因為ex，我決定向全世界嘅女人報仇: 我愛佢

「紫凝！..」
「..陪我」...
自從嗰一日之後，我就住左係呀文屋企。初頭佢叫我陪佢嘅時候我都嚇親...，因為我冇諗過佢會咁主動叫我留低。但我望住佢個樣，我知道佢而家真係好需要一個人係佢身邊陪住佢，唔係我好驚佢有咩事...始終..我地都係..朋友。所以我最後做左一個我一生人入面最大膽嘅決定，同男性朋友單獨同居。如果係以前嘅我一定冇可能會咁大膽，我一定會好緊張然後走左去。

識左呀文之後我嘅性格都開始有少少轉變，由乖乖女變左做有少少反叛。其實我一直都唔鍾意做乖乖女...，只不過我冇勇氣去任性，我怕身邊嘅人會唔開心。瞞住ex玩交友app算係我第一次做「反叛」嘅行為，始終..我咁樣做的確可以算係出軌。不過後來透過交友app識到各式各樣嘅人令我都更加大膽去表達自己，因為用手機打字傾計嘅時候佢地冇見過我，亦都唔認識我。就咁樣我反而變得比以前更加敢去講啲我想講嘅嘢，久而久之我就將呢種勇氣轉化為行動。所以我識左呀文之後，我都有勇氣同佢見面。再加上佢有啲唔同其他男仔，佢冇主動去flirt我，只係當我係普通朋友咁傾計。我地慢慢由打字變到去傾電話，我對佢亦都慢慢產生左好感。佢同我講佢嘅故事，而我就做佢嘅聆聽者。當初，我都知道佢同另一個女仔曖昧，但當時嘅我都係當佢係朋友。

之後我地出街，我終於同佢講我嘅感情問題，佢都好比到意見我。我有試過同其他男仔講我嘅嘢，但佢地都唔明白，或者根本冇心機聽。呀文唔同，佢會好認真聽，好認真咁去分析。其實佢係個好細心嘅人，好識同人相處。到後來我同男朋友分手，而嗰陣我同啲姐妹出去飲酒，我竟然打左比呀文。嗰陣時我先發現，原來呀文係我心目中嘅地位都越嚟越高。直到佢係台灣返嚟，就出現左佢叫我留低陪佢嘅嗰一幕。開頭我地係有少少互相取暖，我分左手冇耐都想搵個人陪我，而佢因為Nicole搞到要食安眠藥。我好心痛佢...，所以更加想留係佢身邊陪住佢。冇錯...由嗰陣開始，我已經鍾意左呀文。

每一晚我望住佢諗住Nicole我都會好心痛..，明明你隔離有個女仔陪住你，點解可以諗住另一個女仔。但我知道自己心軟，每次見到佢發惡夢或者唔舒服嘅時候，我都會想拖住佢隻手。一拖住，佢就好快冇事。我唔知道我咁做佢會唔會鍾意我，但我只係想每日為佢付出少少。我相信，只要我默默咁付出，終有一日會有成果。我由開頭呷Nicole醋到後來我習慣左呢件事，再之後呀文都越嚟越少發惡夢。我有諗過呀文會唔會鍾意我，但對於我嚟講，每一日留係佢身邊就已經好幸福了。我每一日都過得比以前充實，有佢係身邊我都唔會悶，我都慢慢走出失戀嘅陰霾。我對呀文嘅愛就一日比一日深，就算佢個心入面有Nicole我都唔介意，甚至乎那怕有一日Nicole返嚟佢身邊我都唔介意。因為直到後尾我先發覺，我嘅生活已經離唔開呀文。我發現..已經唔只係鍾意佢。



我愛佢

我願變成童話裡 你愛的那個天使
張開雙手 變成翅膀守護你
你要相信 相信我們會像童話故事裡
幸福和快樂是結局