［愛情純愛］由嗰一個Kiss開始，我地唔再係青梅竹馬: 43. 162 vs 178

「哈⋯哈⋯」宋千辰坐低喺梁玥嘉隔離，仍然喘緊氣，都未回到氣，「我有話同你一齊去咩⋯」

梁玥嘉見宋千辰一臉嚴肅咁講，心裏顫了一顫，然後梁玥嘉諗到一個好主意，決定要先下手為強

「哼⋯」梁玥嘉嘟起小嘴，仲要哼咗一聲，「咁你下個站落車番去囉⋯！」

梁玥嘉隨即伸手想去幫宋千辰㩒個落車鐘，宋千辰見狀即刻就伸手捉住梁玥嘉快要掂到落車鐘嘅手

「我講笑咋～」宋千辰見到梁玥嘉氣呼呼般嘟起小嘴，心裏有種「心都要溶化」嘅感覺，即刻就微微一笑，「我又冇話唔同你去，係唔同你去嘅話，啱啱我就直接去咗㩒密碼，番咗屋企啦。」





「好啦～」梁玥嘉即刻就笑番，收回手

「做咩突然間想去銅鑼灣？有嘢買？」宋千辰問梁玥嘉

「唔⋯只係突然間想去行下，所以咪去。」梁玥嘉笑了笑，「都冇咩特別原因。」

兩人喺Sogo門外嘅巴士站落車，梁玥嘉指住前面嘅Fashion Walk朝宋千辰微微一笑；兩人行到去Fashion Walk之後先搭電梯上二樓，直行去到Log-on

「雖然千辰話我送咩都可以，但我一定要好好留意一下千辰對咩有興趣！」梁玥嘉喺心中對自己講道





「既然嘉嘉打算送聖誕禮物比我，咁我當然都要回禮，雖然一開始已經打算今年送嘢比佢，睇下嘉嘉會中意咩，到時再嚟買。」宋千辰喺心中自言自語講道

兩個人由踏入門口嗰一刻開始，注意力都偷偷地放喺對方睇嘅嘢上面，猜想嗰樣嘢會唔會道係對方想要嘅嘢

兩人經過咗賣化妝品嘅地方，然後走到賣figure同公仔嘅位置，梁玥嘉跑到其中一個放公仔跑層架前，拎起放喺淺啡色木架上嘅一隻長條型嘅柴犬造型攬枕

「好Cute呀～攬起嚟軟棉棉好舒服～」梁玥嘉臉上掛着嘅笑容就好似天真嘅小朋友一樣

宋千辰只係企喺梁玥嘉隔離，就好似等緊女朋友嘅男朋友一樣，見到佢開心自己就會開心，見到梁玥嘉笑得高興，佢嘅嘴角都會自動上揚





「呢個都好可愛呀～好好捏呀！」梁玥嘉放低柴犬攬枕，拎起放喺隔離嘅海獅造型嘅圓型麻薯抱枕，遞到宋千辰嘅面前，「摸下～」

宋千辰伸手捏咗一下麻薯抱枕，然後放開咗麻薯抱枕，伸手捏住梁玥嘉嘅臉頰

「呢個好捏啲。」宋千辰笑着講道，捏住梁玥嘉臉頰嘅手仲要晃咗兩下

「痛呀！」梁玥嘉一手攬住麻薯抱枕，另一隻手捉住宋千辰嘅手

宋千辰仲要晃多咗兩下之後先鬆開手，望住梁玥嘉露出小惡魔般調皮嘅笑容，見到梁玥嘉一臉不滿地鼓起兩泡腮，宋千辰不自覺地伸手摸一摸梁玥嘉嘅頭，然後拎起掛喺隔離嘅一隻頸上繫咗圍巾嘅狗狗公仔

梁玥嘉望住宋千辰，宋千辰嘅臉上掛着淺淺嘅笑容，梁玥嘉嘅臉頰泛起淡淡嘅紅霞，見到宋千辰臉上嘅笑容，梁玥嘉微微耷低頭同時臉上都掛上淡淡嘅微笑

「你睇下，呢啲細細隻先可愛㗎嘛！」宋千辰將繫咗圍巾嘅狗狗公仔遞比梁玥嘉睇

「你中意呢啲咁可愛嘅嘢㗎咩？」梁玥嘉笑咗一笑問道





宋千辰望住手上拎住嘅吊飾公仔猶疑咗一下，然後又揚起嘴角講道：「唔係中意嘅～只係有時都會比呢啲可愛嘅嘢吸引到。」

宋千辰眼尾貓咗梁玥嘉一眼，然後將公仔掛番上去，正眼望向梁玥嘉

「行啦，去前面睇下。」宋千辰講完之後就直接向旁邊嘅另一個層架行去，其實佢只係想暫時迴避一下梁玥嘉嘅視線，佢喺心中講道：「我啱啱講嘅嘢會唔會太出面⋯？算啦，反正嘉嘉都唔會特別去諗，應該唔會get到我講咩掛⋯」

宋千辰行到去放Figure玩具吧位置，拎起一盒Iron Man嘅Q版Figure

「千辰中意呢個？」梁玥嘉喺心中默想道

梁玥嘉嘅雙眼悄悄地定睛望住宋千辰，留意宋千辰嘅一舉一動同眼神變化；宋千辰好快又放低咗呢個Figure，微微彎下腰，然後蹲低睇放喺下層層架嘅其他Q版Figure

梁玥嘉見到蹲低咗嘅宋千辰，宋千辰比佢高，身高只有162cm嘅梁玥嘉，平日根本唔可能見到身高有178cm嘅宋千辰嘅頭頂，難得宋千辰蹲低咗，梁玥嘉調皮地伸手摸一摸宋千辰嘅頭，用手撥着佢嘅頭髮





「搞咩呀？」宋千辰嚇咗一嚇，一下子就抬起頭望向梁玥嘉，而梁玥嘉正笑嘻嘻地仍將手放喺宋千辰嘅頭上

梁玥嘉見到宋千辰一臉無語，便笑住咁用手撥佢嘅頭髮多兩下，宋千辰撥開梁玥嘉嘅手，然後一下子企起身，定睛凝視着梁玥嘉




IG Link: https://www.instagram.com/nd_cotttocandy/?hl=zh-tw