我娶左個台妹做我老婆啊！: Chapter 8

落左訂，爹地、媽咪就話要同大伯佢地打下麻將，叫我同嘉欣揸架FD2走先，同埋今晚叫我地兩個自己食飯。臨尾見到爹地媽咪陰陰嘴笑，睇黎佢地真係想撮合我同嘉欣。

上到車，我就問嘉欣：「傻妹，你想去邊啊！？」

「不如出旺角行下街呢？」嘉欣提議。

「好啊！我以為你想講西門町添。」我講笑話。

「屌你啦！仲唔快啲行？」嘉欣話。





我發覺嘉欣呢個傻妹係一個癲婆，如果同佢唔熟既話以為係一個好嬌嗲既台妹，但而家同佢熟左就會覺得好似變返做一個本土MK妹，成日對住我講粗口。不過話晒我同佢咁熟，大家講下粗口有乜所謂啦？

「咁出發啦我地！」我同嘉欣講，然後佢點左頭。

我著返車，踩左極力子，入一波，比少少油就有反應，出左車行就離開錦田，我地今次就行返大欖直去青衣先，再入西九龍公路落返旺角。當然，一入左彌敦道，塞車就會係家常便飯。所以平時如果出油尖旺或者過海我會坐地鐵出黎，邊會揸車On9架？但難得嘉欣小公主咁開心，咩都抵返晒啦。

見到朗豪坊個停車場要排隊，為免浪費時間。我就將架車停係家樂坊停車場，反正行去旺中、信和既時間都同朗豪坊一樣。


落左車，我就問嘉欣想去邊到，佢諗左一諗就話要去旺中同新之城到行下街。我真係估唔到佢離開左香港咁耐竟然好熟架步，識行呢啲咁既地方，我懷疑佢成日會偷偷地返黎香港。





果然，下午時分既旺角，永遠都係咁多人，呢一日都唔例外。

呢一刻我覺得自己好開心，點解？因為有得同嘉欣小公主行街街，雖然我地唔係一對情侶，但係我地都唔會刻意保持距離，好似朋友以上，戀人未滿咁close。

「衰人啊？」嘉欣問。

「做咩？」我問。

「比你電話我啦。」嘉欣話。





「你有香港電話卡咩？」我問。

「係啊，今朝世伯伯母幫我搞左張Sim卡啊！快啲比你手機我啦！」嘉欣話。

我冇出聲，然後就自動自覺攞左我部iPhone 11 Pro手機開鎖比嘉欣，然後佢都攞左佢部iPhone 11 Pro出黎。估唔到原來我地部iPhone係同色同款都係黑色，只不過我係黑色普通膠殻，而嘉欣就係用Hello Kitty殻，直覺話比我聽，用呢啲手機殻既女仔個心地都唔會壞得去邊，將來一定係一個賢妻良母。

大家攞左手機出黎之後，互相交換左手提號碼。然後嘉欣仲比埋佢IG、Facebook同line acc我，幫我Follow埋，等我可以關注下佢。見到嘉欣個表情咁開心，我當然比返我既IG、Facebook同line acc啦，佢就二話不說即刻Follow返我。

「OK！搞掂！咁以後我地都用wtsapp聯絡啦！」嘉欣話。

「其實用Line都得架，反正我都有acc。」我話。

「你好蠢啊！你地香港人用開Wtsapp架嘛。到時同事們一定會用Wtsapp開個Working Chat Room架！死蠢！」我又被嘉欣教育中。





「係既係既！最叻係你啦！」我哄返嘉欣，佢即刻笑得好Sweet。

「我地行街街囉 ！」嘉欣單左一下眼同我講。

「Yes Madam！」我話。