因為ex，我決定向全世界嘅女人報仇: 試探

Rachel唔知我係因為呀婷所以先睇返呢套戲，我諗佢純粹以為我無聊。
「嗚..點解啲戲都唔可以有good ending嘅...」Rachel眼濕濕咁問我。
「下...咁有時人生唔係樣樣嘢都有good ending嫁嘛..」
「戲炸喎..！比男女主角一齊唔可以咩..」佢話。
「咁..我諗如果佢地兩個當初一齊左，或者套戲就冇咁好睇呢。同埋咁先真實嫁嘛～現實中都唔係段段愛情都可以good ending嘅。不過對於我嚟講，佢地最後相遇返仲有講有笑，都叫good ending啦」
「下..佢地明明都鍾意對方..但係又冇一齊到..」佢話。
「有時命運就係咁...」
「都係嘅...繼續睇啦」佢講完之後抹一抹眼淚就繼續睇。我地兩個都知道結局，但都想將套戲睇完。睇多左一陣，Rachel好似有少少攰，然後挨左落我膊頭度。
「你好攰？」我問。
「嗯..借個膊頭嚟挨下...」


「...可以呀」我講完就郩一郩個身，等佢挨得舒服啲。

我已經習慣左呢種少少親密嘅舉動，我地都拖住手訓，挨下膊頭都冇咩特別。而家Rachel比我嘅感覺就係親人咁，雖然我係一直都對佢有好感，但我真係唔想再拍拖住。再加上，我都好攰，唔想再猜測佢係咪真係鍾意我啦。我地只係互相依賴互相幫忙嘅關係，維持住咁樣順其自然就好。你問我有冇諗過要同佢一齊，我好誠實咁答你，一定有。但都係嗰句，順其自然。

戲播完了，我地就再落左去食嘢。因為返工返嚟咁耐都未食，我同佢都好肚餓了。我地去左間台灣餐廳食。
「喂，我同你講呀...呀婷unblock返我」我話。
「下！真嫁？我想睇呀..！你之前講左咁耐我都唔知佢係咩樣」Rachel好似好興奮咁。
「..嗱..隨便睇」我比左部手機佢，專心飲我嘅珍珠奶茶。
「嗯....哇.......」
「做咩呀...」


「哇佢都幾叻喎....」佢邊睇邊講。
「係呀..我都唔知..」
「有冇搞錯呀！咁fd都唔知，唔掛得人地鍾意你都唔知」
「下..咁..我嗰陣有拍拖呀嘛....咁緊係foucs係女朋友度」
「男人都係咁..」佢細細聲話。
「下？」
「冇嘢！」
「哦...咁有女朋友緊係專心對女朋友嫁啦..」
「係～食嘢啦你！」佢話。
「.....哦」突然間！我醒起呀婷有張相係講《我的少女時代》...死啦如果比佢見到我係因為呀婷先再睇..佢會點諗呢......


「好啦..冇咩睇嫁啦」我想拎返部手機。
「唉呀..睇埋先啦」佢避開左。
「....」好彩去到最後佢都冇留意呢樣嘢。我地食完嘢就散左一陣步，我地習慣行一行先返上去。

「呀文呀..」Rachel叫我。
「嗯？」
「如果而家呀婷搵返你，你會點呀？」
「下....我咪..繼續同佢做朋友」
「咁如果佢同你表白呢？」佢問。
「下....我唔知喎..但我應該唔會應承佢」
「點解嘅？」
「佢係好女仔...咁但係我又唔係鍾意佢...冇理由應承嫁嘛...」我話。
「哦....咁又係.....」佢話。我唔知佢係好奇，定係試探緊我，但我真係唔想諗....
「你仲掛住Nicole..？」佢又問我。
「...............」


「冇嘢啦，差唔多啦..返上去？」佢話。
「嗯...」

今晚，Rachel講少左好多嘢，好似有少少悶悶不樂咁。我唔肯定係因為我比呀婷啲嘢佢睇，定係因為佢對我嘅試探結果。我係唔係仲掛住Nicole？係。如果Nicole以前同我講佢離左婚，我諗我會毫不猶豫咁同佢一齊。但而家有左Rachel係身邊，同Nicole一齊就等於放棄左Rachel。我討厭選擇題，但我知道，現實中冇「Why not both」呢個神仙選項。我同Rachel同床半年，但我唔肯定我個心係咪仍然係Nicole 度...。又或者...我同Rachel係差咁一個點著我地熱情嘅導火線，因為我地實在係太過平淡。

閉起雙眼我最掛念誰　眼睛張開身邊竟是誰
感激車站裡　尚有月台曾讓我們滿足到落淚

擁不擁有也會記住誰　快不快樂有天總過去
愛若為了永不失去　誰勉強娛樂過誰
愛若難以放進手裡　何不將這雙手放進心裡