［愛情純愛］由嗰一個Kiss開始，我地唔再係青梅竹馬: 28. 他討厭的人

梁玥嘉認得嗰個男人，嗰個男人係宋千辰嘅爸爸，再講清楚啲嘅話，係宋千辰嘅生父宋彥濤，宜家同宋千辰同一屋簷下嘅嗰個「爸爸」係宋千辰嘅繼父

「我地番去。」正當梁玥嘉想開口嘅時候，宋千辰嘅手微微往旁邊一捉，捉住咗梁玥嘉嘅手腕直接就往屋企嘅大堂行去

「千辰。」宋彥濤開口叫咗一聲，宋千辰停低腳步，「咁耐冇見，唔打個招呼？」

宋千辰向宋彥濤望去，收起咗剛才同梁玥嘉一齊挽嗰陣嘅笑臉，臉上一啲笑容都冇，朝宋彥濤瞪咗一眼之後就直接拉住梁玥嘉行入大堂

⋯



夜晚9：38

兩人已經各自番到屋企幾個鐘，都已經食完晚飯，梁玥嘉正灘喺床度煲緊劇，腦海中忽然諗起喺屋企樓下見到宋彥濤

「叔叔過嚟呢度做咩？」梁玥嘉心諗，「千辰好似好嬲⋯」

梁玥嘉望向自己嘅手，記起今日宋千辰喺見到宋彥濤之後捉住佢行嘅時候嘅力度，用力到好似要將佢嘅手腕捏碎一樣

宋千辰嘅生父宋彥濤，喺宋千辰7歲嗰年已經離開咗呢個屋企，後來宋千辰嘅媽媽識咗現任老公後再嫁，宋千辰嘅繼父楊亦晟對佢地好好，宋千辰亦接受咗繼父嚟到呢個家庭⋯宋千辰對宋彥濤嘅恨難以消去，喺宋千辰童年時，宋彥濤會對宋千辰又打又鬧，宋千辰嘅反抗只會為佢帶嚟更悽慘嘅下場，宋彥濤係一個會對家人家暴嘅爸爸，一個唔稱職嘅丈夫⋯



宋千辰灘喺床上面，諗起今日見到宋彥濤，腦海中閃出從前嘅片反段

「你唔好再打個仔啦！你再打就要打死佢啦！」

「唔聽話就要打！你死開！」

「呀！」

「媽媽！嗚⋯」



「唧⋯」宋千辰唧咗一聲，然後坐起身，落去行去書枱前面拉開櫈坐低喺枱前

宋千辰拎起手機打開snapchat，send咗一個snap比同佢儲火嘅人，第一個回覆嘅係梁玥嘉，佢影住佢部iPad，圖中間放咗宜家嘅時間

「又煲劇！」宋千辰喺snapchat回覆梁玥嘉，然後又喃喃自語道：「都估到你㗎啦⋯」

宋千辰放低手機喺一邊，朝放喺書枱左邊嘅桌上三層抽屜伸手，拉開右上角嘅小抽屜，拎咗一條已經有輕微變黃嘅藍白幼手繩出嚟，本來嚴肅嘅表情有了一絲緩和，露出淡淡嘅笑容，送出手繩嘅人就係梁玥嘉，或者梁玥嘉一早就唔記得呢條手繩嘅存在，但呢條手繩宋千辰一直都有keep住

「你隻手做咩瘀晒嘅？又比叔叔打呀？」年幼嘅梁玥嘉留意到宋千辰手上一塊青一塊紫嘅瘀傷

「嗯⋯」年幼嘅宋千辰點一點頭，臉上一絲笑容都冇，「琴晚我聽到媽媽話要同佢離婚，話唔再忍佢⋯」

「咁咪好囉！以後冇人打你啦！」梁玥嘉微微一笑講道，「可能會有一個更好嘅人錫你地呢～」

「嗯⋯」宋千辰點一點頭



「嗱！送比你呀！」梁玥嘉喺裙袋入面拎咗一條繩出嚟遞比宋千辰，「唔好唔開心啦！以後都冇人打你啦！」

「咩嚟㗎？」宋千辰接過條手繩

「手繩呀！我織㗎！靚唔靚呀？」梁玥嘉笑了笑問道

「嗯⋯多謝⋯」當下嘅宋千辰其實覺得條手繩唔靚，因為佢唔太中意藍色，但既然係人地送嘅，佢都唯有話靚

宋千辰望住條手繩，宜家都已經戴唔落啦，因為手都已經粗咗，唔係好似小朋友咁細隻，宜家呢條手繩放喺宋千辰嘅心中上，比佢嘅手心仲細啲

「其實都幾靚⋯」宋千辰拎住條手繩，嘴角微微上揚同時細聲地講道

宋千辰將條手繩小心翼翼地放番入去抽屜中，然後著咗件外套，換咗條褲打算出去行一下散一散心



「想食糖水添⋯」梁玥嘉從床上坐起嚟，腦海中有陣陣糖水香味飄過

梁玥嘉二話不說換咗套衫，著咗件外套然後行出廳

「我想食糖水，我出去買，你地食唔食？」梁玥嘉喺佢爸媽開口問佢去邊之前先講道

「食！」梁媽媽即刻講道，「照舊紅豆沙～」

「爸呢？」梁玥嘉邊著鞋邊問坐喺梳化睇電視跑梁爸爸

「一樣。」梁爸爸講道

梁玥嘉將鎖匙放褲袋，銀包放喺外套左邊嘅口袋，手機放喺外套右邊嘅口袋，袋都唔洗拎就出得門口






IG Link: https://www.instagram.com/nd_cotttocandy/?hl=zh-tw