［愛情純愛］由嗰一個Kiss開始，我地唔再係青梅竹馬: 38. 喜歡的人

宋千辰聞到梁玥嘉嘅秀髮傳嚟嘅洗頭水香味，心跳又開始加快咗啲，宋千辰嘅右手喺剛才因為怕梁玥嘉跌所以輕輕地攬住咗梁玥嘉嘅腰

「你可以鬆手未⋯」梁玥嘉細聲地問道，聲線因為害羞而輕微顫抖着

「咁你鬆手未？」宋千辰反問梁玥嘉

「死人宋千辰⋯」梁玥嘉鬆開咗雙手，然後狠狠地瞪住宋千辰

「咩呀？我怕你跌特登扶住你呀，仲話我⋯」宋千辰一臉無辜咁講道，然後又故意將張櫈向後郁咗一郁，嚇得梁玥嘉又即刻雙手扶喺宋千辰嘅雙肩上，「哈哈！你好驚咩？」





「唧，宋千辰！」梁玥嘉用力咁捏咗宋千辰嘅手臂一下，「你今次係特登啦！」

「呀嘶！痛、痛、痛⋯！」宋千辰一直縮，梁玥嘉鬆咗開手，然後捉起宋千辰嘅手，喺佢嘅前臂上用力地咬咗一口，「痛、痛、痛、痛！」

梁玥嘉鬆咗口之後，喺宋千辰嘅前臂上有一個明顯嘅牙印，宋千辰望一望個牙印，然後抬頭一臉無言咁望住梁玥嘉

「哼～邊個叫你特登嚇我！」梁玥嘉理直氣壯咁講道，仲要微微鼓起兩泡腮嘟起小嘴

豈料宋千辰直接就捉起梁玥嘉嘅右手，喺前臂上用力咬落去





「呀呀呀呀呀⋯！」梁玥嘉擺出一副可憐嘅模樣望住宋千辰，「你咬我！」

「你都咬我啦！」宋千辰遞起手遞到梁玥嘉面前，比佢睇下喺自己前臂上嘅牙印，「你睇下你個牙印！」

「你恰我嘅！」梁玥嘉輕輕哼咗一聲，彷彿係對宋千辰撒嬌一樣微微鼓起兩泡腮講

「明明你都有咬我！」宋千辰指住自己手上嘅牙印，「你唔好講到得我咬你咁⋯」

「唔理⋯」梁玥嘉嘟起小嘴撇開臉，忽然間覺得小腿痕痕的，於是提起右腳伸手撓咗兩下





佢好似忘記咗佢只係單腳跪坐喺櫈上面，重心不穩，梁玥嘉不穩地向後好似要跌一樣；宋千辰好快地伸出手輕輕地捉住梁玥嘉嘅左手手肘向自己呢邊拉咗一下，梁玥嘉整個人直接撞上宋千辰嘅胸膛

呢一撞好似令兩人都清醒過嚟，梁玥嘉意識到自己坐緊嘅位置有啲怪，雖然唔係坐喺宋千辰大腿上，但都頓時企起身，坐番喺床邊

「叩叩—」正當兩人靜咗落嚟尷尬緊嘅時候，忽然有人敲門

「食飯啦。」楊亦晟喺門口講道

宋千辰同梁玥嘉開門行出廳，兩人行咗入去廚房幫手，梁玥嘉跟喺宋千辰後面

「嘉嘉出去坐啦！啲嘢等千辰拎得啦～」宋媽媽見到梁玥嘉行入廚房便講道，「啲嘢熱呀！」

「出番去坐啦梁玥嘉。」宋千辰回頭望向梁玥嘉，臉上掛上淡淡嘅笑容，笑咗一笑

梁玥嘉出番去坐喺餐枱前等食，宋千辰手上拎住兩碗飯喺廚房行出嚟，將裝咗半碗飯嘅碗放到梁玥嘉面前，然後坐低喺梁玥嘉隔離





「食飯～」「食飯。」梁玥嘉同宋千辰都有乖乖叫人食飯，然後拎起筷子食飯

「嘉嘉呀～阿姨煲咗你最中意飲嘅粟米湯同煎咗雞翼比你食，你食多啲呀～」宋媽媽對梁玥嘉講道

「好呀～」梁玥嘉笑道

「即係唔食完唔好走呀叫你。」宋千辰朝正伸手夾緊雞翼嘅梁玥嘉講道

「唔洗理佢㗎嘉嘉。」宋媽媽對梁玥嘉講道，就好似平時一樣咁傾計，「下個月就聖誕啦喎，有冇諗住同friend去邊度挽呀？」

「仲有成個月先Christmas⋯洗唔洗咁快講定？」宋千辰無奈咁反咗一下白眼

「有冇約人出街呀？」楊亦晟都摻和一腳入嚟一齊講，「同中意嘅男仔出去，識男朋友嘅好時機喎～」





「老公你講咗我想講嘅嘢呀！」宋媽媽望向楊亦晟笑住咁講道，然後一臉好奇咁望向梁玥嘉，「嘉嘉有冇中意嘅人呀？」

宋千辰一聽到宋媽媽問呢一句，頓時扮出一副漠不關心嘅樣子，假裝專注咁食飯，但係耳朵嘅收音系統默默地開到最盡

「呃⋯」梁玥嘉猶疑地呃咗一聲，然後笑了笑，「暫時又未有喎～」

宋千辰聽到之後，上揚嘅幅度好細，嘴角悄悄地微微上揚

呢個細微嘅舉動比楊亦晟留意到，楊亦晟望一望梁玥嘉，心中大概知道咩事，但佢冇出聲講嘢

「佢點會有男仔中意呀～」宋千辰望咗梁玥嘉一眼之後淡淡地講道，「佢就算有都唔會敢約人出去啦～」

「關你咩事啫⋯」梁玥嘉望向宋千辰，兩個人好似又準備好要鬥嘴一樣

「嘉嘉有人追唔通又話你知咩～」宋媽媽朝宋千辰講道，「可能係人地約嘉嘉出去呢，一定係嘉嘉約人㗎咩？」





「咪係！」梁玥嘉點頭和應




IG Link: https://www.instagram.com/nd_cotttocandy/?hl=zh-tw