我娶左個台妹做我老婆啊！: Chapter 49

揸左大約十分鐘左右， 去到一間幼稚園既門口停低左。呢間幼稚園雖然唔算太出名，規模都唔算好大，外觀上同當年完全冇變。但呢間幼稚園裡面既校長，老師真係好用心咁教導我地呢班學生。同時呢到就係見證住我同嘉欣既開始，裡面都係屬於我地童年開心既回憶。嗰陣可以話係無憂無慮，專心咁同其他同學玩，讀書。

由細到大，爹地媽咪，身邊既老師不斷咁教我，做人要飲水思源，無論將來投身社會之後，都唔好忘記學校既老師，同學。所以我一有時間，會自己或者約埋一班舊同學一齊返去母校行下（中，小，幼，大學），搵返以前既老師食下飯吹下水打下波，懷緬屬於我地既青春歲月。 至到而家，絕大部分教過我既老師，一齊玩開既同學至今一直都有聯絡。

去到門口，有個四十幾歲，面容慈祥優雅，打扮端莊整齊既女人，冇錯啦！呢個就係我地以前幼稚園教過我同嘉欣既班主任Miss Wong（亦都係我媽咪以前中學時期既師姐），而家仲做埋校長。唔知佢會唔會誤會嘉欣係我女朋友呢？

突然間，黃校長望住我同嘉欣既方向，由於我不時都會成日同啲舊同學返黎學校，所以黃校長一眼就認得我。

「校長您好！」我話。





「盧頌賢，你又返黎探校長啊？你真乖乖！」黃校長話。

「今日放假啊嘛，順便帶多個人黎見你啊！ 」我話。

「你帶埋女朋友呢？呢位係⋯⋯⋯」黃校長見到嘉欣就一面疑惑咁問。

「校長你好啊！我係溫嘉欣Ally啊，同盧頌賢同班架呢！你記唔記得我啊？」嘉欣好熱情咁講。

「溫嘉欣啊！做咩咁耐都唔返黎探Miss Wong啊！我好掛住你啊！」黃校長見到嘉欣好似見到親生女咁，變到激動不已。





「我移民左去台灣啊，不過近期公司調左返香港做野，而家同盧頌賢同一間公司做野啊！ 」嘉欣Q住我隻手咁講。

嘉欣一講完，黃校長就用邪惡既目光望住我，我梗係有啲暗爽，不斷係到偷笑，可謂話係「無所遁形」。既然嘉欣難得返到黎，黃校長點會放過我地，任由我地係門口到吹水呢？於是校長就盛意拳拳帶我同嘉欣入去參觀，回味一下我地既童年。 

黃校長就不斷咁帶我地去參觀，係咁同嘉欣傾偈，完全當我冇到。而嘉欣都不斷將佢係台灣既事話比校長聽，搞到校長都為嘉欣洗耳恭聽。呢一刻既嘉欣，唔係連登高登巴打眼中既「機管局女神」或者「前華航正妹」，只係以前細個同我一齊玩，嗰個天真無邪既溫嘉欣小朋友。 當然嘉欣都好識DO，冇話與我同一屋簷下，只話咁岩同我同Dept， 輕輕帶過就算。 

我地一邊行，去返我地以前K3一齊讀書嗰個班房門口，記得以前上堂嗰陣黃校長會安排我同嘉欣一齊坐（佢嗰陣係第一年係幼稚園到做老師，我地係佢既第一批學生），因為我地既書枱係兩個同學一齊並排坐，我就成日靜靜雞拖住嘉欣隻手，又者係到扮打嬉笑玩鬧，搞到老師，同學們都哭笑不得。而黃校長仲講笑話我同嘉欣大個左一定會拍拖結婚，到時叫各位同學做定人情比我地。但當時⋯小朋友既話點可以當真呢？

但由於呢個時候係小朋友訓覺既時間，為免騷擾佢地。我地都係門口行過就算，呢個時候，有一個同我年齡相若，氣質清純，樣貌極似馮盈盈既女Miss係我地面前行過。佢一見到我，就用啲奸架既目光望住我。





至於佢點解會對住我做出呢個表情？當然係我識呢個Miss啦！呢個Miss名叫利穎怡Chloe，當年同我，嘉欣由K1到K3一直同班，亦都同嘉欣玩得最埋。但之後小一開始轉左唔同學校讀書，都係早幾年係HKU到見返，仲同左我其中一個大學同學拍拖。亦都因為佢同黃校長，我就陸陸續續見返嗰班同學，仲開左個「XX幼稚園9900年屆K3A班」WhatsApp群組，每個月都會定期約黃校長食飯，盡訴當年情。

「校長好，喂盧頌賢你做咩又返黎啊？」Chole問我。 

「放假啊嘛Miss Lee，我係行24Operation制架！」我話。

「以為你失業添！」Chloe話。

「利穎怡，好耐冇見啦！」嘉欣見到Chloe就問。

「溫嘉欣⋯⋯原來係你啊？你做咩返左黎既？？？」Chloe見到嘉欣，就即互相擁抱。

我同黃校長見到咁既情況，都不禁地偷笑。任由Chloe同嘉欣一齊傾下計。