我娶左個台妹做我老婆啊！: Chapter 59

我地離開左屯門，就上元朗公路出去到圍村。

「由機場出呢到都幾快WO。」嘉欣話。

「係啊，而家開左屯赤隧道，過黎呢到都係半個鐘頭DD，所以而家新界西就發展得好快。」我話。

「以前細個唔係咩啟德，九龍城，觀塘咩？」嘉欣問。

「而家嗰邊升值潛力冇咁高架啦！以前就九龍最旺，而家就新界西架啦！」我話。





「咪住先！我地使唔使買野比爺爺嫲嫲啊？」嘉欣問。

「唔使啦！只要我帶你去就得！」我話。

我地差唔多落到博愛交匯處，見到爹地媽咪架Stepwgn係我地前面。我就開高燈閃一閃佢地。而呢個時候媽咪就打電話黎，叫我地跟佢地尾。話時話今次真係第一次兩部車一齊出晒。

講返我地個圍村，基本上都係中間有個村公所，鄉委會，N個三層高既村屋，祠堂等等⋯⋯基本上同大家係報紙新聞電視劇見到既一模一樣。但我地圍村就有個規定，就係唔比外來人入嚟居住，識既大部分都係姓盧既。至於圍村既人我都認識，感情都好好，特別係啲長輩，個個好錫我。當然我都好識做，有時會義務幫下啲小朋友、後輩補下習，一齊打波，希望佢地個個可以爭取都好成績，將來做一個有用既人。

去到村口，我就泊左係爹地架Stepwgn隔離。





「阿仔，靚車啊！」爹地話。

「係咩？」我話。

「欣欣係咪第一次黎呢到啊？」媽咪問嘉欣。

「係啊，以前未入過黎呢到啊！呢到同市區好唔同。」嘉欣話。

「好啦！我地入去啦！爺爺等緊我地啊！」爹地話。





我地一行人就入去，我就全程拖住嘉欣隻左手。搞到佢好Sweet。

一到我熟悉既祖屋。見到爺爺同嫲嫲到門口迎接我地。呢間祖屋其實係我爹地、大伯，仲有我細姑姐由細到大住係呢到。後來我爹地同媽咪結咗婚就搬走左，而細姑姐同佢老公廿幾年前移左民去澳洲Melbone定居。所以而家就得返我大伯一家同爺爺嫲嫲居住。

至於我大伯同我伯娘，就育有一對子女，即係我堂家姐Toby同堂細佬Hayden。我地三個前後相隔一年出世（Toby＞我＞Hayden）。分別任職婦產科醫生同會計師，都係靚仔靚女一名，又有各自既另一半。我地三個感情非常好，經常都會出黎遊車河，係圍村同其他同輩一齊玩，感情仲好過親生兄弟姊妹。但我地就唔會稱呼對方堂X堂X，直接叫佢地既英文名，會Close啲。

「爺爺、嫲嫲。」我同嘉欣話。

「乖孫，呢個係孫新抱？」爺爺嫲嫲問。

「係⋯⋯爺爺嫲嫲你地好啊！我叫嘉欣⋯⋯啊，多多指教啊！」嘉欣怕羞咁講。

「欣欣啊，你當呢到係自己屋企得架啦！嗱爺爺嫲嫲比返封大利是你先，預祝你同頌賢恩恩愛愛，天長地久！」爺爺嫲嫲就比封大利是到嘉欣手上 。

「多謝爺爺嫲嫲！」嘉欣歡呼。





呢個時候，大伯伯娘一家就落左黎。就見到Haydan同Toby都係到。見到我同嘉欣就係到熱烈歡呼！而Hayden同Toby不懷好意地奸笑，問我係邊到搵到嘉欣呢個靚靚女朋友。我就當然好得戚啦！結果又係被嘉欣教訓。

當然，由於而家仲整緊晚餐，屋企啲老一輩就叫我同嘉欣、Hayden同Toby聯絡下啲感情。我地當然出去車邊到傾下計啦，而嘉欣同Toby一拍即合，好多八婆野講，即時變到好似閨蜜咁Close。而我同Hayden又係講男人最鐘意既野：車！


「嘩，你架FD2改左咁多野啊？」Hayden係到問我。

「少少啦，你二叔啲好野！主要都係微改一下操控同馬力，安全改！」我回應。（二叔即係我爹地，Hayden同Toby叫二叔）

「改左啲咩先？」Hayden問。

「改左避震，喉，Brake嗰啲。不過放心有聽大伯講〖改件不緊要，留件最重要！〗」我笑著。

我同Hayden邊講邊上埋車。我就好似講師咁講左改啲咩。





「屌，你改埋Momo軚盤？做咩唔改Seat？」Hayden話。

「好平姐，我都係上日本Yahoo Japan到Bid返黎既二手貨，Seat位唔改啦，坐得唔舒服，上落車又麻煩！原裝幾舒服啦！」我話。

「你驚阿嫂投訴呢？」Hayden問。

「一半啦，架車佢都有分！」我話。然後Hayden大笑。

我地講講下，嘉欣同Toby就上左後座，叫我地返去食飯。