我娶左個台妹做我老婆啊！: Chapter 50

溫嘉欣的視角

係我面前呢一個地方，就係我以前喺香港住嗰陣讀過嘅幼稚園。真係估唔到話咁快就已經過咗20年之後可以翻返嚟呢一個地方，好似琴日發生嘅事咁。

呢個地方，充滿着好多開心嘅回憶。除咗好錫我哋嘅黃校長，仲有我最鍾意嘅男人——盧頌賢。記得K1到K3老師總會安排我哋兩個編埋同一班，我永遠都坐佢隔離。啲同學同老師成日笑我哋兩個大個咗一定會結婚。但好可惜因為我父母工作嘅關係，要離開香港返台灣。

而家同我傾緊計嘅，就係利穎怡。佢除左盧頌賢之外，同我玩得最埋個女同學。係我嘅印象中，佢仲係一個五六歲嘅小朋友，但隔咗20年之後，佢返咗嚟呢度教書。可能呢一個真係上天比我嘅緣份，要我20年後翻返嚟香港、機場、同埋幼稚園。

「溫嘉欣，你十幾二十年你去咗邊度啊？做咩無啦啦會返嚟既。」穎怡問。





「我同我屋企人移咗民去台灣呀，之後一直都係台灣讀書同做嘢。咁啱公司派我返黎香港做野，我見咁耐都無返過香港，咪返嚟香港做嘢囉。順便來回味一下我哋以前嘅開心回憶。」我講。

「但係我諗你都唔會因為我而返香港掛？話時話你喺香港邊度返工啊。」穎怡偷笑。

「梗係唔係啦，我而家喺機場到做啊，同盧頌賢嗰個衰仔同一個department，我依家咪住喺佢屋企囉。」我講。

「你地兩個⋯⋯⋯識玩喎。我哋一早話咗你哋兩個會喺埋一齊㗎啦。你地兩個拍緊拖呢？」穎怡問。

「邊有喎⋯⋯⋯⋯我邊有鍾意佢喎。況且我有交租俾佢㗎！」俾穎怡咁樣講一講，搞到我面都紅埋。





「你仲唔認。不過放心我唔會篤穿你嘅。因為我都知道嗰個衰人由細到大都鍾意你。加油啊，要實現返你哋嘅願望。」穎怡話。

穎怡講完之後，搞到我成個人好緊張。因為我真係好鍾意⋯⋯⋯盧頌賢架。如果唔係我就唔會住喺佢屋企，仲扮埋佢老婆趕走Jane啦，由細到大，我只係對盧頌賢有好感，我好記得佢送我上機嗰日畫咗幅畫俾我話要同我結婚，到而家我一直都等佢許下呢個承諾，雖然大個咗之後有好多男仔追我，但係我一直都將佢哋拒之門外。點解？因為我知道佢哋唔係對我真心，只有對我真心嘅男仔時得壹個，就係盧頌賢呢個衰人，係呀我知你鍾意我架，快啲同我表白啦怕羞仔。