［愛情純愛］由嗰一個Kiss開始，我地唔再係青梅竹馬: 29. 我了解

「快啲落去買～」梁玥嘉雙手插喺外套嘅口袋裏，行到去升降機位置等嘅時候見到宋千辰已經企咗喺度，「咦？你喺度嘅？」

「我問你先啱，咁夜去邊？」宋千辰將梁玥嘉上下打量一番

「想食糖水咪出去買～」梁玥嘉一臉理所當然咁回答道，「咁你去邊？」

「出去行下咋嘛。」宋千辰聳聳肩講道

「唔開心呀？」梁玥嘉側着頭望住宋千辰問道



宋千辰冇答佢，默默地移開咗視線，將梁玥嘉對佢嘅了解，梁玥嘉知道宋千辰想迴避呢個問題，唔想作出回應

「一齊去買糖水呀！」梁玥嘉露出笑容對宋千辰講道，「反正你都冇特別打算去邊。」

梁玥嘉同宋千辰喺沿路上都冇講嘢，兩人都係雙手插喺外套嘅口袋中，宋千辰耷低頭望住地上嘅影子

夜深時分嘅街道都變得人煙稀少，只有小貓三四隻走過，四周圍嘅環境都變得格外寧靜，縱使附近有酒吧都好都焦法掩蓋呢份屬於夜晚吧寧靜

梁玥嘉去到糖水店門口停低，邁步踏上一級走進店內，企喺鋪頭嘅收銀處前叫外賣



「要三碗紅豆沙，一碗豆腐花，外賣。」梁玥嘉望一望企喺店外嘅宋千辰，然後對老闆講道同時比錢

自從今日見到宋彥濤之後，宋千辰嘅心情有啲沈重，提唔起勁嘅感覺；梁玥嘉行出糖水鋪，行到宋千辰面前，宋千辰抬眼望佢，梁玥嘉微微一笑

等咗一陣之後，梁玥嘉拎咗糖水外賣，一個普通嘅白色膠袋中放咗四碗糖水，最底放咗一張瓦通紙，然後放兩碗糖水，喺兩碗糖水上再放一張瓦通紙，然後再放兩碗糖水

宋千辰一直都冇出聲，梁玥嘉感覺到佢嘅唔開心

仲差一小段路就行到去屋企樓下嘅大堂時，梁玥嘉忽然行到宋千辰面前，臉上掛着微笑，宋千辰停咗落嚟望住梁玥嘉



「做咩？」宋千辰問梁玥嘉

「你唔開心呀？因為今日嘅事。」梁玥嘉故意問道，「你係咪因為見到叔叔所以唔開心？」

宋千辰聽到梁玥嘉嘅話，深呼吸一下，臉上掛上淡淡嘅笑容

「咁如果我話我係唔開心，咁又點？」宋千辰回答梁玥嘉

「咁唔好唔開心呀～」梁玥嘉微笑着回答，宋千辰聽到梁玥嘉呢個回答都唔知要比咩反應好，「宜家你擁有嘅先係值得你珍惜嘅事呀～過咗去就由得佢過去。」

「嗯⋯」宋千辰嘅臉上仍然掛住淡淡嘅笑容，佢點一點頭，然後伸手捉住梁玥嘉嘅手腕向自己身後拉，梁玥嘉因為宋千辰突然一拉而失重心向前行咗一步，跌入宋千辰嘅懷中

梁玥嘉郁都唔敢郁，因為宋千辰突如其來嘅舉動所以有啲愕然；宋千辰微微耷低頭，鼻息噴灑喺梁玥嘉嘅耳邊，聞到梁玥嘉嘅洗頭水香味，雙手喺梁玥嘉嘅腰後輕微搭着

梁玥嘉一手拎住裝咗外賣糖水嘅膠袋，另一隻手嘅指尖輕搭喺宋千辰嘅博頭上面，因為湊得好近，梁玥嘉聞到一陣從宋千辰身上傳嚟嘅氣味，一種清新嘅味道



「就借我攬一下⋯」宋千辰喺梁玥嘉嘅耳邊柔聲道，同平日嘅佢好唔一樣，而佢呢個擁抱亦係帶着一點私心嘅擁抱

梁玥嘉嘅心跳止都止唔住，心臟「咚咚、咚咚」地強烈跳動着，心臟好似會飛出嚟一樣

「千辰身上面嗰陣味好好聞⋯」梁玥嘉喺心中講道，「有淡淡嘅香味⋯」

宋千辰慢慢地收緊咗雙臂，梁玥嘉搭喺宋千辰博頭嘅手稍微捉緊咗宋千辰嘅衫，兩個人之間嘅距離又近咗少許

「有啲事過去咗唔代表冇發生過，亦唔代表我會唔記得⋯」宋千辰緩緩開口講道，喺佢開口嘅瞬間，梁玥嘉微微嘅雙肩顫抖咗一下，「不過你講嘅都啱，宜家擁有嘅先係值得珍惜嘅。」

宋千辰講完之後鬆咗手，朝梁玥嘉微微一笑，梁玥嘉睇得出佢未完全將佢嘅心事放低，但梁玥嘉冇再過問

「番去啦！」宋千辰笑了笑講道，然後直接喺梁玥嘉身邊走過



梁玥嘉企喺原地，身上仍然可以感覺到擁抱過後嘅餘溫；宋千辰回頭望向梁玥嘉，臉上掛上同平日一樣嘅微笑

「你仲唔行？想食風當食甜品呀？」宋千辰開玩微講道，梁玥嘉回頭望向宋千辰，笑咗一笑然後追上宋千辰嘅步伐

喺昏暗嘅燈光下，冇人留意到梁玥嘉嘅臉頰泛起咗淡淡嘅紅霞

當兩人番到去屋企門口時，梁玥嘉將碗豆腐花從膠袋中拎出嚟遷比宋千辰

「請你食，唔好唔開心啦⋯」梁玥嘉微微一笑講道

「多謝。」宋千辰輕輕一笑之後講道，「放心啦，我唔會同你客氣。」

梁玥嘉一入屋就將糖水放咗喺餐枱上，然後入房換衫，將呢套啱啱著出街嘅衫搭喺櫈背上






IG Link: https://www.instagram.com/nd_cotttocandy/?hl=zh-tw