因為ex，我決定向全世界嘅女人報仇: 冷淡回應

「叮！」
「叮！」
....邊個呀...？我迷迷糊糊咁係梳化爬起身...個頭仲有啲痛。我拎起部手機，係Rachel！我即刻撐大隻眼，對準部手機，等face id detect到我個樣。解左鎖之後我即刻禁入去：
「我起左身返工啦，唔洗打比我」然後下一個message 係廿分鐘後：
「出左門啦，唔會遲到」佢話。
「咁就好，我都起身啦」
「嗯」佢即刻覆左我。但我唔知應該點覆..好想搵啲嘢講下但又唔知講咩。
「你食左早餐未..？」我問。
「yes」
「好啦」我打完又係end左topic。唉算啦，再攤係度我都遲到。我起身梳洗，然後食早餐返工。我返工嘅時候完全集中唔到，成個腦都係Rachel..。


「食lunch未呀傻妹」我係lunchtime問佢。
「食緊啦」
「今日食咩呀？」我問。
「食飯」
「好啦～記住飲多啲水..，你前排喉嚨痛」
「嗯，知道啦」
「乖～錫哂你」我話。雖然佢而家覆我冇emoji，但我知道佢已經落左火。佢至少肯同我傾，肯覆我wtsapp。我最驚唔係佢嬲，而係驚佢心裏面有條刺，驚佢覺得我之後都會係咁。我知我講咩都冇用，要用時間去證明自己真係愛佢。但我琴晚又見Nicole...雖然我地兩個都冇做啲咩，但係好似瞞住佢咁。唉，點樣先可以建立返佢對我嘅信任。點都好，我而家都要做啲野氹返佢返嚟。我lunch完之後加速，想嗱嗱臨搞掂晒啲嘢話走。

放工之後我即刻沖去太子接佢收工，仲買咗佢最鍾意嘅嘢飲比佢。我等左一陣終於見到佢出嚟，但係佢後邊仲有兩個同事一齊走，一男一女。平時我接佢放工佢唔會同同事一齊走...，但係我都係決定行過去。
「Hi..」


「你點解係度嘅？」佢有少少驚訝但又扮平靜咁講。
「想接你收工嘛～」
「我約左同事食飯，你返去啦」佢望一望佢啲同事。
「Hello...」我同佢啲同事打左個招呼。佢地望住我點一點頭，個樣有少少不善，我懷疑佢地知我同Rachel嘅事。
「你返去啦，我地去食飯啦」
「....凝凝」
「你唔好搵我住啦，你比我靜下好冇」佢有啲冷淡咁講。
「好..好..我走」我個心有啲痛...佢第一次咁同我講嘢。原來佢嬲起上嚟可以咁冷冰冰....
「行啦」佢已經擰轉左面同佢啲同事講。我望住佢地嘅背影...，我個心又有少少嬲。一嚟佢係佢啲同事面前落我面，二嚟佢而家呢個樣真係好西...。我知道佢一定會心軟，不過睇嚟而家真係要比啲時間佢。



最後都係自己一個返左屋企，真係好唔習慣冇佢係身邊。我打開電腦，已經好耐冇打機，因為平時佢係度嘅時候我都冇咩特別想玩。我自己一個玩左一陣就已經好冇癮，唉...做咩好呢。我訓左係訓上面碌手機，我無無聊聊咁睇緊相簿。不斷慢慢碌上去，呢幾個月嚟，我相簿入面充滿住同Rachel嘅回憶。佢同一齊真係好開心，好似幾乎冇唔開心嘅回憶。我再碌上啲...咦..原來我仲未delete我同Nicole啲相..。我將我同Nicole嘅相再睇多一次..，將我地嘅回憶放入心入面收藏。呼...，差唔多啦...我同Rachel一齊左咁耐，都應該要delete同Nicole嘅相啦..。然後，我終於禁左落去。

我想逼自己做選擇