［愛情純愛］由嗰一個Kiss開始，我地唔再係青梅竹馬: 18. 看電影

「能迴避嗎我怕了當那電燈膽～」張子萊唱起歌，望向宋千辰，「你早講嘛，搞到我地做晒電燈膽咁！」

「冇所謂呀～大家想一齊睇咪一齊睇，其實我冇咩所謂～」梁玥嘉微笑道表示佢唔介意，但心裏又有啲想同宋千辰兩個「自私睇」

「睇咩戲？」李穎容問梁玥嘉

「最近上嗰度驚慄片，你中意嘅話都可以一齊～」梁玥嘉對李穎容講道

「都好～」李穎容點點頭，挽住梁玥嘉嘅手臂





「楠恩呢？一唔一齊？」梁玥嘉望向企李穎容另一邊嘅楊楠恩，「冇所謂㗎～大家一齊出去開心挽下咁～」

「唔⋯」楊楠恩偷偷地望咗宋千辰一眼，然後露出微笑，「好呀～」

「星期六好唔好呀？」梁玥嘉行到宋千辰旁邊微微彎下腰望向宋千辰嘅手機螢幕

「睇夜晚7半囉～」宋千辰講道，「你地得唔得呀？夜晚應該大家都可以啦～」

「本來你兩個拍拖拖，宜家多咗咁多電燈膽點好意思呀～」張子萊拍一拍宋千辰嘅博頭，搖搖頭講道





「諗多咗，係咁啱我同佢都想睇先一齊睇。」宋千辰口係咁講，但心中其實更想同梁玥嘉兩個人睇，但既然梁玥嘉話冇所謂就冇所謂

明明已經唔係第一次兩個人單獨睇戲，以前會覺得冇咩所謂，但係今次對於「想兩個人單獨睇戲」嘅感覺有啲強

「你地下次先一齊睇啦～」霍思傑和應張子萊般講道

梁玥嘉同宋千辰早就習慣咗霍思傑同張子萊拎佢地嚟講笑，所以都冇咩太大反應，佢地已經識咗好幾年，亦同班咗好幾年，而且張子萊同霍思傑都知道兩人嘅關係，只不過仍然中意拎兩人嚟講笑

宋千辰將手機收番入褲袋，梁玥嘉同李穎容、楊楠恩亦番埋位，霍思傑同張子萊望住宋千辰仲喺度笑緊，宋千辰都冇佢地咁好氣





「穎容呀穎容～今日lunch食咩好？」梁玥嘉捉住李穎容嘅雙手問道

「食咩好食咩好⋯」李穎容當自己拎住個占卜水晶球一樣，「等我感受一下先⋯」

「楠恩有咩提議呀？」梁玥嘉望向企喺一旁嘅楊楠恩，「你有冇話特別想食啲咩呀？」

「唔⋯附近有間餐廳食粉麵，唔知你地中唔中意食⋯」楊楠恩諗咗一陣之後講道，「我之前試過都Okay。」

「咁就食楠恩講嗰間啦！」李穎容頓時講道

上堂嘅鐘聲響起，大家番埋自己位坐低準備上堂

梁玥嘉托住頭，轉頭假裝望周圍，實際上係望咗宋千辰一眼之後就望番前面

「如果係同千辰兩個人單獨去睇戲嘅話⋯」梁玥嘉心裏其實的確有啲想只有佢同宋千辰兩個人去睇戲，「算啦～總有機會嘅～」





「你又會咁中意睇驚慄片嘅？」李穎容喺楊楠恩行咗行埋位之後問梁玥嘉

「我都唔知點解，就係覺得好睇。」梁玥嘉笑了笑，「都冇咩特別原因～」

梁玥嘉托住腮，心裏有啲期待星期六，雖然係一大班人一齊去睇戲，但都有啲期待

⋯

星期六

「著咩衫好呢？」梁玥嘉企喺衣櫃前面，打開衣櫃門，宜家嘅時間係6點，佢地約咗7點鐘喺戲院門口等

由屋企去戲院大概係20分鐘，梁玥嘉同宋千辰約咗6點半喺門口等





梁玥嘉拎咗件白色嘅hoodies同黑色嘅緊身牛仔褲，順便帶條皮帶，換咗一對由心形推砌而成嘅半圈耳環，耳環上有數顆細石

「Okay～」梁玥嘉自言自語道，然後孭咗個細嘅斜孭袋，將銀包鎖匙塞入袋

梁玥嘉行出廳坐喺梳化等夠鐘，順便睇一陣手機先出門口，一夠鐘嘅時候就起身出門口

當梁玥嘉行到去玄關位著鞋時聽到隔離屋開門嘅聲音，就知宋千辰已經搞掂出咗門口，梁玥嘉仲悠悠閒咁著鞋，佢喺鞋櫃上拎咗對白色平底波鞋落嚟，然後蹲低綁鞋帶

梁玥嘉開門出嚟，宋千辰孭住個斜孭袋，著住一件純黑色，背後有個logo嘅hoodies

兩個人搭巴士去到商場，然後再搭電梯上去戲院，去到戲院門口嘅時候得霍思傑喺度等緊，其他人都未到

「咁早嘅你？」宋千辰行到去霍思傑隔離，「你咁早就嚟咗嘅？」

「咁啱出嚟買嘢，所以就早咗。」霍思傑手上拎住手機，見到宋千辰同梁玥嘉兩人迎面行過嚟嘅時候便將視線從手機嘅螢幕上移開





「我地洗唔洗去買咗飛先？」梁玥嘉抬頭望問宋千辰

「買咗先。」宋千辰同梁玥嘉行去售票處嘅櫃檯前，霍思傑喺原地等佢地，其他人都逐個逐個嚟到




IG Link: https://www.instagram.com/nd_cotttoncandy/?hl=zh-tw