我娶左個台妹做我老婆啊！: Chapter 51

「係喎你有冇香港電話？」穎怡問。

「有啊，我俾你啦！91XX6874。你有冇WhatsApp同IG啊。」我回答。

「仲以為你用Line添。我俾你啦溫小姐。」穎怡偷笑。

「好啊，搵日邊日唔使返工大家出嚟行吓街。」我話。

「一定！」





於是我哋兩個就交換晒啲聯絡資料，穎怡仲拉埋我入去同學會個Wtsapp群組。見到除左盧頌賢、穎怡同黃校長之外，仲有好多其他未見過嘅同學。

「你哋兩姊妹做咩傾得咁開心？」頌賢問。

「我哋兩個傾緊少女心事，唔話俾你知等你心思思！」我同穎怡異口同聲地講。

「不如我哋四個一齊影張相啦。難得溫嘉欣返咗嚟香港搵校長。盧頌賢你揸機！」黃校長提議。

我哋四個就決定自拍，而黃校長同穎怡都好識做，專登就番我同盧頌賢企埋一齊，個傻仔怕羞到呢！見到黃校長笑得好開心，變返一個開心嘅老師，可能係佢心目中，我哋永遠都係小孩。





呢個時候因為上堂嘅鐘聲響起，所以穎怡就要返課室，照顧佢嗰班學生。所以我哋都唔打攪佢。

見到啲學生，真係好可愛㗎！就好似當時，我哋三個同其他同學一齊喺度上堂、一齊喺度玩。如果我有個咁可愛嘅小朋友，你話幾好呢？可惜呢啲日子永遠都唔會再有。