［愛情純愛］由嗰一個Kiss開始，我地唔再係青梅竹馬: 19. 他身旁的位置

「楠恩同張子萊都未到呀？」梁玥嘉望向戲院門口

「嚟啦佢地。」企喺梁玥嘉旁邊嘅李穎容見到喺戲院門口行緊過嚟嘅楊楠恩同張子萊

楊楠恩一行到入戲院走向佢地嘅時候，先望咗宋千辰一眼，然後又望一望梁玥嘉

「嗨～」楊楠恩行到去嘅同時瞬間露出笑容

「嗨！」梁玥嘉同李穎容望向楊楠恩打招呼





楊楠恩帶着少許嘅期待，悄悄地望向宋千辰，但宋千辰顧住睇手機，完全冇留意到楊楠恩

「幾號院？」張子萊問拎住飛嘅梁玥嘉

「5號。」梁玥嘉講完之後望向喺影院入口示意可進入嘅院號，「入得啦～」

佢地數人拎住學生證同飛朝企喺入口號工作人員行去

梁玥嘉行喺宋千辰身後，楊楠恩行喺梁玥嘉隔離





「玥嘉，我同你坐得唔得？」楊楠恩挽住梁玥嘉嘅手臂

「可以呀～」梁玥嘉微微一笑講道

入去影院嘅時候，楊楠恩行咗喺梁玥嘉前面，行喺宋千辰身後，入去影院搵到佢地坐嗰行，一排行入去坐低，最右係霍思傑，最左係李穎容

「嘉嘉，個嘢飲擺你嗰邊定⋯」宋千辰以為喺佢隔離嘅係梁玥嘉便自然地講，一望過去嘅時候發現喺佢隔離嘅係楊楠恩時即刻窒咗一窒，冇再講落去

「玥嘉喺呢邊⋯」楊楠恩嘅笑容都跟住窒咗一窒，然後假裝若無其事，好似平常一樣自然咁講道





「嘉嘉你唔係同我share咩？」宋千辰指住放喺佢手邊嘅飲品托中嘅汽水

「呀，係喎！」梁玥嘉好似忽然醒覺過嚟一樣，記得佢話咗同宋千辰share汽水，因為佢怕自己飲唔晒

「你同嘉嘉調一調位得唔得？」宋千辰望向楊楠恩，楊楠恩本來掛喺臉上嘅微笑慢慢地僵住咗

「哦好呀～」楊楠恩假裝唔介意，微微笑咁講道，然後起身同梁玥嘉調位

「仲以為你唔飲汽水添～」宋千辰喺梁玥嘉拎起放二人中間嘅汽水時講道，梁玥嘉冇答，只係默默地飲咗一啖，然後反咗一下白眼

楊楠恩望住兩人，收起咗本來喺臉上嘅微笑，然後安靜地耷低頭，靜待電影開始

電影開始，影院內好安靜，一啲光都冇，本來黑色嘅螢幕忽然彈出畫面，播出「I’m around you」嘅熟悉片頭，然後播出電影製作公司嘅logo片頭

電影一直播放，忽然安靜落嚟嘅一幕營造緊張氣氛，喺電影中突然出現嘅微細聲音，就算只係水流過嘅聲音都令人感覺到不寒而慄





就喺鏡頭忽然一轉，一個人靜靜地企喺牆角，用充滿怨恨嘅眼神直盯鏡頭時，梁玥嘉自然地一下子伸手用力地捉住宋千辰嘅前臂，連帶宋千辰都不禁嚇咗一嚇，梁玥嘉整個人震咗一下

「滴答⋯滴答⋯滴答⋯」

每當喺積火喺水管上嘅水珠滴下，滴到地上嘅水窪時，企喺牆角嘅男人手拎住沾滿血水嘅菜刀行近一步

宋千辰感覺到前臂有啲痛，梁玥嘉嘅右手緊緊地捉住佢嘅前臂，衫袖都皺埋一齊，另一隻手遮住眼，但手指冇完全合上，留有少少縫

宋千辰喺梁玥嘉冇留意嘅時候瞄咗佢一眼，向下望時見到梁玥嘉捉住自己嘅手，嘴角不自覺地微微上揚，然後視線又移番去大螢幕上

楊楠恩其實都有啲驚，佢同梁玥嘉一樣遮住眼，但佢係用雙手遮住，喺用雙手遮住雙眼嘅時候，佢偷偷地望向梁玥嘉，見到梁玥嘉捉住隻手捉住宋千辰，心中羨慕又妒忌

喺電影完結嘅時候，宋千辰因為後來覺得熱所以將衫袖推高咗，當戲院嘅燈一開，宋千辰望向自己嘅手臂





「梁玥嘉你睇下你嘅傑作⋯」宋千辰朝企起身嘅梁玥嘉伸出前臂，佢嘅前臂紅晒

「對唔住囉～」梁玥嘉望到宋千辰隻手之後笑道，然後移喺楊楠恩身後行番出去，「我冇心㗎～」

「痴線，紅晒囉我隻手！」宋千辰將衫袖拉番落嚟

佢地幾個行到出去5號院外面，行到去入口處，落咗幾級樓梯，去番戲院嘅入口

本來打算一齊食埋宵夜先番屋企，但因為大家都話唔係特別肚餓，所以最後決定各自番屋企

「我地搭巴士番去，你去搭咩車？」梁玥嘉指一指宋千辰，然後問其他人

「都係巴士㗎啫～」霍思傑笑了笑講道，望向張子萊並且用手肘撞咗佢一下，「張子萊你應該都係巴士㗎啦！」

「係。」張子萊點一點頭





「穎容同楠恩呢？」梁玥嘉望向李穎容同楊楠恩




IG Link: https://www.instagram.com/nd_cotttoncandy/?hl=zh-tw