［愛情純愛］由嗰一個Kiss開始，我地唔再係青梅竹馬: 47. 自拍

宋千辰冇即刻就拎起衫褲去廁所沖涼，而係坐喺電腦椅上拎起手機睇

「你又po咗嘢呀⋯」宋千辰一打開IG就見到喺佢嘅Icon隔離就係梁玥嘉嘅Icon，而且有一個紫紅漸變色嘅圈圈住佢嘅Icon，「係喎，搭車嘅時候佢po咗嘢⋯」

宋千辰㩒開嚟睇，見到嘅就係梁玥嘉喺車上面想比宋千辰睇嘅日落相，宋千辰用一個日落嘅emoji reply咗佢嘅story

「呀，係喎。」宋千辰伸手拎起放咗喺地下嘅書包，喺書包入面拎咗個長方型嘅盲盒出嚟，「差啲就唔記得咗你。」

宋千辰將個公仔從盲盒中拎咗出嚟，然後放咗喺枱燈嘅燈座上面，順手影咗張相喺IG send咗比梁玥嘉



梁玥嘉啱啱換好衫坐喺書枱前放好iPad，眼尾嘅餘光留意到放喺床上面嘅手機嘅螢幕亮咗一下，順手地拎起手機睇，見到宋千辰喺IG send過嚟嘅message

「係喎！」梁玥嘉忽然醒起放咗喺書包入面嘅盲盒，頓時起身行到去門嘅旁邊拎起書包，拎番放咗喺入面嘅盲盒，「差啲唔記得咗添⋯」

梁玥嘉喺書包中拎出盲盒，然後行番去書枱前坐低，將公仔拎出嚟放喺書枱上，然後喺IG影咗一張相send過去比宋千辰

「你唔send張相過嚟嘅話我差啲就唔記得咗佢」梁玥嘉再send多咗一個message比宋千辰，喺message嘅下方好快就出現咗seen

「聽日帶埋佢一齊番學」宋千辰一見到梁玥嘉嘅回覆就拎起手機回覆道



「我會執書包㗎⋯聽日番學之前一定會記得拎番佢出嚟」梁玥嘉見到宋千辰嘅回覆之後又打道，「睇下我張枱一放咗新嘅豬豬之後幾好睇」

「我淨係睇到你張枱好亂⋯」宋千辰回覆道，「睇下我張枱幾乾淨整齊」

「唔好借意讚自己好不？」梁玥嘉回覆道，仲要加咗一個反白眼嘅emoji喺最後一同send出去，「厚面皮呀你⋯」

梁玥嘉望到放喺枱面嘅公仔，心裏甜絲絲的，臉上嘅笑容都變得甜甜的

「我講事實都叫厚面皮？？？」宋千辰回覆道，後加一個反白眼嘅emoji



梁玥嘉用手指輕輕沿着豬豬公仔嘅頭摸到落去佢嘅屁股，不禁甜甜一笑，心裏覺得甜甜的，好似只有自己先可以同宋千辰單獨出街，呢個就好似係佢嘅獨有權利一樣

「你唔洗去沖涼咩？你平時一番到屋企就去沖涼㗎」梁玥嘉對宋千辰嘅習慣瞭如指掌，佢好清楚宋千辰平日習慣一出完街、放咗學番到屋企之後會第一時間去沖涼

宋千辰打算捉弄梁玥嘉一下，直接send咗張相過去比梁玥嘉

「send相比我做咩⋯？」梁玥嘉見到宋千辰send過嚟嘅相時望住手機螢幕講道，懷帶着懷疑嘅心開咗張相嚟睇，一㩒開咗張相，梁玥嘉不禁驚呼出嚟，「咩事呀！」

相中嘅宋千辰冇影到樣，面嘅部分淨係影到左邊耳垂嘅位置同下巴，校呔扯咗落嚟一半，長袖裇衫嘅頸喉鈕解開咗，兩邊衣領「V」字型地反開

淨係望到相都足以令梁玥嘉羞紅了臉頰，張相自動閂咗，梁玥嘉頓時就拎起手機回覆：「做咩send張咁嘅相比我⋯好彩我隔離冇人啫」

「咁你問我嘛」宋千辰回覆道，「除除下衫嘅時候記得個盲盒喺書包，拎完之後就坐咗喺枱前面，宜家又唔係幾想郁」

「你懶就懶啦⋯」梁玥嘉回覆道，唔知由幾時開始，喺兩個人嘅對話中用得最多嘅emoji就係反白眼，「下次再去抽盲盒！！！」



「Okay」宋千辰嘅回覆簡單又直接，梁玥嘉直接就seen咗宋千辰

宋千辰見梁玥嘉冇再覆佢，便將校呔除咗落嚟，然後拎起搭喺櫈背上嘅居家服去沖涼

梁玥嘉心中仍然覺得有啲唔自在，或者係因為宋千辰send過嚟嗰張自拍，所以覺得感覺怪怪的

「突然send張咁嘅相比我，搞到我宜家都唔知點咁⋯」梁玥嘉雙手因為覺得尷尬而掩住了臉，同時細聲地自言自語，「邊有人會send張咁嘅相比人㗎⋯」

除咗臉頰變得紅彤彤的之外，連耳根都紅晒，梁玥嘉用雙手撥着自己嘅臉頰

「好熱⋯」梁玥嘉細細聲咁講道，「尷尬到覺得熱⋯要分散下注意力先⋯」

梁玥嘉打開MacBook，打算睇下YouTube或者其他嘢嚟分散下自己嘅注意力






IG Link: https://www.instagram.com/nd_cotttocandy/?hl=zh-tw