我娶左個台妹做我老婆啊！: Chapter 30

我同嘉欣就攞住屬於我地既翠華外賣係到食⋯⋯⋯而我地都係叫一式一樣既海南雞飯加杯熱奶茶。

講起翠華，其實佢都係同大家樂、美心個啲一樣，只不過係普通茶餐廳既菜式，但價錢卻要比普通既餐廳貴很多，老實講⋯⋯翠華呢啲其實只不過係賣個包裝，係到做遊客生意。講比佢好食既茶記，簡直多到我都數唔晒。如果要我做比較既話，我鐘意既係去屋企樓下間茶記，除左價廉物美既佳肴，更加鐘意既係，係有一種屬於我地香港人既人情味。

「你覺得點啊？」我問嘉欣。

「OK啊，不過我鐘意我地尋日去既茶記多啲。Anyway，我地有得食其實已經好好架啦！做人唔好咁多要求。」嘉欣話。

「你都幾簡單架喎！」我話。





「做人簡單啲，會開心啲架！食野都係，食咩都係其次，最緊要係同邊個食！」嘉欣話。

「係既係既！」我話。

估唔到原來嘉欣係一個好簡單隨意既女仔，呢啲女仔真係買少見少，如果大家遇著呢啲好女仔，請好好珍惜。



呢個時候，我地既靚女姊妹花Sandy同Mandy岩岩放飯，拎住佢地既飯盒入黎。





「Hi，Leslie，Ally！你地放飯啦！」Sandy同Mandy異口同聲地問。

「係啊，一唔一齊食啊？」我問Sandy佢地。

「唔使啦！我地買左飯啊！唔好阻你同Ally姐姐撐枱腳啦。」Sandy講完就過左去同Mandy一齊食飯。

見到嘉欣不斷係到笑得好Sweet，我心諗到底有咩好笑呢？？講返Sandy同Mandy，佢地真係孖生姊妹黎，而家係我地既Management Trainee，當時佢地入黎嗰陣就係我帶佢地，做佢地師傅。雖然佢地都有美麗既外表，但係與嘉欣相比，始終差少少。不過唔緊要啦，反正呢兩對姊妹花都已經名花有主，所以佢地只會當我係同事、朋友，唔會對我構成威脅。

當然，係「赤鱲角公司」返工，要學識既第一樣野，就係要同自己既同事、以及其他公司既同事必須要打好關係。因為係公事上，我地必須要同佢地去協調，千祈唔好以為自己係呢到隻手遮天，要學識如何去尊重自己以及他人。如果可以既話，請盡量對同事及上司好啲，萬一你出事既話，第一個衝出黎幫你既⋯⋯會係佢地。





而嘉欣一邊食飯，一邊摸索緊公司電腦既System。話時話佢真係好快上到手，不斷咁研究緊機場既圖則，裡面有啲咩Equipment。不過佢話晒係台灣都係做呢一行，只係改少少野。我諗唔使幾耐佢會好快上手。

飯後，Jeff叫我同嘉欣、仲有其他Dept既同事開會，我心諗其實開會黎黎去去咪又係講啲廢話，其實⋯⋯Jeff可能想比嘉欣見下其他Dept既同事，萬一我放左假，起碼佢都可以即刻Follow Up。當然，嘉欣都知自己新黎報到，對呢到既環境唔係太熟悉。所以係會議上都冇咩點出聲，都係聽我地幾個人講，自己就係到認真抄Notes。

但今日個會竟然一反常態開左N個鐘⋯⋯⋯⋯由於已經到我地既放工時間，而下一更既同事亦都已經On Shift，Jeff叫我同嘉欣走先，臨走前仲叫我地要做好交接同打卡先走。

「Yeah！終於有得收工啦！」我話。

「好懶啊你，一夠鐘就閃。」嘉欣又話我。

「我地呢到冇OT架，除左打風黑雨嗰啲。」我話。

「係既係既，你今晚食咩啊？」嘉欣問。

呢個時候，我舅父就Wtsapp我：「Leslie，你有冇揸車啊？」





「有啊，做咩啊舅父？」我話。

「我，你舅母，表姐而家由澳門返黎啊，你方便車我地嗎？」舅父話。

「你想痴車坐，好。你係港珠澳定中港落啊？」我問。

「港珠澳啊，我而家岩岩上車，到左再Call你啦！」舅父話。

「做咩啊？」嘉欣問。

「冇啊，我要車埋我舅父。一齊嗎！？」我問嘉欣。

「當然要啦，你去邊⋯⋯我就去邊。我死都要痴住你架啦！」嘉欣用手指篤住我個頭。





「行啦！」我話。

由於舅父佢地岩岩上車，加上港珠澳大橋係機場隔離，所以我地可以慢慢行去攞車，Hea下都唔係問題。當然呢個時間又係好多航班升降，搞到個Arrival Hall都好多人。

收左工既我地，由同事即時變返對感情要好既青梅竹馬。而嘉欣不斷對我甜笑，嗚啊，呢一刻既我地，就好似返去二十年前，仍然係讀緊幼稚園既我地。

去到停車場，我地就攞返部FD2，一著車就聽到好過交響樂既Vtec聲，見到我最愛既嘉欣，簡直呢一刻好似身處天堂咁舒服。



「衰人，我可唔可以播歌啊？」嘉欣問。

「當然可以啦！架車有一半屬於你架嘛。你唔好播埋啲我唔識聽既歌就得啦！」我話。

嘉欣就冇理到我，用左佢既手機連接左車機裡既藍芽，我心諗佢呢個台灣代表肯定會播周杰倫、五月天、Alin嗰啲國語歌啦，點知一播⋯⋯





原來係一首叫做《Promise Dont't Come Easy》既英文歌。呢首歌算係一首好浪漫既歌，亦都係一首好重視與對方承諾既歌，因為⋯⋯承諾除左要講之餘，仲要去實行，唔可以開Empty Checkque。

https://www.youtube.com/watch?v=_MCPFtrkt-0

「你咁識揀既？」我問嘉欣。

「當然啦！驚你唔鐘意聽姐。」嘉欣話。

「傻妹～」我摸住嘉欣個頭，搞到佢好霖。

「專心揸車啦你！」嘉欣話。

由於舅父佢地出關都要少少時間，於是我同嘉欣係機場附近游下車河，順便比佢留意下機場周邊既環境，做下資料搜集。其實除左客運大樓，其實周邊都好多野行，例如國泰城、觀景山、南環路、機場緩跑徑⋯⋯如果想遠少少既話，就有港珠澳大橋、東薈城、迪士尼、大澳、昂坪360、天壇大佛⋯⋯等等。





當然，話明遊車河，所以我都係慢慢揸。始終都要顧及其他道路使用者既安全，唔會係呢附近亂飛。而我就好似導遊咁，告比嘉欣知呢到有咩好行。

「乜原來呢到咁多野行架？」嘉欣問。

「好多野架，除左呢到，可以去迪士尼玩，去東薈城買野，去大佛拜神，或者坐車去澳門都得。」我話。

「嘩！好正啊！我要你帶晒我去晒全香港。」嘉欣話。

「我都係你帶我去晒全個台灣。」我話。

「好啊 ！」嘉欣甜笑地講。

我地係機場島兜到咁上下，見差唔多時間，我地就過去港珠澳大橋到接舅父佢地。泊好車，我同嘉欣一邊行去Arrival Hall，一邊係到傾下計。當然，上次提到我不時都會經呢到去澳門玩，而今次終於帶到嘉欣黎呢到。希望下一次可以帶埋佢去澳門玩啦。


過左大約五分鐘，舅父舅母表姐終於出左黎。佢地仲拎住一袋二袋既鉅記手信。

講返我舅父，係我媽咪既孖生哥哥，佢而家係CX既機長，有「香港第一華人機長」之稱，同時亦都係全港第一位由民航處委任既華人「考核機長」。而我舅母亦都係CX既前機艙服務員，後來就落地調去做培訓部既Manager。佢地兩個育有一個女即係我表姐，大我同嘉欣一個月，無論樣貌同身材、學歷都好出眾，好似嗰個十優港姐麥明詩咁。表姐、我、嘉欣就讀埋同一間幼稚園，後來畢業後佢就去左女拔讀小學同中學，大學就同我一樣都係HKU（之但係我地唔同Faculty，佢就讀Law）。而家就係律政司任職檢控官。

至於你話我同舅父舅母表姐佢地既感情係點？當然好好啦，由於我地都係住美孚新邨（隔離屋），又係「赤鱲角」到返工。所以我地每星期都會約埋一齊食飯。而我、爹地、舅父都好鐘意車同飛機，所以我地三個仲不時出去遊車河，食野，打波。除左爹地媽咪外，舅父同舅母就係我既最Close既親人。而我表姐同我就好似兩兄弟咁樣，一樣好粗口爛舌，咩都會講一餐，而家就同緊佢同事拍緊拖。