我娶左個台妹做我老婆啊！: Chapter 29

我同嘉欣一邊行，見到佢一邊微笑，搞到我都笑埋一份。

「做咩咁樣望住人喎？」嘉欣問。

「因為⋯⋯你靚囉！」我好曖昧咁講。

「唔靚。」嘉欣怕醜咁講。

「話時話你日文講得咁勁既？我以為你會唔記得晒添。」我問嘉欣。





「你估我好似你咁廢咩？我之前係台大副修日文，然後有去日本Exchange。係當地一定要同日本人交流，所以咪咁叻囉！你之前有冇去邊到Exchange啊？」嘉欣話。

「有啊，之前係港大讀嗰陣就去左澳洲Exchange左半年，我就係嗰到識左我前女友。」我話。

「係咪我見到嗰個啊？幾靚女啊！」嘉欣話。

我點左頭，你話如果要將Jane同嘉欣比較既話，雖然兩個都係樣靚身材正既美女，但係Jane既為人非常高傲發大小姐脾氣，又好拜金，又成日對我管東管西。見到佢就好大壓力。而嘉欣為人簡單隨和，好有愛心，對住我會笑面迎人，有時會同我講下粗口，但我鐘意佢份人夠直接，佢嗰種靚係完全出自內心，而且做事又靈活醒目轉數快，唔似Jane咁只有外在美，內心其實係充滿邪惡。如果要我選擇既話，我一定會揀嘉欣做我女朋友，同埋娶佢做老婆。

望一望個錶，原來已經到左Lunch Time。於是我就用手機係部門既Wtsapp群組寫返我同嘉欣一齊放飯既時間。由於時間有限，所以我地都係留係機場食就算。





「衰人，你想食咩啊？」嘉欣問我。

「食唔食翠華啊？」我話。

「你請？」嘉欣問。

「我請咪我請！」我話。

「好！」嘉欣奸笑。





講完我地就走去翠華到叫野食，但因為太多人排隊，所以我地都係買返Office食算。

返到去，我就即刻開電腦，而Office既電腦除左有機管局既Staff程式外，基本上只得上網同普通既文書處理，不過我就唔會咁衰，返工期間係到睇AV同打機，最多都係睇下車、多啦A夢、或者新聞嗰啲。趁而家係食飯時間，我就覆下公司既Email，睇下有冇啲咩野要Follow Up。

我認真咁望一望，原來出邊有啲自助Checkin Kiosk機原來到期要換，我就要聯絡返相關同事、供應商去維修返。而我地因為工作需要會成日用到Email，所以基本上除左要係Terminal巡邏之外，都要識基本既文書操作，以及協調應變能力。

打緊既途中，嘉欣就問：「你做緊咩啊？」

「我Send緊個Mail啊。係啊你都有個你自己既公司電腦Account架。」我話。

「係咪用黎覆Mail同做Report呢？不過⋯⋯好似冇比我啊！」嘉欣話。

「佢比左我啦，我Send完就幫你搞埋，今朝Jeff佢Send左Email比我叫我幫你開。」我話。

「Yeah！」嘉欣話。





由於Jeff安排左嘉欣張枱係我隔離，所以我一做完野就直接係佢隔離教佢開通個Account。而嘉欣都好聰明，跟住我講既Step去做，五分鐘都唔使就搞掂左。另外，我都順便同佢講埋我地「赤鱲角公司」寫Report同Email既格式，務求令佢盡快上手。

唔知點解，我同嘉欣不經不覺間愈控愈埋，而嘉欣既面朧變得好紅，好緊張，只係不斷對我甜笑。而佢迷人既體香搞到我要窒息咁。

溫嘉欣啊，你可唔可以唔好誘惑我啊？我會⋯⋯忍唔住食左你架。

當我係到流口水既時候，突然間⋯⋯

啪～～～～嘉欣冇啦啦打我個頭。當我望向佢既時候，佢唔單止冇潑婦罵街咁罵我，反而仲用嬌嗲既語氣咁同我講野。


「講！做咩流口水？」嘉欣話。

「冇，邊有啊？」我話。





「仲話冇，快啲食野啦，係咪要本公主餵你食飯啊？」嘉欣話。

我就惟有乖乖就範，聽嘉欣話去食飯。