［愛情純愛］由嗰一個Kiss開始，我地唔再係青梅竹馬: 20. 為什麼要吃醋？

「一樣啦～大家都係住嗰邊，只係唔同站落車啫～」李穎容笑道，「行啦！」

佢地一大夥人一齊行去巴士站等巴士，大家都係各自耷低頭睇手機，梁玥嘉睇睇下手機，突然彈出一項通知

李子迪：喂喂！你份news cutting做完未？我仲未做，send比我！

楊楠恩眼尾瞄到梁玥嘉同人WhatsApp緊便湊過去，下巴靠喺梁玥嘉嘅肩上，好熟絡一樣靠近梁玥嘉

「邊知呀？」楊楠恩望住梁玥嘉嘅手機螢幕問道，梁玥嘉望一望楊楠恩，正常答嘅時候楊楠恩先開口，「李子迪？原來你同李子迪都熟㗎？」



「Okay啦，之前坐前後，所以咪熟。」梁玥嘉笑了笑，然後回覆李子迪：「番到屋企先send比你，喺街」

楊楠恩刻意地瞄咗宋千辰一眼，但宋千辰冇咩反應，仍然係企喺度睇手機，完全冇在意嘅意思

「你個青梅竹馬唔會呷醋呀？你同第二個男仔咁熟。」楊楠恩行到梁玥嘉嘅面前，開玩笑般講道，順道望向宋千辰

梁玥嘉望向宋千辰，宋千辰聽到楊楠恩嘅說話時都抬起頭

「你會呷醋咩？」梁玥嘉側側頭望宋千辰，湊近咗一步，直勾勾地望住宋千辰



「呷咩醋？你又唔係我女朋友⋯」宋千辰望向梁玥嘉一臉無奈咁講道，然後望向楊楠恩，心中覺得佢莫名其妙，「個個都有異性朋友㗎啦，冇呷醋嘅意義。」

楊楠恩因為宋千辰嘅回答而感到意外同愕然，佢亦冇再出聲，只係望住梁玥嘉同宋千辰嘅互動，心中都覺得唔自在，兩個人好親近，明顯地

巴士駛到站停低，佢地上到巴士嘅上層搵位坐低，先啱啱坐低，梁玥嘉嘅手機就響

「喂，媽？」梁玥嘉接通電話，「睇完啦，宜家番緊嚟⋯有呀，同千辰一齊番嚟，嗯⋯嗯⋯好啦，拜拜～」

「阿姨問你番去未呀？」宋千辰喺梁玥嘉收咗線之後問



「係呀，我唔記得同佢講睇到幾點，所以佢打過嚟睇下我睇完戲未。」梁玥嘉將手機放入褲袋，然後望向車窗外，一言不發

其他人都閒聊一下，講下平常事，只有梁玥嘉冇出聲

「玥嘉唔出聲嘅？」李穎容探頭望向前面嘅座位問道

本來打側坐嘅宋千辰略頭望向梁玥嘉，見到梁玥嘉一副疲倦嘅模樣，臉上冇笑容，雙眼好似就嚟合埋咁

「佢眼瞓啦⋯」宋千辰望向李穎容講道

「番到去早啲休息囉～反正聽日星期日～」李穎容笑了笑道

「我肯定佢唔會，番到去沖個涼就開始煲劇，冇2點都唔會瞓。」宋千辰無奈地笑了笑，佢太了解梁玥嘉啦

「好清楚喎～」霍思傑又開始想挪揄一番，揚起嘴角露出一個玩味重嘅笑容，「唔知仲以為你地一齊住添～」



「哦～」張子萊又開始同霍思傑一唱一和咁

「係呀係呀，不過隔咗一道厚牆囉！」宋千辰無奈咁笑，和應佢地般講道

「你兩個真係小學雞嚟⋯」李穎容都沒好氣地笑起嚟，搖搖頭，「你兩個成日咁講，陣間講到佢兩個真係一齊咗就真係好笑啦～」

宋千辰聽到李穎容咁講，心裏頓時就窒咗一窒，下意識陪笑起嚟，縱使佢知道李穎容冇可能睇得出，什至知道佢中意梁玥嘉，但內心都係會瞬間窒一窒

「咁到時佢就要多謝我地啦～幫咗佢咁大嘅忙～」張子萊對李穎容講，然後望向宋千辰，「到時記得請我地食飯！」

「請埋我地去飲。」霍思傑笑住請道

「如果係嘅話，我到時真係多謝你兩個，已經對咗佢十七年，比你兩個搞到下半生都要對住佢⋯」宋千辰無奈咁講道，但心裏卻有一點點高興，心跳喺冇人知曉嘅情況下默默加速



「醒啦梁玥嘉。」宋千辰望向巴士內嘅到站顯示器，一手伸手去㩒鐘，另一隻手拍醒梁玥嘉，「落車啦。」

「嗯⋯」梁玥嘉一臉睡眼惺忪嘅模樣，跟喺宋千辰嘅身後行出去

「拜拜～」大家同佢地道別，因為佢地最先落車，梁玥嘉同宋千辰都有回頭望向大家同大家揮揮手講拜拜

兩人行落樓梯落番下層，行喺前面嘅宋千辰先落到下層，企喺下層捉住扶手，梁玥嘉整個人仍然被倦意籠罩住，行路都左搖右擺企唔穩

梁玥嘉落最後一級，踏到下層嘅地面上時剛好停車，成架車都晃咗一晃，梁玥嘉企唔穩地向左邊行咗兩小步，宋千辰伸手捉住梁玥嘉嘅手腕扶佢一下，等到車停定咗之後，宋千辰先鬆開手

兩個人一同落車，梁玥嘉嘅雙手插喺hoodies嘅衫袋中，行路時步伐都因為疲倦而變得沉重，宋千辰同梁玥嘉一樣雙手插住喺hoodies嘅衫袋中繼續向前行，但唔一樣嘅係宋千辰仍然好精神，但係梁再嘉已經攰到想原地瞓著






IG Link: https://www.instagram.com/nd_cotttoncandy/?hl=zh-tw