因為ex，我決定向全世界嘅女人報仇: 不再被需要

「對唔住.......佢錫左我...」

「凝凝...好對唔住.......我...我冇推開佢...」

「對唔住....我對你唔住........」

我個腦海不斷浮現呀文同我講呢一句，我...我成個人呆左，我唔知應該比咩反應。所以最後我決定離開....，我唔知點樣面對呀文，唔知應該點樣面對佢地兩個嘅感情。

我著住拖鞋就沖左落出去，我不斷跑不斷跑....，跑到好攰然後坐左係公園嘅櫈度。好彩而家係夜晚...啲人都唔係好睇得清我著住酒店拖鞋。我自己一個坐左係公園發呆....我諗唔明...唔明呀文點解要咁對我...。我都唔介意佢心入面有Nicole..，但點解佢要瞞住我同Nicole一齊。我...我係佢心目中嘅地位就咁卑微咩....我....嗚.....我....我明明為佢做左咁多嘢....，一直係佢身邊陪住佢...，點解喎........。我選擇走其實唔多唔少係因為我自卑...、我想逃避。我唔敢面對，因為怕我係輸家。我知道我自己冇Nicole咁吸引....冇佢咁好身材...，又冇佢咁叻。我一直都知嫁....，但係我真係好鍾意呀文....。咁我可以點喎..！我壓抑唔到我愛佢嘅感覺，明明當初需要我嘅人係你。原來我咁鍾意你.....，換嚟嘅只不過係幾個月嘅回憶....。我好似一個水泡咁，你上返岸了，已經唔再需要水泡啦.....係咪呀..？我越諗越喊得犀利...，自己都係太天真，以為我可以留住呀文，以為Nicole係度我都接受到。但原來，Nicole返左嚟，我個心係咁唔舒服，咁不安。我...係咪又要失戀啦...？記得我曾經諗過Nicole返嚟會係點，但我點都估唔到呢一日嚟得咁快，更加估唔到呀文為左Nicole而瞞住我。



我抱住對腳坐左係度，我望住一對對食完飯落嚟散步嘅情侶.....，究竟我點樣先可以幸福。我明明以為自己已經搵到我愛嘅人，但個天好似點都要我行下彎路咁。我唔想捲入複雜嘅三角關係..，我只係想簡簡單單同我愛嘅人一齊。如果呀文愛嘅人係Nicole..，咁我同佢一齊又有咩意義。真係咁嘅話，我寧願忍住痛咁退出..！

我喊緊嘅時候有隻柴犬跑左埋嚟我張櫈隔離聞我，我個人即刻冇咁唔開心，我摸一摸佢勉強笑一笑。我抹一抹走啲眼淚，我驚佢主人睇到。
「做咩啦柴柴～？」佢繼續係我隔離聞。
「你主人呢？」我摸一摸佢頭，然後抬起頭望一望有冇主人係附近。
「你蕩失路呀？」我有少少擔心佢，但我而家著住拖鞋，都好唔方便陪佢去搵主人。佢一嘢跳左上我張櫈，然後坐左係我隔離。
「你怕我一個人唔開心呀？傻仔～」
「汪..」佢細細聲吠左一聲，然後就繼續好乖咁坐左係我隔離。我好少見咁乖嘅狗，佢主人應該都train得佢幾好，但點解會走失左嘅，佢身上面又冇狗繩。
「你係咪同我一樣...比人遺棄左啦....。你主人係咪唔再需要你啦....。咁岩嘅...，我都唔再被人需要啦」我話，然後我又忍唔住喊。隻柴犬好似知道我唔開心咁，佢將個頭控埋嚟我度郁左幾下。
「多謝你呀...！乖...，都係你好...。你比我唞一陣就幫你搵主人好冇..？」我實在係冇心情郁住...但係都想幫柴柴搵返佢主人。


「柴柴，你話，我應唔應該原諒佢...」我話。我講完佢都冇反應，淨係趴咗係度。
「定係我應該走....，我明知佢鍾意Nicole嫁...」
「我....嗚.....我冇信心...，但明明我先係佢女朋友....！」我又忍唔住，一滴又一滴嘅眼淚好似決堤咁湧哂出嚟。
「嗚.....啊啊.......」我不停喊，隻柴犬就靜靜地坐係係我隔離。

或者，我地都唔再被需要

我痛恨你分得太早走得冷酷
我更恨我體諒人會愛新厭舊
恨我那麼頑強


偏不夠殘存力氣放開手
要是還未受夠 也許創傷未霉爛到透

我尚有對手 這雙腿會走
想找你驗過我心死沒有
只可惜傷害不見切口
製造藉口能叫我守候

我未怕獻醜 寂寞多自由
不需再顧慮濃或淡妝 你不接受
你新的女性好友 我祝她跟你恆久
心死得更透 驗過傷可否惹你內疚