我娶左個台妹做我老婆啊！: Chapter 9

去到旺中，呢到曾經係唔少中學生、年輕男女既潮流聖地。亦都係我當年讀中學成日會去既地方，一放學就會由何文田沿住亞皆老街一直行到彌敦道。（我以前中學係男拔讀書，係男校，亦都係籃球及田徑校隊代表）不過自從出左黎做野之後，基本上都好少黎買野，最多有時都係約下食飯同去波鞋街買街。



我同嘉欣一邊行，佢好似好開心咁。不過唔知呢到係咪同台北好唔同，所以佢就覺得有啲驚呀，唔係好習慣香港人既步伐。

「衰人啊，呢啲衫好靚啊！」嘉欣話。

「不如去揀下啦！」我提議。





我地就去左其中一間時裝店，裡面全部都係賣女仔衫，而老板娘睇落同我地差唔多年齡，好好人，仲比嘉欣慢慢揀。當然，女人天生都係貪靚，而嘉欣都唔會例外。見到嘉欣試得咁開心，我都開心晒。不過我真係估唔到嘉欣買衫都好平民化同爽快，三兩眼就已經揀好左成三四件衫同裙，全部都係今年最新既款式。

當嘉欣準備去比錢既時候，我就阻止左佢，搶先一步幫佢埋單。我仲同嘉欣講係我送比佢既禮物，搞到佢笑得好Sweet。而老板娘仲話我呢個「男朋友」好識哄女朋友開心，當然我都要幫佢攞埋衫啦。

「估唔到你買野咁平民化喎？」我不懷好意同嘉欣講。

「有乜所謂啊，平與貴都係一樣姐。最緊要襯得好睇，係咪咁話啊？」嘉欣撞我膊頭一下。

「係既係既！請問嘉欣小公主你想去邊呢？」我問嘉欣。





「我要食雞蛋仔、咖喱魚蛋。你要請我食！」嘉欣同我講。

「好！」我回應佢。

於是我地就繼續行，行到去一間小食店。睇Youtuber講呢間野都好多人排隊，於是我地就走去排隊，叫左雞蛋仔同咖喱魚蛋各一份，開心Share一齊食。

「係呢傻妹啊，你係台灣係咪好少食呢啲野食架？」我問嘉欣。

「又未至於既。但我之前係讀大學嗰陣同幾個港澳同學一齊整，係學校開流動小食比其他同學食啊。」嘉欣講。





「好難食架？」我講笑咁講。

「唔好傻啦！不知幾好味，好多同學幫襯架。下次我試下整啲台式料理比你同其他同事食啦！」嘉欣講。

「好啊！不過都唔知你會跟邊個師傅，或者直接跟大老細。咁你幾時再返啊？」我問嘉欣。

「大後日既7：30要返去，去左攞Permit先。」嘉欣講。

「我同你同一個時間啊，到時見啦！」我話。

「你要車我返工架！」嘉欣講。

我地食完之後，就去返波鞋街。呢到曾幾何時係我最會成日流連既地方，每次黎呢到就係買波鞋，然後即刻著去麥花臣個場到打波。諗返起嗰段日子其實好撚開心。

行到去Search Sneaker Shop，我同嘉欣就比門口一對黑白色既Converse 1970波鞋吸引住。然後嘉欣就話：「不如我地入去睇下啦！」





我點左頭，然後就行左入去。