［愛情純愛］由嗰一個Kiss開始，我地唔再係青梅竹馬: 45. 戲弄

「耶～」梁玥嘉開心地笑起嚟，將宋千辰手上拎住嘅特別版拎走，將自己手上嘅普通版塞到宋千辰嘅手中

梁玥嘉開心地將特別版放番入盒中，然後放咗入書包入面

「行啦～我地去皇室堡。」梁玥嘉行咗兩步之後轉身，喺佢眼尾嘅餘光裏閃過一個人，佢知道對方望到佢，並且望住佢

梁玥嘉伸手拉住宋千辰，宋千辰因為佢突然嘅舉動而窒咗下，嘴角不禁上揚

喺宋千辰邁步行嘅同時，佢自然地望向佢嘅左手邊，佢呢一刻知道，點解梁玥嘉會伸手拖佢拉住佢行，因為邱凱棠就喺佢地左邊，而且見到佢地



宋千辰當冇睇到一樣直接行，仍然中意宋千辰嘅邱凱棠心裏當然不是味兒，但佢都冇講咩，直接就行咗入去Log-on

當兩人已經行遠咗，經過咗Starbucks，差唔多行到去扶手電梯前時，梁玥嘉想鬆開宋千辰嘅手，宋千辰感覺到梁玥嘉想鬆手，於是故意緊緊地拖實咗梁玥嘉唔比佢鬆手

「你捉實我做咩？鬆、鬆手啦。」梁玥嘉回頭望宋千辰並試圖甩開宋千辰嘅手

「你啱啱唔係拖得好順手咩？」宋千辰故意戲弄梁玥嘉般問道

「咁、啱啱邱凱棠喺度嘛⋯」梁玥嘉唔敢直視宋千辰嘅雙眼，默默地移開咗視線，「宜家行遠咗，可以鬆手⋯」



宋千辰聽完梁玥嘉講之後笑了笑，然後鬆開咗手，梁玥嘉見佢鬆咗手，便同宋千辰繼續行

「都唔知係咪特登挽我㗎⋯」梁玥嘉喺心中抱怨道，佢留意到宋千辰今日冇睇手機，便開口問道，「你今日唔睇手機嘅？」

「唔想睇手機。」宋千辰神色自若咁講道，就好似平常一樣咁同梁玥嘉講嘢

當然，「唔想睇手機」並唔係宋千辰唔睇手機嘅原因，真正唔睇手機嘅原因係因為今日同梁玥嘉一齊行街，雖然宋千辰對於行街呢樣嘢真係冇咩興趣，不過難得梁玥嘉拉住佢過嚟行，咁當然佢要奉陪到底

⋯



「番去未呀？」梁玥嘉見時間都已經差唔多便問宋千辰

「睇你啦，你想番去嘅話，我地咪搭車番去。」宋千辰回答道

「咁我地番去啦～」梁玥嘉笑了笑，臉上都開始有啲倦意，笑容都冇一開始咁燦爛

喺巴士上面嘅時候，宋千辰先拎手機出嚟睇；梁玥嘉坐喺窗邊，外面嘅天空因為日落黃昏而染成橙紅色，好似被火焰燒過一樣嘅痕跡，維多利亞港嘅海面一閃一閃的，因為黃昏時嘅陽光照射到海面上

梁玥嘉拎出手機想影低呢一刻咁靚嘅天空，佢將手機貼住喺玻璃上，避免影出嚟嘅想有玻璃嘅倒影

宋千辰見到梁玥嘉一副雀躍嘅表情，嘴角不禁揚起，喺佢眼中嘅梁玥嘉總係好似開心果一樣，樂觀又可愛；梁玥嘉嘅笑容喺宋千辰心中係最好睇，總係笑容滿面，偶爾臉頰泛起淡淡紅霞，好可愛

「只有我一個人見到佢嘅可愛就好⋯」宋千辰喺心中講道同時緩緩地合起雙眼，平日隨和嘅宋千辰忽然間有啲霸道

宋千辰手上拎住手機，自然地放咗喺放喺大腿嘅書包上，雙眼因為有啲疲倦而唔想再睜開



「千辰，你睇下～」梁玥嘉想將佢影完嘅相比宋千辰睇，一回頭坐番好時見到宋千辰已經小睡片刻中，「又會瞓咗嘅⋯」

本來梁玥嘉一整日都好眼瞓，但宜家卻一啲倦意都感覺唔到，反而好精神

「你睇唔到咁靚嘅天空真係可惜⋯」梁玥嘉細聲地喃喃自語道，手靠喺窗邊托住腮，目光被外面染成漸變色嘅天空吸引住，「真係唔想淨係做你嘅青梅竹馬⋯好似有啲貪心⋯」

喺愛情之中，所有人都會變得貪心，有邊個會願意同人分享自己中意嘅人？因為真心中意，所以先會變得霸道、變得貪心；若然唔係真心中意，咁呢種貪心嘅感覺亦唔會有，就算有，都只不過係要霸佔嘅心

梁玥嘉望向宋千辰，心中想要越過「青梅竹馬」嘅界線，但佢冇咁大嘅勇氣話比宋千辰知佢嘅心意，寧願將心意藏於心底，都唔想失去呢份已經唔再「純粹友情」嘅友誼；界線好似變得有啲模糊，或者係因為梁玥嘉中意宋千辰，又或者因為宋千辰中意梁玥嘉，又或者⋯因為佢地彼此都抱住「朋友以上 戀人未滿」嘅心，只係大家都唔知道、唔察覺、什至唔願多想

「落車啦。」梁玥嘉輕拍宋千辰，宋千辰緩緩睜開眼，見到梁玥嘉望住佢

宋千辰只係點一點頭，然後將手機塞番入褲袋，拎起書包企起身，邊行邊孭書包；照樣地，宋千辰行前，梁玥嘉行後，萬年不變嘅定律 ；梁玥嘉落車之後，帶着小跳步行到宋千辰嘅身旁，雙手捉住頸巾嘅末端，以宋千辰對梁玥嘉嘅了解，佢知道咁樣係梁玥嘉心情好嘅表現



「心情好好啦？又行咗銅鑼灣，又拎到想要嘅特別版公仔。」宋千辰臉上掛着淡淡嘅笑容，見到梁玥嘉嘅小跳步就知道佢心情好




IG Link: https://www.instagram.com/nd_cotttocandy/?hl=zh-tw