因為ex，我決定向全世界嘅女人報仇: 婚禮

我同Rachel唞左一陣就執返好自己個樣，唔可以比其他人見到。我慢慢出返去嘅時候搵極都搵唔到Nicole...，都係嘅，佢喊到咁，點會留係度。Nicole走左之後我好似少左一忽咁..，好似..差咁啲嘢...。明明都過左咁耐，我以為時間係真係可以令我放低佢，點知三年對我嚟講，完全冇放低過。唉..，我望住同我屋企人傾緊計嘅Rachel，或者咁樣先係最好嘅結局。我地按住schedule 繼續個婚禮，所有嘢都冇咩大問題，順順利利咁，我地結左婚。我同Rachel 係台上面錫，接受所有人嘅祝福。得我地先知道，岩岩發生過啲咩事。我知道係佢心入面一定會有條刺，但如果叫我悔婚，我真係冇咁嘅勇氣。再加上我唔係唔鍾意Rachel，除左醋意大左少少之外，佢基本上係一個好好嘅老婆。我驚搵唔返一個咁好嘅女仔，所以我想佔有佢，我唔想比其他男人擁有佢。多過三年半嘅同居相處，我嘅生活一早就離唔開佢。

婚禮慢慢完結，啲人都開始走。我地成班大學同學一齊影相嘅時候，呀婷都有過嚟。影完相之後Rachel 去左廁所，其他大學同學都慢慢走緊，得返我同呀婷。聽其他人講佢男朋友今日唔得閒，所以冇嚟到。
「恭喜晒你呀，有個咁好嘅老婆」呀婷笑一笑咁同我講。
「哈哈，多謝」我話。
「見到你幸福就好啦～」
「你都係呀！要同男朋友stay sweet！」我好客套咁講。
「哈哈，一定會」
「咁就好」
「呀文」佢話。


「嗯？」
「多謝你呀」
「下..？點解嘅」
「多謝你令我成長左咁多」佢微笑。
「傻啦..，我要道歉就真...」
「唔洗喎！我唔想因為嗰件事搞到大家做唔成朋友，去左英國之後我對好多事都睇開左。既然大家都搵到屬於自己嘅幸福，咁又何必因為以前嘅事而冇左個朋友～」佢話。
「我想多謝你就真...！多謝你唔怪我。係喎..我之前寫比你封信...」
「我有睇呀，不過嗰時仲未想理你，哈哈」
「哦...唔緊要呀...，不過真係對唔住..」
「得啦長氣，下次再約食飯啦！你去陪老婆啦死仔！」佢話。


「好啦，下次再約！！」我講完呀婷對住我笑左一下，然後轉身就走。經過今次之後，我地嘅尷尬好似化解左咁。

Rachel 出返嚟見到我同呀婷傾計，佢都等我地傾完先行過嚟。
「你地傾咩呀～」佢問。
「佢叫我同你要幸福呀」我話。
「真係嫁？」
「傻妹，係呀」
「好啦～」佢話。
「好～差唔多返去啦」
「嗯」


我地返到去都好攰，好快就訓著左。第二朝我好早就醒左，聽到Rachel係廚房煮緊早餐。我起左身，行入煮房。
「哇..做咩無啦啦煮早餐嘅？」
「因為老婆要煮早餐比老公食囉～」佢話。
「傻瓜！」我聽完笑左一笑。
「唔係傻瓜啦，係老婆..！」
「係～老婆大人」我話。
「乖～你出去等食啦，好快得啦」佢話。

我地食早餐嘅時候我想講返琴日嘅事，因為經歷左咁多嘢，但係佢一句都冇提起。我覺得好唔自在，正常唔係應該鬧我、嬲我、又或者會唔開心。但係點解每一次佢都好似一瞓醒就冇事咁，搞到我唔知佢諗緊啲乜嘢。
「老婆...」
「嗯？」佢話。
「琴日嘅事..」
「唔洗道歉喎..」
「下..？」我話。
「你唔係想同我道歉咩...」


「嗯..」
「我知道你點解會咁做..，我見到你地攬嘅時候個心都好唔舒服..」佢話。
「老婆....，對唔住..」
「你知唔知，嗰刻我真係有諗過唔同你結婚」
「....嗯..」
「但我最後都係決定信你」
「對唔住」我話。
「如果你真係覺得對唔住嘅，就唔好再同佢有關係..」
「我唔會，以後都唔會」我講。
「咁你要用時間去證明比我睇嫁喎..」
「好，我會證明」我話。明明三年前我都應承過Rachel，但我冇兌現承諾。我唔知佢仲會唔會信我...，不過學佢講，真係要用時間慢慢證明自己。
「你話嫁..！」
「我發誓」
「嗯，我信你」佢話。
「多謝你」多謝你..周紫凝，點解你咁善良，連我呢個誠信破產嘅人你都信我。



三個月後，有一晚我發夢夢見Nicole。夢入面嘅佢係海度游水，而我就係岸上面望住佢游水。突然間，佢浸親但冇人救到佢。我即刻跳左落海然後游向佢度，但係唔知點解我游嚟游去都拉近唔到我地嘅距離。我不斷游不斷游，啲浪就一波又一波咁冚埋嚟，阻住我去救佢。Nicole離我越嚟越遠，佢個人慢慢沉左落海。我好驚，更加用力去游，但我feel到有啲嘢好似一直纏住我隻腳咁。我望住Nicole....，直到佢成個人消失左係海平面......