［愛情純愛］由嗰一個Kiss開始，我地唔再係青梅竹馬: 25. 獨處

「咦！真係㗎？」梁玥嘉一下子捉住宋千辰嘅右手望向手機嘅螢幕，整個人都湊得好近好近，「我想睇呀！好想睇好想睇！淨係睇個預告片都覺得好虐心⋯」

「個戲名都寫明咗叫《比悲傷更悲傷悲傷的事》啦⋯」宋千辰嘅雙眼一直望住梁玥嘉捉住自己嘅手，視線由佢嘅手默默地移到梁玥嘉嘅臉上，梁玥嘉笑得好開心

「你約李穎容佢地睇囉～」「宜家有冇場呀？」「吓！？」

梁玥嘉完全無視咗宋千辰嘅說話，直接拎出自己嘅手機睇下宜家呢個鐘數有冇場，宋千辰吓咗一聲，上一秒佢仲懷疑係咪自己聽錯，但見梁玥嘉已經拎咗手機出嚟睇場次

「你諗住宜家睇呀？」宋千辰問道



「係呀～宜家就去買飛睇！」梁玥嘉興奮咁講道，睇睇下場次嘅時候梁玥嘉抬起頭望向宋千辰，「你有嘢做咩？你都冇嘢做㗎啦～」

「你都睇緊場次啦，仲問我做咩？」宋千辰一臉無奈咁望住梁玥嘉，但心裏卻有一絲開心嘅感覺閃過，「有冇場呀？」

「有呀！有4點50分嘅場！我地快啲過去戲院買飛啦！」梁玥嘉拉住宋千辰跑起嚟

「仲有一個鐘，你洗唔洗咁急呀？」宋千辰雖然口係咁講，但係心裏卻好開心，因為梁玥嘉拉住佢跑起嚟宋千辰喺心中講道：「算啦，嘉嘉對自己感興趣嘅嘢係心急啲㗎啦～」

梁玥嘉心中冇特別諗到啲咩，佢唔係因為中意宋千辰所以先有咁跑舉動，換句說話講梁玥嘉唔係故意做出咁嘅舉動，只係好似平常一樣嘅舉動行為



梁玥嘉拉住宋千辰去到巴士站，此時啱啱好有車，梁玥嘉興奮咁上咗巴士嘅上層，宋千辰行喺後面見到梁玥嘉嘅興奮，嘴角都悄悄地揚起

兩人喺戲院外嘅商場門口落車，梁玥嘉一把拉住宋千辰，小跑着跑入商場，搭電梯上到最頂層去到戲院，拉住宋千辰去到售票處停低

「唔該，兩張《比悲傷更悲傷悲傷的事》，4點50分。」梁玥嘉一邊講嘅同時，宋千辰喺佢身後拎出咗銀包

「銀幕喺呢邊。」企喺售票處嘅員工講道

「坐邊好呀？」梁玥嘉回頭望向宋千辰



「睇你。」宋千辰都唔係太在意坐邊，只要係坐喺梁玥嘉隔離，坐邊都冇咩所謂，「你揀啦，中間囉～」

「K5、6啦～」梁玥嘉講完之後，電腦螢幕就轉咗去付款嘅版面

「4點50分《比悲傷更悲傷悲傷的事》，學生飛兩張，$100。」員工重複一次，宋千辰直接遞出$100，然後員工喺旁邊嘅printer中拎咗兩張戲飛出嚟，「入場出示學生證。」

「唔該。」梁玥嘉接過戲飛，然後喺銀包入面拎咗$50比宋千辰，「宜家仲有啲時間，去邊度好？」

「我都話㗎啦，宜家仲有半個鐘呀⋯」宋千辰一臉無奈咁接過張$50然後放入銀包，「你洗唔洗買嘢食呀？去買嘢食囉，行下囉～」

「唔洗買嘢食，但想買嘢飲⋯」梁玥嘉將戲飛放喺銀包，微微嘟起小嘴

「陣間入場之前先買嘢飲啦！」宋千辰邊行邊講道，梁玥嘉將戲孤放好之後將銀包塞番入褲袋，「行下先啦宜家，仲有成半個鐘～」

梁玥嘉同宋千辰先離開戲院，搭電梯落咗一層，去咗樓下一個大型書店行下，嗰度有文具有書，梁玥嘉偶爾喺一個人出去行下嘅時候都會嚟呢度行下，對梁玥嘉嚟講呢個佔咗兩層嘅大型書店係佢熟悉嘅地方



書店總其有四個入口，上層兩個，下層兩個，梁玥嘉同宋千辰喺上層嘅其中一個入口行入去，一踏入書店就聞到淡淡嘅薰衣草味，呢種香味同書店中嘅書卷味好夾，喺前面嘅其中一個貨架上放着各式各樣嘅香薰；喺書店入面其實唔係只係書同文具，正確嚟講係佢仲有其他嘢賣

宋千辰行喺梁玥嘉身後，兩人隨處逛逛，梁玥嘉行到去賣文具嘅地方停咗落嚟，拎起筆望下然後又放低，之後又拎起另一枝筆睇

宋千辰則企喺梁玥嘉對面嘅陳列架前，各自睇唔同嘅嘢，宋千辰不經意抬起頭，見列梁玥嘉臉上掛上淡淡嘅笑容時，宋千辰都不自覺都揚起了嘴角

「睇筆都咁開心⋯」宋千辰喺心中講道，佢見到梁玥嘉開心，心裏都默默地覺得高興

「喂！」梁玥嘉將筆放番喺筆架入面，然後走向宋千辰，指住遠處，「我去嗰邊睇下。」

梁玥嘉講完之後就徑自地行咗過去，喺行到啱啱指住嘅地方時停低，梁玥嘉企喺一個賣飾品嘅小檔前面，拎起一條設計簡約嘅銀色手鐲，喺手鐲中間有一粒瑠璃紺色嘅珠子吊落嚟，喺旁邊有數顆白色透明嘅小珠子，每粒小珠子之間有一粒細細嘅銀色固定珠；手鐲嘅末端一邊係一個中空圓形，另一邊係一個U型勾

「好靚呀⋯」梁玥嘉拎起手鐲睇，喺心中不禁講道，此時宋千辰行到過嚟，企喺梁玥嘉嘅身旁，望住佢一臉想買嘅表情






IG Link: https://www.instagram.com/nd_cotttoncandy/?hl=zh-tw