［愛情純愛］由嗰一個Kiss開始，我地唔再係青梅竹馬: 39. 定海神針

「佢有人中意先算啦～」宋千辰望住梁玥嘉講道

食完飯之後，梁玥嘉同宋千辰入咗房，通常梁玥嘉都唔會食完飯就即刻番屋企，通常都會留一陣先留去

梁玥嘉將外套除咗，外套入面係一件白色T-shirt，下身著住短褲

梁玥嘉趴喺床上面睇手機，佢最近新follow咗一個IG account，就係上次佢喺大型書店入面睇到賣手鐲嗰一間嚟

「隻手鐲真係好靚呀⋯但又有啲貴⋯」梁玥嘉開咗嗰間店嘅IG account，然後又開始喺度stalk人地間鋪有咩產品，其實主要都係睇佢中意嗰條手鐲



宋千辰坐喺電腦椅上面睇手機，一開IG就見到梁玥嘉po咗IG story，一㩒入去佢個story就見到梁玥嘉share咗嗰隻手鐲嘅IG po出嚟，仲要打咗句caption：「真係好靚⋯想買⋯」

宋千辰趁梁玥嘉唔為意嘅時候㩒咗入去個po入面，然後save低咗呢個po，之後好快咁quit番出去，呢個時候咩都唔知嘅梁玥嘉趴喺床上面踢着腿

「今個聖誕送咩比佢好⋯上次行Log-on嘅時候睇到隻公仔都幾靚，買比佢？」宋千辰喺心中苦惱着買咩比梁玥嘉好，「定係買啲咩實用嘢比佢？但我又唔知佢想要啲咩實用嘢⋯女仔會唔會都係想收啲裝飾性嘅嘢⋯？」

宋千辰望向梁玥嘉，諗緊可以送啲咩比佢嘅時候見到佢同人WhatsApp緊，於是好奇咁望佢同邊個WhatsApp緊

「唧⋯又係李子迪⋯」宋千辰喺心中表示不滿，心裏頭湧出一陣酸味，縱使心中好不滿，但雙眼一直緊盯着梁玥嘉嘅手機螢幕，「Wow～」



「Wow咩呀⋯」梁玥嘉緩緩擰過嚟望向宋千辰

「同人傾晒計咁啵～」宋千辰掛上一個虛偽嘅笑容，假裝揶揄梁玥嘉，「Wow～」

「咩呀⋯講緊功課咋⋯」梁玥嘉無奈咁反咗一個白眼，「諗太多啦你⋯」

梁玥嘉鎖上手機螢幕，一下子爬起身盤着腿坐喺床上面望住宋千辰

「做咩呀？呷醋呀？」梁玥嘉開玩笑般側着頭問宋千辰，明知呢個係開玩笑，但心中卻好想宋千辰真係為佢而呷醋，「唔好唔開心啦～佢唔會取代你㗎喎～」



「我做咩要呷醋？」宋千辰只係輕輕一笑，瞄咗梁玥嘉一眼，都冇正眼望佢，因為佢口不對心，「我又唔係你男朋友⋯」

「喂～千辰？」梁玥嘉好似挽上癮一樣，佢跪爬到枕頭邊然後手肘放喺書枱上面，側住頭咁望宋千辰，「宋千辰～」

「冇呀⋯！」宋千辰無奈地笑，正確嚟講係見到梁玥嘉一副可愛嘅模樣而笑

「千辰？」梁玥嘉努力咁忍住笑，伸手將宋千辰用嚟托住下巴嘅手捉住並拉向自己，宋千辰轉咗用左手托頭

「點呀？」宋千辰嘅嘴角揚起，望向梁玥嘉嘅眼神中帶點無奈又帶點溫柔，陪佢完成呢齣鬧劇，「你再同佢講嘢講到佢取代咗我嘅話，我就真係呷醋啦～」

「唔會～」梁玥嘉笑了笑，「你同其他人都唔一樣，邊有人可以有本事取代你？」

宋千辰聽到梁玥嘉一句話佢同其他人唔一樣，心中忽然間又有種安心，笑容都變成由心而發咁掛喺臉上，其實佢自己好清楚知道自己嘅位置喺宜家冇人可以動搖到，但宜家嘅佢將梁玥嘉當成一個異性嚟對待，佢心裏自然就會有一絲在意一絲擔心

一句「你同其他人唔一樣」就好似定海神針一樣，令本來仲因為梁玥嘉同李子迪WhatsApp而嚟嘅醋意一下子就消失得無影無蹤



「我同其他人當然唔一樣。」宋千辰嘅語氣中夾雜咗一絲自豪，「我知呀。」

梁玥嘉冇出聲，默默地同宋千辰對視着，兩人相視而笑，或者喺旁人嘅眼中真係只係一齣鬧劇，但事實上兩人喺對方嘅心中都係無可取代嘅人，呢個特別嘅位置就只有對方，喺彼此都唔知道彼此嘅心意同時，兩人各自都喺心中將另一個特別且重要嘅位置留咗比對方

「快啲到聖誕節就好啦⋯」梁玥嘉鬆咗手，抿一抿唇講道，「好想快啲到聖誕呀～」

「淨係顧住挽⋯」宋千辰笑了笑

「有得挽邊個唔想挽？」梁玥嘉側着頭講道，「聖誕嘅時候想開心咁挽。」

梁玥嘉喺宋千辰屋企留到9點半左右就番咗去隔離屋，梁玥嘉一番到屋企，第一時間就入咗房痴住張床唔想郁

都唔知灘咗幾耐之後梁玥嘉就瞓著咗，連爸媽番到屋企都唔知



翌日早上，梁玥嘉照樣喺聽到鬧鐘響時起身，梳洗完之後換上校服，孭埋書包就出門口，同平日一樣一打開門就聽到隔離單位嘅開門聲

「早晨⋯」梁玥嘉一臉睡眼惺忪咁望各宋千辰講道




IG Link: https://www.instagram.com/nd_cotttocandy/?hl=zh-tw