［愛情純愛］由嗰一個Kiss開始，我地唔再係青梅竹馬: 27. 一起長大真好

上到巴士之後，梁玥嘉合起雙眼，因為啱啱睇戲嘅時候喊過嚟，雙眼覺得好攰

兩個人好安靜，宋千辰自己喺度睇手機，梁玥嘉合起雙眼休息，兩人都冇出聲，自己做自己嘢

梁玥嘉嘅雙手輕輕拎住手機放喺打平放嘅書包面上，雙眼嘅倦意令佢覺得整個人都倦意滿滿，喺安靜嘅環境下要入睡就變得更輕易

宋千辰嘅雙眼一直都望住手機，佢習慣咗機不離手，書包放喺大腿上，雙腿一直望住喺螢幕中嘅內容，IG又好Facebook都好，佢都已經睇過晒

「呼⋯陣間番去要沖個涼先⋯」宋千辰鎖咗手機螢幕同時喺心中講道，「我都有啲眼瞓⋯」





宋千辰忽然感覺到有一下重力令佢嘅左邊博頭墜咗落去，宋千辰望向左邊，見到梁玥嘉靠喺佢嘅博頭上瞓咗，宋千辰微微一笑，然後抬起頭望向前方，佢冇對梁玥嘉做任何舉動，只係由得佢瞓

過咗一陣之後，宋千辰不自覺地望向梁玥嘉，佢將動作放輕，希望唔會整醒梁玥嘉，佢默默地望向梁玥嘉，眼神裏夾雜咗平日唔會見到嘅溫柔

比起梳起清爽馬尾嘅梁玥嘉，宋千辰更加中意散髮嘅梁玥嘉，梁玥嘉一頭長髮，髮尾有啲自然卷，平日番學都係以all back示人，喺兩邊額角都有髮圈綁唔到嘅瀏海，本來嘅梁玥嘉就係斜瀏海，佢唔札頭髮嘅話係明顯嘅6:4分界，不過all back將分界都蓋過咗

宋千辰偷偷地打開咗相機，將手機調咗做靜音，將相機轉咗做前置鏡頭；宋千辰將頭微微側着，輕輕靠住梁玥嘉嘅頭，一湊近就可以聞到有洗頭水嘅香味，佢偷偷地影咗一張相，畫面中有三分之二都係梁玥嘉，宋千辰自己只佔咗三分之一

宋千辰一影完就即刻將手機鎖屏，然後將手機塞番入褲袋，宋千辰望向窗外，今日嘅街景好似比平日好睇，明明同平時一樣，但唔知點解今日嘅街道風景睇起嚟格外好睇





「醒啦。」宋千辰拍一拍梁玥嘉嘅手背將佢叫醒，梁玥嘉緩緩睜眼，坐好起嚟

「到啦？」梁玥嘉望向車窗外確定一下去到邊

「差唔多到啦。」宋千辰講道

當前面嘅交通燈由綠燈跳轉成橙燈再轉做紅燈時，巴士緩緩停低，宋千辰孭起書包然後行出位置，坐喺窗邊嘅梁玥嘉都企起身跟喺宋千辰嘅身後行出去準備落番下層

窗千辰一隻手捉住扶手，另一隻手從褲袋裏拎出手機，又開始睇手機；梁玥嘉落到下層，企喺宋千辰隔離，仲未完全從睡意中清醒過嚟嘅佢打咗個呵欠，巴士駛到站嘅時候因為剎車而晃咗一晃，梁玥嘉企得唔太穩然後自然地伸手捉住宋千辰捉住扶手嘅前臂





宋千辰瞄咗梁玥嘉嘅手一眼，嘴角微微上揚，但上揚嘅角度好細，唔刻意去留意嘅話唔會留意到佢笑

車門打開，宋千辰先落車，佢行到去行人路上時停低咗等埋梁玥嘉，而唔係直接就行咗去等梁玥嘉追上佢嘅步伐；梁玥嘉輕輕一跳落咗車，就好似小朋友一樣偏偏唔行落去要跳落去，梁玥嘉帶着小跳步行上行人路

「喂喂⋯」梁玥嘉拍一拍宋千辰，然後行到宋千辰面前，直勾勾地望住宋千辰，「我隻眼仲腫唔腫呀？」

宋千辰雖然臉上沒表情，但心臟已經演奏緊激烈嘅進行曲，佢望住梁玥嘉嘅雙眼

「冇啱啱咁腫。」宋千辰努力咁壓抑住內心嘅波濤洶湧，努力地擺出平靜嘅樣子

「如果番到去我媽問我隻眼做咩咁紅咁腫嘅話，我會同我媽講你恰我。」梁玥嘉轉身就行，宋千辰行番去梁玥嘉身旁

「我都冇。」宋千辰望向梁玥嘉，「講大話係唔啱㗎。」

梁玥嘉抬頭望向宋千辰，笑咗一笑，宋千辰無奈咁笑咗一笑





喺宋千辰眼中，梁玥嘉有時會好似一個小朋友咁，但有時又好正常，有時好成熟咁，宋千辰心中有時都有啲興幸，可以成為梁玥嘉嘅青梅竹馬，同佢一齊長大

「呀！」梁玥嘉忽然叫咗一聲，原來宋千辰捏住佢嘅臉頰，「li做咩me我呀！（你做咩摵我呀！）」

「你話我恰你嘛，我宜家就真係恰你啦！」宋千辰小惡魔般笑道，捏住梁玥嘉嘅臉頰，「等你番去告狀呀！」

「宋千辰！你又恰我！」梁玥嘉捉住宋千辰嘅手腕，然後好似小朋友咁嗌道，「我要番去話比媽咪聽！」

「哼！理得你呀！」宋千辰一鬆手就即刻向前跑，「拜拜啦梁玥嘉！」

「喂！」梁玥嘉喺原地呆咗一秒之後先跑起嚟追上宋千辰，「仲捉你唔到！」

梁玥嘉一下子跑上前想捉住宋千辰嘅書包時，宋千辰忽然停咗落嚟直望住前方嘅馬路，梁玥嘉跑上前捉住宋千辰嘅書包





「捉到你啦～」梁玥嘉笑着探頭望向前面，抬頭望宋千辰，卻見宋千辰忽然一臉嚴肅咁直視前方，梁玥嘉都未搞清楚狀況，佢只好循著宋千辰嘅視線望去，見到有一個身材高大、西裝筆挺嘅男人正走向宋千辰

梁玥嘉都呆咗一呆，然後望向宋千辰，宋千辰仍然一臉嚴肅咁直視前方




IG Link: https://www.instagram.com/nd_cotttoncandy/?hl=zh-tw