我娶左個台妹做我老婆啊！: Chapter 39

幾個鐘頭之後，我個鬧鐘響起左，呢個時候已經係朝頭早嘅6:30。於是我就起身梳洗、換好今日要着嘅黑西裝、黑恤衫黑皮鞋，將個頭Gel到靚一靚。

見到嘉欣瞓得得好諗，為免唔好嘈醒佢。所以我腳步聲需要輕輕地。但係見到佢瞓覺個樣，真係好可愛。忍唔住想玩弄一下佢嘅秀髮同臉蛋。點知⋯⋯當我想用手去摸嗰陣，佢就捉住我隻手。


當然，佢只係輕輕咁樣捉住我隻手，跟住用佢招牌嘅嬌嗲嘅笑容，同我講早晨。佢呢一個樣，就好似新婚妻子，同佢老公享受緊二人世界。

「早晨啊，嘉欣。」我話。

「早晨啊，頌賢。」嘉欣話。





「嘈醒你呀？」我話。

「唔係呀！係我自己早起左咋嘛。你而家出發喇？」嘉欣話。

「嗯。陣間見啦！期待你整比我嘅驚喜。」我話。

「嗯！好啊。記得唔好諗咁多野啊，如果見到你Ex嘅話，總之一切要平常心面對！」嘉欣話。

「Sorry要你安慰返我添，搞到要你為我擔心。」我話。





「屌你啦，如果你隱瞞住我嘅話我就真係嬲嘎！夠鐘啦。陣間屋企見啦！」我話。

「咪住，銀包呢？」嘉欣問。

「做咩？」我邊嗰邊拎我銀包俾佢。

「你就將呢張相放入個銀包度。唔見咗呢我打死你㗎！」嘉欣命令我。

我睇一睇嗰張相，係嘉欣既證件照。咁我明啦，原來嘉欣係扮我嘅女朋友，向Jane呢個舊愛示威。





我就離開咗屋企，然後落咗去停車場度。見到架FD2開走左，係喎，爹地話要用我架FD2喎，仲要用幾日。

算唔理啦！ 於是我就去攞舅父部M3（佢嗰三架車泊左係我對面）。講返佢嘅M3先，係1998年出廠嘅E36 M3黑色開蓬版。而呢一代基本上都係行棍波，車牌又係EK628， 冇錯，舅父嗰架三架車都係628，專登同爹地一齊襯。雖然舅父既車我全部都有揸過，不過咁期待嘅係第一次。點解？因為今日可以用呢架車同嘉欣小公主去約會囉。







係出車之前，我就試下打開車蓬。見今日陽光普照，而且風又唔係話好大，揸住開篷車出街係爽嘅。

一比油同轉波，架m3可以好迅速咁比到個反應我。基本上係0-4000轉已經好有反應。同埋舅父佢基本上係唔會改車，就算整車都要用返原廠零件，而佢同我講架車基本上冇乜嘢要整，只係個水膽要每100,000公里就要換。





如果你問我，要選最鍾意嘅歐洲車牌子，我一定會同你地講，非BMW莫屬。就算同期既Benz同Audi都好，完全唔係我杯茶。但如果你再問我，真係要揀FD2同E36 M3既話，我都係會揀FD2。因為FD2會比較適合我呢個年齡去駕駛，慳油得黎又可以好快，而且又可以用黎車老婆仔女去返工返學既日用車；至於M3，得閒用黎同女朋友遊車河好啦，如果日日咁樣揸M3返工，淨係油費都唔掂。

去Samuel屋企，我多數都會行葵涌道、青山公路入去。去到佢屋企樓下、見到成班兄弟已經到咗，幫主角今日要坐嘅Rolls Royce同埋我哋啲車做佈置。

完成咗佈置之後，我哋一行人上咗去Samuel屋企。見到主角已經着好晒唐裝，又有埋大吟姐喺度幫佢哋屋企人打點，令到個氣氛好隆重。當然，我哋一班兄弟喺度計劃緊點樣搞班姊妹，始終我哋男家係唔可以失威既，但最緊要兄弟開心就得啦！

趁Samuel作最後打點嘅時候，我就同班兄弟喺度傾閑偈，而佢哋亦都對住我不斷奸笑，好似當成我係主角咁樣。

「做咩唔帶Ally過黎啊？」Andy問。

「陣間你咪見到佢囉。」我話。

「你條友收收埋埋！」Jay話。

「不過陣間會見到阿Jane，你唔怕咩？」Tony問。





「我點解要驚先！錯嘅唔係我，不過今日係兄弟嘅大日子，唔好咁掃興。」我話。

「係嘅係嘅！」其他人話。

呢個時候，Rosita班姊妹通風報信話可以叫我哋出發，於是我哋就好似成班G4護送隊，去保護Samuel呢個新郎哥。然後我哋一行人就上返自己車，出發去Rosita係荃灣既屋企。而Andy因為飲酒嘅關係，所以我就車埋佢走。

由深井落返荃灣，基本上都係行青山公路。而且車程亦都係15分鐘左右，但由於大日子歲月行大運嘅關係，我哋亦都遵從傳統習俗，成班車隊就喺青山公路兜下圈，然後先再落返荃灣。

「你幾時有㗎寶馬㗎？」Andy問。

「架車我舅父㗎，借來玩一陣。」我話。

「我諗你唔係因為車我先至換架寶馬啊嘛？」Andy話。





「你明㗎啦。」我話。

「車Ally啦！我明既。不過Jane今晚會出現㗎喎。」Andy話。

「唔理佢啦，總之我會執生嫁啦。最緊要唔好搞到咁嘅主角！」我話。

「兄弟，如果Ally同Jane你會揀邊一個？」Andy問。

「你估到㗎！」我話。

「你清楚你知道想點就得㗎啦！」Andy話。

「嗯。」我話。

到咗荃灣之後，我哋架車亦都泊咗喺Rosita屋企樓下，接新娘之前，我哋當然要集一集氣，務求要玩下班姊妹先。





一上到Rosita屋企，班姊妹循例都要問吓我哋有冇開門利是，講到9999先開門俾我哋入去。但過完關又要斬六將，我哋成班人就要比班姊妹瘋狂咁樣玩弄，又要我哋行石春路，着住底褲周圍走。不過因為我地同Rosita班姊妹基本上都好熟悉，所以大家都會就住就住，只係想Samuel同Rosita開開心心，炒熱一下個氣氛就夠。

過咗一陣，我哋都完成咗姊妹們對我哋嘅考驗， 而主角Samuel亦都好順利接到Rosita呢個新娘，而Rosita屋企人亦都要對佢訓話一番。話時話今日Rosita真係好搶鏡，我諗應該係呢到冇一個女仔會靚過佢。始終佢係女主角，我當然要咁樣講啦。

搞掂好晒啲嘢之後，我哋就護送Samuel同Rosita呢對新婚夫婦去返男家，然後Samuel屋企嘅長輩就會飲Samuel同Rosita既茶，同時會送嫁妝比佢哋作為祝福。

見到Samuel同Rosita咁幸福，我哋呢班兄弟都為佢有呢一日而值得高興。而我自己亦都有諗過同Jane會有咁嘅一日，但係⋯⋯⋯陪伴係佢身邊嘅人，已經唔再係屬於我。