［愛情純愛］由嗰一個Kiss開始，我地唔再係青梅竹馬: 26. 最悲傷的事是⋯？

宋千辰冇出聲，只係默默企喺梁玥嘉身旁

梁玥嘉拎住手鐲睇咗一陣又思考咗一陣之後，最終都係將手鐲放低，然後拎出手機睇一睇時間

「差唔多夠鐘啦，我地上番去戲院啦～」梁玥嘉抬頭望住宋千辰講道

梁玥嘉轉身就走，宋千辰跟喺梁玥嘉身後行，將手機塞咗入褲袋

兩個人上到戲院時都已經可以入去，兩人搵到自己個位之後坐低，將書包除咗落嚟放喺大腿上面





梁玥嘉拎出手機，開咗IG，影咗前面嘅大銀幕，打上caption：「臨時睇戲～」後面再加上一個爆谷嘅emoji，然後就po咗出story

宋千辰朝梁玥嘉伸出手，示意拎番佢自己張戲飛，梁玥嘉喺遞咗其中一張比宋千辰，宋千辰將張戲飛放咗入銀包

⋯

「我是一個人。」當Cream講完呢句之後，佢同K兩人間忽然有一種講唔出嘅尷尬

梁玥嘉偷偷地捉緊放喺大腿上嘅校褸，當K同Cream kiss起嚟嘅時候，梁玥嘉同宋千辰都不約而同地覺得感覺怪怪的，然後偷偷移開咗視線一陣





梁玥嘉簡直就覺得自己嘅臉頰發滾，但好彩喺電影院入面漆黑一片，宋千辰唔會見到佢臉紅，事實上宋千辰早就移開咗視線，冇望住銀幕，因為宋千辰自己都忽然間覺得有一種尷尬嘅感覺喺心底湧出嚟，佢更加唔會望向梁玥嘉

「到底點解我要同千辰嚟睇呢套戲⋯？」梁玥嘉喺呢個時候先問自己，佢緊緊地捉住校褸，雙眼望住銀幕

宋千辰則係將手放喺佢同梁玥嘉之間嘅扶手上托住頭繼續睇

去到電影中段，由Cream發現咗K刻意收起嘅秘密開始，梁玥嘉嘅雙眼慢慢地變得水汪汪的；去到中後段時，當開始出現K同Cream嘅個人獨白時，梁玥嘉嘅淚水都已經喺眼眶中打轉

宋千辰偷偷地瞄向梁玥嘉，見到梁玥嘉雙手攬住件校褸，頭微微耷低，宋千辰見到咁樣嘅梁玥嘉，心中有一股保護欲湧出嚟，宋千辰喺褲袋入面拎咗包紙巾然後遞比梁玥嘉





梁玥嘉望到宋千辰遞比佢嘅紙巾便接過，拎咗一張，抹一抹眼淚

K以Cream唯一嘅家人嘅身份帶住Cream步入禮堂，背景並唔係結婚進行曲，而係兩人以前嘅對話⋯

「人為什麼要結婚呀？」Cream問

「當你老的時候，或者是需要被照顧的時候，那個人可以理直氣壯地一直陪在你身邊。」K答

梁玥嘉緊緊地捉住校褸，抽抽鼻子，眼淚喺眼眶滲出嚟⋯就好似坐喺一旁觀禮、知道K嘅病情嘅人，什至好似著住純白婚紗嘅Cream一樣，心痛着K

K帶住Cream行到去新郎嘅面前，將Cream嘅手交比新郎然後轉身離開，梁玥嘉同埋同場嘅人一樣，眼淚都止唔住，無法控制地流出嚟

梁玥嘉偷偷地望向宋千辰，見到宋千辰一副專心嘅模樣睇戲，正睇得入神；宋千辰稍微坐好，雖然佢冇因為呢套戲而流淚，但佢心中都係比呢套戲打動到

「如果有一日要將嘉嘉交比第二個⋯」宋千辰偷望咗梁玥嘉一眼，然後又再望向螢幕默默地諗，「我諗我會喺佢中意第二個之前，先話比佢知我中意佢⋯」





宋千辰聽到從隔離位傳嚟嘅抽鼻子聲，視線再一次落喺梁玥嘉身上，宋千辰心中好想伸手一下子就將梁玥嘉攬住，輕輕地攬住佢、安慰佢，但佢知道，佢唔可以⋯佢要保持住佢同梁玥嘉嘅關係，佢就唔可以做呢個舉動⋯本來輕輕抬起咗嘅手，默默地放番低

當電影播緊片尾時，電影院內嘅燈慢慢亮起，梁玥嘉喊到兩隻眼都紅紅腫腫的，宋千辰拎起手機，打開相機，然後伸手輕輕地拍一拍梁玥嘉嘅博頭，喺梁玥嘉望住佢嘅時候，「咔嚓」一聲，將呢一刻喊到眼睛紅腫嘅梁玥嘉做咗一個記錄喺手機中

「喂呀！」梁玥嘉喊到回不過氣一樣，又喊又笑咁伸手打宋千辰

「快啲著番件嬲啦！」宋千辰見到梁玥嘉又喊又笑嘅樣子都不禁笑起嚟，企起身著番校嬲同孭番書包

「你又笑我⋯！」梁玥嘉企起身拎起校褸著上身，然後拎起書包孭番好，「行得啦！」

「你唔好再喊啦，陣間其他人以為我恰你。」宋千辰同梁玥嘉並肩而行，佢一望到梁玥嘉雙眼喊到又紅又腫嘅樣子就忍唔住笑

「你成日都恰我㗎啦！」梁玥嘉抽抽鼻子講道，「淨係識得恰我！」





「淨係識恰你就唔會喺度同你睇戲啦！」宋千辰無奈咁講道，「行啦！搭巴士番去啦！」

「呿⋯」淨玥嘉細細聲咁呿咗一聲，手中仍然拎住宋千辰比佢嗰包紙巾

梁玥嘉悄悄地將紙巾收入口袋，然後望咗宋千辰一眼，嘴角偷偷揚起




IG Link: https://www.instagram.com/nd_cotttoncandy/?hl=zh-tw