［愛情純愛］由嗰一個Kiss開始，我地唔再係青梅竹馬: 31. 甜品

宋千辰：多謝你碗糖水～

見到宋千辰send過嚟嘅WhatsApp message同附加一個微笑樣旁邊有三個心心嘅emoji，梁玥嘉不禁莞薾起嚟，嘴角就好似無法控制一樣自動上揚起嚟

「唔洗多謝～快啲讚我好人先啦～」

正當梁玥嘉打完準備send出去嘅時候，見到李穎容reply咗佢嘅IG story：「又話同我一齊睇嘅（哭哭）偷步！！！」

梁玥嘉喺覆咗宋千辰之後便轉過去IG覆李穎容道：「我聽日再同你講～」





宋千辰：我地嘉嘉最好人啦！最好係你啦！

梁玥嘉一見到宋千辰覆咗佢之後都唔等李穎容回覆，直接就轉咗過去WhatsApp版面睇宋千辰嘅message

「誇張啦你！浮誇！」梁玥嘉雖然係咁樣回覆，但係臉上嘅笑容卻收唔起

宋千辰：我講真㗎，你不嬲都咁好㗎啦～

宋千辰：最好係你





梁玥嘉睇到宋千辰send過嚟嘅message時心中很是高興，縱使佢唔知道宋千辰講嘅嘢係佢嘅真心話，梁玥嘉冇特別諗到宋千辰嘅內心係咪真係咁諗，但對呢一刻嘅梁玥嘉嚟講，即使宋千辰講嘅係假話都好，梁玥嘉都已經覺得好開心

「咁識講嘢呀？我見你唔開心先請你食咋」梁玥嘉回覆道

宋千辰：多得你碗豆腐花，我宜家Okay冇事啦～

「冇事咪好」梁玥嘉回覆道

宋千辰：宜家擁有嘅嘢先係值得嘛，其實我一直都知，一直都有做到





「何以見得？」梁玥嘉唔明白宋千辰想表達啲咩，只好直接問宋千辰，只見本來宋千辰係「Typing⋯」，但好快又轉番做「Online」，然後又變「Typing⋯」，之後再轉「Online」，然後再「Typing⋯」，再「Online」

「我咁珍惜你，你睇唔出㗎咩⋯？」宋千辰仰頭同時連同手機一同舉起，佢只係默默咁講道，「你話我要點覆你？」

之所以會一直喺「Typing⋯」同「Online」之間徘徊，只不過係因為宋千辰唔知要點樣覆梁玥嘉先啱

「唔話你知，你估下」最後宋千辰揀咗咁樣回覆

梁玥嘉望住宋千辰回覆過嚟嘅message，心中滿滿嘅疑問，梁玥嘉一下子灘番喺床上，側身瞓喺床上拎住手機，望住手機嘅螢幕

「唉⋯我想同你打破嗰個界限，但我又怕⋯」梁玥嘉喺心中講道同時手機嘅螢幕暗咗落去，就好似手機感應到佢嘅內心想法一樣，本來充滿期待，但又怕一旦將界限打破，兩人嘅關係真係會一去不復返

此時嘅手機螢幕又突然間亮起嚟，梁玥嘉本來放空着嘅雙眼都頓時回過神來

宋千辰：我一直都好珍惜你呀～唔覺咩？





梁玥嘉見到宋千辰傳嚟嘅message，雙眼不禁瞪大，甜絲絲嘅感覺㩒都㩒唔住，直接湧出嚟，臉上掛上甜甜嘅笑容

「唔覺」梁玥嘉嘅嘴角上揚着回覆道，心中嘅甜意真係要㩒都㩒唔住，「你幾時咁識講嘢㗎？溝女溝得多呀？」

宋千辰：痴線，你邊隻眼見到我成日溝女？我都唔溝女嘅～

「係咪呀～唔好講大話喎」梁玥嘉回覆道，心裏喜滋滋的，因為好耐都冇試過同宋千辰可以WhatsApp咁耐，平時都係一句起兩句止，最多頂盡五句

宋千辰：我唔講大話㗎，平時都係人地溝我，你知㗎

宋千辰咁樣一講，梁玥嘉即刻就諗番起上次幫宋千辰做場戲拒絕邱凱棠嘅事，梁玥嘉嘅心中有一刻真係懷疑過宋千辰係咪特登咁樣講起令佢回想起

「你唔好提起好嗎？」梁玥嘉喺呢句嘅最後加咗一個黃色嘅笑面月亮嘅emoji，「我唔想記起嗰件事⋯」





宋千辰：記起咩呀？你記起啲咩呀？你係指kiss嗰件事？

梁玥嘉見到宋千辰咁樣回覆佢簡直就要直接連人帶心臟爆炸，宋千辰仲要刻意提起；其實喺另一邊嘅宋千辰自己都仲好記得件事，只係佢想知梁玥嘉仲在唔在意、有冇記住

宋千辰：你仲咁上心，唔通你想再kiss多次？

「點解佢可以完全當冇事咁講出嚟㗎⋯！唔通得我先仍然記喺心？」梁玥嘉喺心中喃喃自語講道，然後佢打字回覆宋千辰：「唔想囉⋯」




IG Link: https://www.instagram.com/nd_cotttocandy/?hl=zh-tw