因為ex，我決定向全世界嘅女人報仇: 攤牌
「高曉琳！！！！？」我望到Nicole嗰一刻我成個人彈左起身仲要嗌左出嚟，我冇諗過佢會係呢個時候出現係我面前...。呢個大概係我識左佢咁耐，比得最大嘅一個surprise 我。
「點解你會係度..？」我仍然未平復到心情。
「我...我過嚟睇下你..」佢口疾疾咁講。
「睇下我..？」我忍住心入面嗰道火，深呼吸左下，我比機會佢解釋。
「...」
「睇我終於同人結婚啦，你係咪嚟祝福我呀..？」我有少少嬲。
「呀文...」呢一刻佢比我嘅感覺好弱小。
「你想講咩」我坐返低，示意佢坐低。
「我唔係你諗咁...」佢冇坐到，企左係度望住我。
「你覺得我點諗你」我嘗試冷靜咁問。
「你....你係咪覺得...我三年嚟都冇搵你...又好似當初咁粒聲唔出走左去呀..？」佢情緒越嚟越唔穩定，我諗再講落去佢一定喊。
「你唔係咁咩？三年...三年啦...！你上次去歐洲唔見幾個月我都算..你今次又有咩理由，又有咩藉口呀！」我開始燥，我覺得就算係咩理由都好，都唔可以粒聲唔出走左去咁多年。
「呀文.........」佢隻啲眼淚一滴又一滴咁出嚟，滴花左少少佢個妝。但就算滴花左..，佢都係咁靚，一啲都唔輸比Rachel。我冇諗過望到佢流眼淚仲會有心痛嘅感覺，我好想過去抱住佢安慰佢。我知道自己語氣可能過左火，但係我仍然認為做錯嘅係佢，而且呢個係我同Rachel嘅婚禮，我唔會抱佢。
「咁你可唔可以話比我知點解...」我諗返起佢點對我，我都有啲想喊...。
「你根本都唔明.....」佢啲眼淚冇停過流，企左係度望住我喊。
「你講...，你同我講...！你一次又一次咁傷我...，算啦都過左去啦...，你可唔可以同我講你有解釋...」我啲眼淚終於都忍唔住，隻眼好濛...。
「呀文....嗚....我....我真係唔係有心」
「咁你可唔可以講...，我求下你」我真係唔知有咩唔講得。
「.....係.....因為Rachel....」佢話。
「下..！？」
「....佢...........佢有搵過我...」
「.......！！」我聽完之後成個人企左係度。下...，點解我完全唔知佢有搵Nicole..，咁係咪就姐係佢知道我同Nicole嗰晚嘅事...。等等先..，Rachel有搵過Nicole但我一路都唔知..佢究竟呃左我幾耐...。我個心第一次有比佢呃嘅感覺...，我冇諗過佢會瞞住我去搵Nicole。
「呀文.....你聽我講...」佢話。
「我唔信...！就算佢搵你，起碼你都比個message 我...」
「我........我唔可以....」
「點解..！！」我問。
「....」
「你講啦...！」我又有少少炆。
「.........」佢繼續唔講嘢。
「高曉琳！！」我大聲咁講佢個名。
「我唔想好似我前老公咁衰..！！我唔想破壞你地呀！得未呀..！！嗚...，呢幾年我都好辛苦嫁.....！我一個人可以點喎！你呢！你有佢陪住你呀！！你根本唔會明白！你有咩事每次佢都會陪係你身邊，咁我可以點呀！我冇做到咁賤呀...！！既然你地一齊得咁開心，又點解要我喎！我嘅出現係人地眼中係勾引有女朋友嘅男人嘅八婆炸！！！！嗚...」Nicole將佢咁多年嘅屈辱發洩哂出嚟。我好少聽佢講佢內心嘅諗法...，今次一聽..我唔敢再怪佢...只係內疚。
「......」我唔知點覆佢，我有少少驚我地嘈得太大聲，出面聽到。
「...」我地兩個慢慢冷靜落嚟..。
「咁你點解會知我結婚，點解今日會嚟..」我問。
「我有朋友識Rachel...我今日嚟...係純粹想見你一面就走...」佢話。
「你諗住就咁就走..？你唔見左幾年，你想就咁就走..？」我雖然咁講，但我唔知佢唔走可以點。
「呀文....，我唔可以咁做....我....我唔知要點做」
「曉琳...」我慢慢行過去，捉住左佢隻手。
「太遲啦....呀文.....我地...我地太遲啦...」佢講完呢句，收返入去嘅眼淚又瘋狂流出嚟。我望住佢對眼，就算佢喊，都係咁動人，咁吸引。
「....我地...真係就咁就完啦...？」我腦海浮現哂我地一齊嘅所有回憶，好似走馬燈咁，一幕又一幕咁閃過。
「對唔住....呀文..對唔住......！」佢喊得越嚟越犀利。
「我要講對唔住就真.....，我唔應該咁睇你...」我今次真係再忍唔住，我抱住佢，我地兩個人攬埋一齊喊...。慢慢，我地心情又平伏左少少。
「呀文....乖啦...，唔好為左我而放棄Rachel...。你地係應該係埋一齊...，佢比到幸福你，我知道嫁。你同佢一齊嘅時候，係你面上面都有幸福嘅笑容。你唔好嬲佢搵我...，因為如果我係佢...或者我都會咁做....。錯嘅唔係佢，而係時機...。呀文.....，可能我地一開始就唔係屬於對方....。你記唔記得我地去海旁我同你講個海...。我而家就好似一滴滴跌左落海嘅水咁...只係掀起左一陣漣漪...，Rachel比你嘅..先係細水長流嘅愛情...」Nicole抱住我係我耳仔邊講。
「我唔要聽呢啲....，Nicole...」
「乖啦...，嗚....呀文....你唔準咁樣呀....。嗚.....，你知唔知....我...我下左好大嘅決心先講得出呢一番說話....你.....可唔可以唔好再係咁......」佢又不停流眼淚。
「高曉琳....你唔好走....好冇....，你唔好再離開我....」佢講完令我更加想喊。
呢個時候，門又打開左，我即刻縮開抱住Nicole嘅手。....入嚟嘅，係Rachel..。
我最大的遺憾
是你的遺憾 與我有關
沒有句點 已經很完美了
何必誤會 故事 沒說完
還能做什麼呢
我連 傷感 都是 奢侈的
我一想念 你就那麼近
但終究 你都不能
陪我到 回不去的 遠方
原來我很快樂
只是不願承認
在我懷疑 世界時
你給過我 答案
我感覺到幸福
是看見你幸福
曾經親手把時間變慢
可惜我們 沒有等 我們