［愛情純愛］由嗰一個Kiss開始，我地唔再係青梅竹馬: 30. 餘溫

梁玥嘉嘅手拎住啱啱著住嘅hoodies，感覺到上面有嚟自宋千辰殘餘嘅溫度，衫上嘅溫暖好似更多都係嚟自宋千辰；腰間彷佛仍然可以感覺到宋千辰攬住佢嗰陣嘅力度

宋千辰將碗豆腐花放咗喺書枱上面，佢喺廚房拎咗隻匙羹，番房坐低喺書枱前，將膠蓋掀起放喺一邊，食咗一啖；豆腐花凍冰冰的，雖然宋千辰只係落咗少量嘅黃糖，但係卻感覺到呢碗豆腐花嘅味道格外的甜，都唔知甜味係因為真係落咗糖嘅豆腐花，定係因為送呢碗豆腐花比佢嘅人

宋千辰回想起剛才好似好型咁樣一下子將梁玥嘉拉到自己懷中，的確，宋千辰只係以唔開心為名，想攬佢為實⋯當你對一個人嘅喜歡喺心中漫延至將友誼蓋過時，對方作出每一個舉動嘅原因都只不過係借口，只不過係借朋友嘅名義去拉近關係

宋千辰一個人匿喺房食嘢，忽然傳嚟「叩叩」兩聲嘅敲門聲

宋千辰望向門口時，門都已經打開咗，楊亦晟企喺門口行入房





「食緊宵夜呀？」楊亦晟笑笑口咁行到去宋千辰身旁，望到放喺書枱上嘅豆腐花，「有豆腐花食咁好呀？」

「呢個宵夜就冇你分啦～」宋千辰笑咗一笑，放低手機望向楊亦晟講道

「哎喲喲～食落去好冧呢？」楊亦晟企喺宋千辰身旁望住佢食嘢嘅樣

「咩呀～」宋千辰無奈咁笑道，抬頭望向楊亦晟時，忽然覺得好似忽楊亦晟睇穿咗一樣，默默地心虛一笑，「食嘢有嘢冧唔冧啫？」

「好啦好啦，唔笑你啦！」楊亦晟坐低喺宋千辰嘅床邊，「估下我買咗咩好嘢～」





「好嘢？」宋千辰望向楊亦晟，兩父子同時望一望向門口，「唔比得呀媽知㗎？」

楊亦晟冇出聲，只係笑一笑，兩個男人彷佛可以用心靈溝通咁，點一點頭，然後講嘢都細聲咗

「登登登櫈！」楊亦晟將聲量收細，喺外套入面拎咗一本新一期嘅One Piece漫畫出嚟放喺書枱上，「好彩比我買到。」

「係新一期！我搵咗好多間漫畫店都話賣晒，你點買到㗎！」宋千辰目瞪口呆地拎起漫畫掀開嚟睇

「唧唧唧⋯我識一間漫畫店嘅老闆，我叫佢留起㗎。」楊亦晟講道，「你唔好同呀媽講呀，陣間佢又話我買漫畫㗎啦！」





「佢唔會發現嘅，放喺書櫃度，佢唔覺多咗一本嘅，都咁多本啦！」宋千辰同楊亦晟好似做緊啲唔見得光嘅嘢咁，細細聲咁喺度講要放本畫喺邊度好

宋千辰同楊亦晟嘅關係亦父亦友，兩人嘅關係好好，興趣都差唔多，正如大家都中意睇One Piece一樣，比起父子更多嘅係以朋友嘅方式相處，宋千辰對楊亦晟亦會有應有嘅尊重

「你睇完借比我睇！」宋千辰對楊亦晟笑起嚟講道，一臉超感興趣嘅樣子

「好呀。」楊亦晟爽快地答應咗，企起身，「我番房先啦，你媽等緊我幫佢吹頭。」

「得啦。」宋千辰點一點頭，「早抖。」

楊亦晟笑了笑，喺出去嘅時候幫宋千辰將房門閂上，宋千辰好快咁將碗豆腐花都食晒，然後出房掉咗個膠碗

「飽晒～」宋千辰一臉滿足咁自言自語

另一邊廂，梁玥嘉食完糖水就番咗房，頹廢咁灘喺床上面睇手機





「千辰⋯」梁玥嘉嘅腦海中忽然浮出住喺隔離嘅男仔嘅名字

梁玥嘉一下踢起腿借力坐起身， 然後搖搖頭，拍拍自己嘅臉頰

「你亂諗啲咩呀！」梁玥嘉質問自己，雙手捧住臉頰，然後又細細聲咁對自己講，「只不過係攬咗一下咋嘛⋯」

腦海中頓時浮現出喺大半個月前同宋千辰kiss嘅事，梁玥嘉意識到自己講錯嘢，頓時灘番落床，將頭埋進枕頭中

「嗰個係初吻嚟⋯」梁玥嘉側住頭，臉頰痴住枕頭，但個身係趴喺床上，臉頰都因為梁玥嘉覺得羞澀而泛起紅霞，「就咁就比咗千辰⋯」

腦海中不斷浮現出嗰一日嘅片段，梁玥嘉趴喺床上用力咁踢腿，用力地攬住枕頭，簡直想搵個窿入去

「唔好再諗啦梁玥嘉！」梁玥嘉坐起身，以鴨子坐嘅方式坐喺床上，喺房入面大聲嗌度，然後拎起枕頭攬喺懷中，將臉埋進枕頭中，因為難為情所以細聲地講道，「只不過係錫咗一下⋯都錫咗啦⋯」





梁玥嘉嘅內心小鹿亂撞，臉頰都紅彤彤的

「以後喺宋千辰面前一定唔可以諗起！」梁玥嘉用力咁拍咗自己嘅臉頰一下，手輕輕地捧着臉頰，喺床上曲起雙腿坐，「到底我中意千辰啲咩⋯識咗咁多年、對咗咁多年，宜家先中意佢⋯係好事定壞事？」

放喺梁玥嘉身旁嘅手機螢幕亮咗一亮，梁玥嘉拎起手機望，本來已經閂咗嘅螢幕喺梁玥嘉拎起手機嘅一刻又亮起嚟，梁玥嘉望到手機嘅通知，臉上忽然掛上咗淡淡嘅笑容




IG Link: https://www.instagram.com/nd_cotttocandy/?hl=zh-tw