［愛情純愛］由嗰一個Kiss開始，我地唔再係青梅竹馬: 37. 距離

宋千辰偷錫咗梁玥嘉一下之後好似就坐番好喺櫈上面，耳根同臉頰都泛起紅霞，宋千辰仲要望咗一望梁玥嘉睇下佢有冇醒

「我真係痴咗線先會做啲咁嘅嘢⋯」宋千辰細細聲咁對自己講道，佢用眼尾偷偷地望咗梁玥嘉一眼，又忍唔住笑起嚟

啱啱一錫落梁玥嘉嘅臉頰上時，宋千辰感覺到心動嘅訊號傳嚟，佢感覺到心中既緊張又帶一點興奮，而且仲有一絲絲嘅甜意，感覺上喺睡房內都飄起一個個粉紅色嘅泡泡⋯有一刻宋千辰喺度諗，佢會唔會就好似童話故事中嘅睡公主一樣，錫一啖之後就會緩緩睜開雙眼

宋千辰坐番喺書枱前，假裝咩事都冇發生過一樣，但仍然會不自覺地偶爾望向梁玥嘉，宋千辰仍然覺得臉頰有啲發熱嘅感覺，心跳仍然好快，一下一下咁用力跳着

「呼⋯」宋千辰呼咗一口氣，左手幢起，頭靠喺左手嘅上臂上，右手平放喺枱上，宋千辰側着頭伏喺枱上，雙眸注視着梁玥嘉





宋千辰嘅臉頰紅紅的，如果話上次嘅Kiss係因為要做戲，咁今次嘅Kiss就係戲假情真，佢只係知道係啱啱一刻佢真係錫咗梁玥嘉

「聽歌平靜下先⋯」宋千辰一邊自言自語一邊搖搖頭，然後戴上耳機再次unlock MacBook開Spotify播歌聽歌

宋千辰喺歌單播放前揀咗隨機播放，歌曲嘅前奏緩緩響起，睡房中只依賴枱燈照亮，窗簾緊緊地拉上，只留有一條小縫有微弱嘅光線滲入房中

梁玥嘉忽然緩緩睜開眼，打咗兩個哈啾，側身仍然攬住張被，但佢雙眼望住宋千辰；宋千辰聽到佢打哈啾便望向梁玥嘉

「唔⋯幾點⋯」梁玥嘉用力拉恆手腳伸個懶腰，用撒嬌搬嘅聲線問道





宋千辰冇答佢嘅打算，梁玥嘉坐起身望向放喺床頭嘅鐘

「6點9啦⋯」梁玥嘉微微嘟起嘴伸手揉揉眼，但佢冇起身嘅打算，佢灘番落宋千張床上面，攬住被睇手機

「你睇下你個頭亂到⋯」宋千辰望住梁玥嘉披頭散髮嘅樣，雖然佢都唔係第一次見到梁玥嘉呢個狀態，「你去梳下頭啦⋯」

「你都唔係第一次見啦～」梁玥嘉理直氣壯咁講道，仍然頹廢咁灘喺床上睇手機，「下個月就係聖誕節，聖誕去邊度挽好？」

「宜家12月都未到喎小姐，咁快就諗去邊度挽？」宋千辰除咗耳機落嚟，將耳機嘅插頭從電腦拔出嚟，將耳機隨手就扔咗喺電腦後面嘅位置





「唔多啦～都11月底啦～好快就聖誕節啦！」梁玥嘉坐起身，盤腿朝住宋千辰嘅方向坐喺床上面，「今年送咩比穎容好呢～」

梁玥嘉故意提起送聖誕禮物，想藉此引宋千辰講出佢想要啲咩

「是旦啦，送咩都一樣啫，心意啫。」宋千辰雙手搭喺電腦椅嘅扶手上面，心諗：「又唔見你話送嘢比我⋯我識你嘅時間仲耐過李穎容啦⋯！」

梁玥嘉忽然一下子捉住宋千辰張櫈嘅扶手，將宋千辰將櫈轉至面向自己，梁玥嘉一下子從床上起身跪喺床上，雙手捉住櫈嘅扶手，宋千辰一臉無言咁講住梁玥嘉，雙手仍然舒適地曲着搭喺扶手上面，梁玥嘉捉住嘅係扶手嘅前端

「算啦，我都係直接問佢！如果唔係到下世都唔知佢會想要咩⋯」梁玥嘉喺心中無奈地講道，然後開口問宋千辰，「你有冇嘢想要？難得我第一次送聖誕禮物比你。」

「我冇咩特別嘢想要。」宋千辰講道，佢講嘅又真係真心話嚟嘅，佢對於禮物呢樣嘢冇太大嘅要求，「你中意送咩咪送咩，我冇咩要求。」

比起梁玥嘉送咩禮物比佢，宋千辰更在意梁玥嘉跪喺床上，因為佢怕張櫈突然向後梁玥嘉會失重心跪唔穩跌親或者整到，但此時宋千辰嘅內心忽然有一種小惡魔想法冒出

「呀！」宋千辰忽然將張櫈微微向郁咗一小步，嚇得梁玥嘉叫咗出嚟，宋千辰沒心沒肺咁喺度笑，梁玥嘉抬頭瞪住佢，「死人宋千辰！」





「好啦好啦，唔挽你啦！」宋千辰笑住講道，「我郁番前比你坐好啦。」

梁玥嘉不忘瞪了宋千辰一眼，雙手轉去㩒住宋千辰雙肩等宋千辰唔好亂郁；正當宋千辰打算將張櫈郁番前嘅時候，梁玥嘉剛好提起跪着跪左腳，張櫈忽然間自己又向後郁多一小步，今次真係唔係宋千辰搞鬼，故意郁後張櫈，而真係張櫈因為不穩而郁咗一郁

「喂！」因為梁玥嘉㩒住咗宋千辰嘅雙肩，宋千辰一向後郁，梁玥嘉就會跟住向後郁

梁玥嘉一下子好似邁步一樣，左腳一下子跨咗過去，跪喺宋千辰雙腿之間嘅空位，右腳踩咗落地，一時情急之下，梁玥嘉嘅左手一下子就繞到宋千辰嘅頸後，輕輕攬住宋千辰嘅頸




IG Link: https://www.instagram.com/nd_cotttocandy/?hl=zh-tw