「咩意思？」梁玥嘉一臉不解地望住宋千辰，然後重複宋千辰剛才講嘅嘢，「因為我行咗銅鑼灣，同拎到特別版公仔囉～」

「錯，係因為我肯陪你行銅鑼灣呀！」宋千辰自豪並且毫不客氣咁講道，「咁你要點樣報答我呢？」

「咁、咁多謝你囉～」梁玥嘉無奈地微笑着講道，「多謝你陪我行銅鑼灣又同我交換隻特別版豬仔囉～」





「咁咋？」宋千辰一臉嫌棄咁望住梁玥嘉，心中期望着梁玥嘉仲會做啲咩似的

「唔係仲要點呀？」梁玥嘉一臉無語地瞪大眼望住宋千辰，然後又開玩笑般講道，「洗唔洗以身相許比你呀？」

「以身相許就免啦，你想我都唔想。」宋千辰講道，呢啲對話基本上係日常互相嫌棄對方嘅對話嚟，「但你至少都要請我食嘢呀！」

「食食食⋯」梁玥嘉反咗一個白眼之後問道，「咁想食咩呀？」

「去7仔買雪糕食。」宋千辰微微抬起下巴，雙眼望住前方就離佢地不遠嘅7仔講道，講完之後就直接朝7仔跑去





「喂！宋千辰！」梁玥嘉叫都叫唔住宋千辰，只好跟住宋千辰跑起嚟

梁玥嘉去到7仔門口嘅時候，已經見到宋千辰企咗喺雪櫃前面，耷低頭揀緊食咩雪糕好

「食咩好～」宋千辰一臉悠閒地望住眼前各種雪糕，「你食咩味？」

「唔⋯」梁玥嘉望住林林總總嘅雪糕雪條，為食嘅佢即刻就猶疑起嚟，都唔知揀邊樣好，「食邊隻味好⋯食雲尼拿味好唔好呢？」

「我揀好啦～」宋千辰講完之後就將雪櫃嘅門向上推，伸手入去拎咗一支藍色包裝嘅甜筒，「我食雲尼拿味～你快啲揀啦！」





「咁我都食雲尼拿味啦！」梁玥嘉笑了笑，然後又從雪櫃中拎咗一支雲尼拿味嘅甜筒，「比我啦，我去比錢。」

梁玥嘉比完錢之後，兩人喺便利店入面拆咗雪糕，拎起白色嘅膠蓋同撕走上半部分嘅包裝紙掉入去喺便利店入面嘅垃圾桶，邊行邊食咁行出便利店

「好凍呀！」梁玥嘉咬咗一啖雪糕之後單起眼講道，口腔中滿滿冰冷感，輕輕呵一口氣都有一陣陣白煙

「好食。」宋千辰講道，佢望向梁玥嘉，梁玥嘉一隻手拎住甜筒，另一隻手捉住頸巾嘅尾喺度晃

梁玥嘉感覺到宋千辰望住佢，便抬頭望向宋千辰，兩人對望着，梁玥嘉仲不忘食一啖雪糕，兩人不約而同地笑起嚟

「好耐都冇一齊食雪糕。」梁玥嘉笑了笑之後又食咗一啖雪糕，「今晚番去會唔會食唔到飯⋯」

「唔會嘅，一個雪糕咋嘛，又唔係食咗啲嘢好飽肚嘅嘢。」宋千辰咬咗個雪糕筒嘅邊一啖，「冬天食雪糕特別開心。」

「冬天食雪糕好有犯罪感。」梁玥嘉忽然沒頭沒腦咁講咗一句





「食雪糕同犯罪有啲咩關係？」宋千辰一臉不解咁望住梁玥嘉，「食雪糕係開心嘅事嚟。」

「吓？」梁玥嘉一臉驚訝地吓咗一聲，然後又笑道，「你唔覺咩？冬天食雪糕會有犯罪感，好似做緊啲咩大事咁樣。」

「唔覺。」宋千辰好快地回答道，完全冇猶疑嘅感覺，「食雪糕唔會覺得冇罪惡感。係咪因為你怕肥，然後仲食雪糕咋？」

「痴線，我邊度肥？」梁玥嘉皺起眉頭，不滿地講道，「我又高又瘦，一啲都唔肥！你唔好借意攻擊我。」

宋千辰無奈地望住梁玥嘉，梁玥嘉對宋千辰笑了笑，一口咬一啖雪糕；宋千辰見梁玥嘉笑，宋千辰都笑起嚟

「以後要多啲一齊食雪糕。」梁玥嘉微微抬頭望住宋千辰講道，「等你同我一齊有罪惡感。」

宋千辰冇講嘢，只係笑咗一笑；梁玥嘉原地轉咗個圈，然後望住宋千辰，笑了一笑，然後又望向前方，咬咗雪糕一啖





兩人各自番到屋企，梁玥嘉推門入屋，喺閂上門之前從門縫探頭望出去

「拜拜，聽日見。」梁玥嘉對宋千辰講道，從門縫中伸出手，揮揮手講再見，講完之後就縮番入去，然後閂上門

走廊忽然變得好安靜，明明上一秒仲有兩人嘅談話聲同笑聲，但下一秒就變得好安靜，靜得講嘢都會有回音似的；宋千辰推門入屋同時將鎖匙從匙孔裏抽番出嚟，然後企喺門口除鞋，將皮鞋放到鞋櫃前面

「番嚟啦。」宋千辰講道，宋媽媽喺廚房行出嚟，身上著住一條圍裙

「未食得，你沖個涼先啦。」宋媽媽講完之後就入番廚房

宋千辰邊往自己嘅睡房行去，邊將書包除落嚟，一打開房門就將書包掉咗入房，書包跌喺床邊，宋千辰將校褸掉到床上，將身上著住嘅長袖冷衫除咗落嚟掉到床上，然後將校呔向下扯同時向左右扯鬆校呔方便除落嚟








IG Link: https://www.instagram.com/nd_cotttocandy/?hl=zh-tw