我娶左個台妹做我老婆啊！: Chapter 7
去到錦上路，我地就係我大伯間車行到停低左。而車行老板，即係我大伯就過左黎，同我地攬頭攬頸，但佢見到嘉欣個反應有啲怪。不過都正常既，平時大伯就見我同爹地兩父子比較多，但嘉欣就第一次見。講返呢間車房先，係我大伯同爹地，仲有佢地幾個朋友早十幾年前一齊夾份開既，但後來爹地因為工作太忙既關係，就將手頭上既股份比晒大伯。不過我同爹地會成日過黎呢到開下Party，同大伯吹下水。而我大伯做生意一直都係好老實、公道（佢以前係總機電工程師，不過早四年前退休），同呢一區既行家猶如朋友，加上我地因為係呢區既新界原居民，所以大家都好畀面我地。我屋企架CBR同埋Stepwgn都係靠我大伯係日本幫我Bid返黎。
「嘩！一家四口黎行街啊！」大伯話。
「係啊！同個衰仔睇下車啊！佢架EG比Tesla撞爛晒。」爹地話。
「岩啦！幫襯下啦！反正頌賢做機管局，都有錢架啦！但細佬啊⋯⋯呢個女仔係？」大伯見到嘉欣問爹地媽咪。
「OH！呢個係嘉欣啊！我世侄女⋯⋯你以前見過啦⋯⋯早廿年前。」爹地媽咪話，然後嘉欣就同大伯打招呼握手。
「阿仔啊，你同嘉欣去睇下車先，見到岩既就同我講啦！不過你比錢哈哈。」爹地對住我同嘉欣講。
爹地一講完，就同媽咪、大伯伯娘就入左去Office到談笑風生，講個不停。而我當然就帶嘉欣小公主去睇車啦。
我地一直行，好似行汽車博物館咁興奮。而嘉欣見到啲JDM跑車係到流晒口水，咁又難怪既，始終日本、澳洲、紐西蘭、英國運過黎既車可以係香港直接出牌揸，台灣就唔得啦！所以日本既JDM係台灣市場根本冇得做，就算運到去台灣都一定要右軚改左軚，改左已經唔再係嗰回事啦！
「喂衰人，呢到好多車好得意啊！」嘉欣話。
「係啊，呢到啲車全部都係日本直接Bid過黎既水貨車。同代理既規格好唔同。」我用汽車專家既口吻同嘉欣講。
「如果可以直接拎返台灣就好啦，不過台灣啲車全部都係要左軚。所以都冇用。」嘉欣扁晒嘴講。
「唔緊要啦！如果你有國際車牌既話就比你揸啦！」我同嘉欣講。
「Yeah！好彩本公主係台灣已經有車牌姐，但係冇搞國際車牌啊！」嘉欣話。
「傻妹你有香港身分證架嘛。到時你攞返你本台灣車牌、護照、香港身份證、我屋企同你台灣屋企個地址單，去運輸署到搞就得架啦！」我話。
「Yeah！你要比架車我揸架喎！多謝你啊衰人！」嘉欣講完就成個人攪落我到。
我地一直行，一直行⋯⋯見到好多都係新出既本田Stepwgn、豐田既Vellfire、Alphard、Harrier同Hiace搵食車，其實我屋企都已經有部Stepwgn啦，所以我都唔會換七人車。當我地失望到極，準備想返去搵爹地嗰陣，嘉欣就扯住我隻手。
「做咩啊傻妹？」我問嘉欣。
「衰人嗰架車好唔好啊？架車好靚啊！」嘉欣邊講邊指住架白色原裝本田FD2（前期版）。
嗚啊！係我一直夢寐以求既白色FD2 Type R啊！原來大伯返左一架，只不過已經出左牌，但最令我眼前一亮既係車牌號碼，原來係我以前架EG9既車牌號碼。（車牌號碼：KA628）
點解KA628呢個車牌會係呢架車出現架呢？？？唔通賣左比人？？？但冇理由啊，呢個牌係爹地最鐘意既車牌號碼，之前人地開價佢都唔肯賣。實在R爆頭諗唔明。
呢個時候，爹地媽咪同大伯出左黎，見到我同嘉欣睇岩左架FD2，睇得出爹地個眼神好陰險。
「呢架車？？？」我問爹地。
「鐘意嗎？？架車係你架啦！」爹地問。
「頌賢上車試下呢。」大伯比左條FD2車匙我。
我、嘉欣、爹地、媽咪就上車試下，果然，真相就只有一個，原來呢架車爹地已經買左，仲幫我留左牌，放左係FD2到，呢個驚喜真係呢！！！！
聽大伯講，爹地之前做埋驗車官，Check左架車係直板，車架冇生銹，避震冇漏油，機器好精神。大伯就比埋條車匙我地，我、爹地、媽咪、嘉欣四個就睇下內籠裡面既座椅好新淨，我睇上一手車主肯定好錫車。同埋車機已經換左Pioneer既藍芽大面板同泊車鏡頭，可以用手機播歌同埋收到香港既電台節目。大伯就話呢架車係佢一個著名既香港賽車手朋友新車0首Keep到而家，但佢個賽車手朋友因為家庭問題需要換車，於是就擺架車係大伯到寄賣，再補錢換左架Alphard。
堂Uncle都好好人，叫我同爹地可以試下架車，行下街係咩Feeling。我就同爹地、大伯、媽咪、嘉欣就係錦上路周圍兜左幾個圈，而架車既轉數都好肯上，就算上到去紅區都好有力，而副K20A偈亦都冇任何雜聲，好安靜。條喉亦唔怕嘈，只係低音沉實。如果基本上唔係成日飛都夠晒用。
「做咩架車會上左我個牌既？唔係註銷左拉咩？」我問爹地。
「咁靚個牌我點捨得除左佢啊？同埋我見到你大伯又放架咁高質既FD2。我當然即刻買左佢同放返牌上去啦！」爹地話。
「即係呢架車？？」我問。
「架車係你架啦，送比你揸。架車既過戶手續已經全部搞好晒。」爹地話。
「多謝爹地。」我話。
「你記得對堂Uncle好啲就得啦！但係呢你都要比欣欣揸架喎！佢同你一人一半！」爹地話。
「慢慢黎啦，好好孝順你爹地就得架啦！」大伯話。
所以，綜合上述既試車報告，我同爹地都好確定呢架FD2絕對買得過，狀態真係Fit到出水，由於牌費同保險仍然有效，轉左爹地個名，大伯就話叫我揸左架FD2返去先。