我娶左個台妹做我老婆啊！: Chapter 58

唔經唔覺我同嘉欣已經拍拖一個月，呢一個月黎我地完全冇鬧過交，返工就變同事，而放左工就係我地既另一半。當然啦，上次我當住係Terminal到向全世界講嘉欣係我女朋友。我諗唔止機管局內部，應該所有Airline，政府部門去到M記姐姐都知道我地兩個拍拖。好多人以為我公私不分，但係⋯⋯我同嘉欣鐘意就得啦！

呢一日，我地收工後，爹地媽咪Wtsapp我地：「仔，你同嘉欣收工入一入圍村啦，爺爺嫲嫲想見你地啊！」

我地示意左OK⋯⋯⋯⋯

「賢賢，你帶欣欣去邊到？」嘉欣問我。

「去錦田，即係我地上次攞車嗰到。」我回應嘉欣。





「真架？我要去我要去！」嘉欣甜笑。

「行啦我地！」我話。

我地Punch Out左之後，見到Ashley一齊打卡。講返先，我地AA要On Shift既基本上都係一樣，所以基本上都知邊個部門咩人有冇返工。

「Hi 盧生盧太！」Ashley話。

「我未結婚咋！放工啦？」嘉欣怕羞。





「係啊！而家返屯門啊，出去等A33。今晚同老公仔仔食飯。」Ashley話。

「不如我地車埋你啦！」我同嘉欣異口同聲話。

「好啊！」Ashley歡呼。

於是我地就一齊攞車，由於近期屯赤隧道開左，所以出屯門同元朗都係行嗰到，會快好多。我一路揸車，嘉欣同Ashley係好似兩個癲婆咁雞啄唔斷，咩都講一餐。我就係咁樣聽左佢地講左十五分鐘。話時話呢條路出入機場都幾方便，去屯門元朗仲快過出九龍添。

我記得Ashley就住係屯門市廣場嗰邊，於是我就係的士站嗰條街停車，離遠見到佢老公Nicolas抱住個小朋友。由於Ashley同佢老公都係AA到返工（但唔同Dept），所以我同佢地兩公婆都好熟。有時會同其他同事一齊上佢屋企玩，探下佢個仔。





「老婆！喂Leslie、Ally辛苦你地啦，車我老婆返黎。」Nicolas話。

「唔辛苦啊。咁岩我地入元朗。順路！」我話。

「哥哥、姐姐，你地好啊！」謙謙話。（Nicolas同Ashley個仔，而家讀緊K3） 

我同嘉欣向謙謙打招呼，而嘉欣見到謙謙就母愛氾濫，係到同佢玩。

「好啦！謙謙我地返屋企啦！下次再玩啦！Leslie、Ally辛苦晒你哋啦！拜拜。」Ashley就帶左謙謙同Nicolas返屋企。

由於呢到唔停得車，我地就要將架車駛離呢到。然後就經元朗公路入返錦田。