因為ex，我決定向全世界嘅女人報仇: 終於結束的起點

「..！唔好...！」我起左身。
「老公..？做咩啦，發惡夢呀？」Rachel仲未訓，用緊手機。
「嗯..」我因為太攰就好早訓。
「乖，冇事，我係度呀」佢慢慢行過嚟輕輕抱住我。
「好..，我冇嘢呀。你仲未訓嘅？」我望一望個鐘，已經就嚟兩點。
「冇呀可能岩岩返嚟訓得太多..而家唔眼訓」
「好啦，你唔好太夜訓呀」
「嗯～你訓啦，我係度」佢坐左係我隔離，捉住我隻手。
我諗起當初Nicole走左之後佢就係靠呢隻手成功令到我愛上佢，嗰陣每一晚佢都捉住我..，諗返起都的確係幾浪漫。過左咁多年，佢隻手都仲係咁有魔力，一捉住我就好似成個人放鬆哂咁。雖然，我岩岩嘅惡夢係因為Nicole..。不過，可能訓得太多，我都冇咩睡意，淨係訓左係度合埋眼。



我諗起有人話時間可以沖淡一切，但經歷過咁多次同Nicole嘅離別，佢係我心入面好似點都沖唔走。感覺就好似我無論用咩方法想去delete左佢，但都冇辦法將佢徹底刪除。曾經睇過一本書，入面講如果要放低一個人，唔係要真係忘記佢，而係係當你諗起佢嘅時候，唔會再係你心入面泛起漣漪。如果將呢一句套用返係我到....，咁我應該到呢一刻都仲未放低到佢。Nicole對我嚟講就好似係一個遺憾..，我地冇一次係正正式式咁分手，即使我地從來都冇「一齊」過。或者我地曾經拍過拖，然後正常分手嘅話，我就唔會好似而家咁。呢種唔嗲唔吊嘅關係，令到我個心不斷去幻想同佢嘅發展....。我知道咁樣對Rachel好唔公平，但係我只可以控制住我嘅行為，控制唔到我個心。慢慢，我就訓著左。

我地，就咁樣一齊落去一年又一年。好似當初咁，只要Nicole冇搵我，我基本上都唔會有渠道同佢接觸到。而我只要唔接觸到佢，我就唔會做啲咩。時間一日一日咁過，就算Nicole係我心目中嘅地位係點都好，我都冇可能癲到為左佢放棄我個家。人越大就越唔想改變，呢句我幾年前都講過，更何況而家我同Rachel已經plan緊生小朋友嘅事。或者結婚就係一個束縛，綁住左我同Rachel。不過係另一方面睇，至少我唔洗再為左二揀一而煩惱。我嘅人生好似就上左一架不停站嘅列車咁，按住軌道不停向前行...。我同Rachel，就咁繼續向前行，唔會返轉頭。或者，我地嘅命運，就係咁？

可能唔係

終於結束的起點
終於寫下句點 終於我們告別
終於我們又 回到原點
流乾了眼淚 日日夜夜


未來的我們 也許能說聲好久不見

站在這起點
其實沒有走遠 其實不願告別
其實我心中 依然想念
擁抱著遺憾 歲歲年年
卻要在今天 頭也不回的告別昨天 奔向明天

奔向明天
不回頭 不眷戀 的明天



————————————

「你咁樣真係好咩..？」
「都糾纏左咁耐...我都好辛苦」
「我覺得你會後悔」
「你好想我同佢一齊咩？」
「唔係，但我想你幸福」
「或者同佢一齊未必可以幸福呢..」
「你明明就唔係咁諗」
「我接受唔到自己會變做自己最討厭嘅嗰類人」
「....唉」
「多謝你呀，叫你出嚟就咁夜都出嚟」
「傻啦，小事」
「飲埋今晚～聽日開始我就唔會再係咁」


「你話嫁」
「嗯，我話嘅」
「好，咁聽日你就唔可以再因為佢而拒絕我」
「哈哈～好呀，但係我唔係咁易放低一個人嫁喎」
「我知呀」
「知你又咁蠢..？」
「愛情邊有分聰明同蠢」
「咁又係」
「我會盡力。信我.....，Nicole」


正文完