［愛情純愛］由嗰一個Kiss開始，我地唔再係青梅竹馬: 44. 她喜歡做的事

梁玥嘉嘅笑容好似定格咗一樣掛喺臉上，頭微微仰起望住宋千辰，兩人四目交投

「嘻⋯」梁玥嘉笑咗一笑，然後一蹦一跳地行到呢個層架嘅後方，睇層架另一邊嘅嘢

宋千辰用手撥一撥頭髮之後就行到去層架嘅另一邊，企喺梁玥嘉隔離，然後「以其人之道 還治其人之身」伸手摸梁玥嘉嘅頭

「你唔好整亂我個頭！」梁玥嘉動作好快地避開，摸摸自己嘅頭頂

「我啲頭髮都比你搞到亂晒！」宋千辰一臉無語咁望住梁玥嘉，「點可以『只許州官放火，不許百姓點燈』咁霸道？」



「點同！我又要重新紮過頭髮啦！你洗唔洗呀？」梁玥嘉一邊理直氣壯咁講，一邊用左手捉住馬尾嘅頂端，另一隻手扯下髮圈

喺將髮圈扯下，髮圈沿住髮尾滑落同時，馬尾因為扯下髮圈嘅力度而左右擺咗一下，喺馬尾擺着嘅同時，宋千辰聞到淡淡嘅洗頭水香味；宋千辰嘅視線由馬尾嘅頂端慢慢下移到馬尾嘅末端，望向梁玥嘉嘅後頸，喺後頸上仲有一條條短短嘅髮絲；梁玥嘉嘅左右手熟練地梳着頭髮，由頭兩旁嘅頭髮到頭頂嘅頭髮，都一絲不苟地向馬尾向方向梳好，前額兩旁嘅瀏海髮絲都有向後梳，只係髮絲唔足以到馬尾頂端嘅位置而再次垂下，當梁玥嘉覺得已經梳好之後，便將左手伸到右手嘅手腕，將髮圈從右手手腕中拉咗出嚟將馬尾重新紮好

宋千辰收回視線，佢忽然感覺到心底傳嚟莫名其妙嘅心動感覺，宋千辰嘅嘴角悄悄地上揚，手上拎住啱啱喺層架上拎落嚟嘅公仔

梁玥嘉忽然行到去另一邊入口對住嘅木枱前，木枱上放着各種唔同嘅盲盒公仔，梁玥嘉隨便拎起兩個唔同款式嘅盲盒，心中忽然想抽一個

「想抽盲盒⋯」梁玥嘉喺心中講道，佢抬起頭望住喺前面層架前嘅宋千辰，「叫佢同我一齊抽先～」



梁玥嘉一蹦一跳地去到宋千辰嘅身旁，宋千辰擺出一副疑惑臉望梁玥嘉，梁玥嘉拉住宋千辰去到放盲盒嘅枱前

「我地一齊抽盲盒呀～」梁玥嘉隨手拎起其中一個盒面係罐頭面造型嘅盲盒，「呀！好可愛呀呢個！」

包裝盒上有一隻豬嘅圖案，梁玥嘉嘅視線頓時就忽呢個系列嘅盲盒吸引住；宋千辰見到梁玥嘉一臉興奮，好似小朋友見到玩具一樣，不禁就笑咗出嚟

「呢個好可愛呀～我地抽呢個呀～」梁玥嘉將盲盒遞到宋千辰嘅面前

「抽嚟做咩？」宋千辰疑惑地望住眼前一個又一個、唔同系列、唔同款嘅盲盒，「有咩用？」



「開心呀～抽嚟為開心為刺激呀～盲盒顧名思義就係你唔知你揀呢嗰一盒入面放嘅係邊隻公仔嘛，就係咁先刺激～」梁玥嘉嘅笑容天真爛漫的，特別似小朋友，「一齊抽啦，一齊抽啦！」

「你唔洗睇下其他先呀？」宋千辰望到梁玥嘉手上緊緊拎住嘅盲盒，「咁快就肯定要呢個？」

「呢個最可愛，我就揀定呢款啦～不過都係再換一盒先～」梁玥嘉望住手上拎住嘅盲盒，然後將呢個盲盒放番喺原位，再揀另一盒同款嘅盲盒，「你快啲揀一個啦～」

宋千辰都冇梁玥嘉咁好氣，佢順梁玥嘉嘅意陪佢行銅鑼灣、陪佢抽盲盒，因為梁玥嘉開心，佢就開心

「唔⋯」宋千辰望住眼前嘅盲盒諗咗一諗，然後隨手就拎起一個，「揀好啦，到你啦。」

梁玥嘉一臉猶疑，伸手將放喺角落嘅一個拎起咗小小之後又放番低，然後又拎起拎一個，幾乎每一個盒都比佢拎勻晒，但佢都係未揀到要邊個

「憑直覺揀啦。」宋千辰望住梁玥嘉咁揀法，佢都唔知梁玥嘉要揀到幾時，「你猶疑十次都好都一樣㗎啦⋯」

「唔⋯」梁玥嘉望住四個一排，放得井然有序嘅盲盒，手懸在盲盒上方猶疑不決，最終梁玥嘉一手拎起喺第四排第三個盒，「就呢個啦！」



梁玥嘉拉住宋千辰行咗去收銀劇，兩個人買完盲盒之後就離開咗Log-on，兩個人喺嚟嘅入口出番去，然後企喺Log-on嘅門口，企喺一邊打算即場開盲盒

梁玥嘉同宋千辰同一時間打開盲盒，心中緊張又興奮，都想知道自己抽到邊一隻，宋千辰比梁玥嘉更快幾銀灰色嘅包裝袋拆開，將公仔喺袋入面拎出嚟

「你抽到特別版！？」梁玥嘉望住宋千辰手上拎住身上有心心，慵懶地側身躺着嘅豬公仔，同時，梁玥嘉都拆到膠袋，拎咗一隻身上冇花紋，乖巧地坐着嘅普通版，「你咁Lucky嘅，抽到機率得20%抽中嘅特別版⋯」

「同你換啦。」宋千辰將特別版公仔遞到梁玥嘉面前

「你唔要呀？特別版嚟㗎喎！」梁玥嘉微微鼓着兩泡腮問道，縱使佢一聽到宋千辰話同佢換時雙眼都發緊光似的

「冇所謂呀。」宋千辰聳聳雙肩講道，然後默默地喺心中講道：「反正對我嚟講，你開心就得。」






IG Link: https://www.instagram.com/nd_cotttocandy/?hl=zh-tw