因為ex，我決定向全世界嘅女人報仇: 半年後

我拖住Rachel隻手，我feel到佢有啲手汗。突然間，佢隻手用力捉實左我，然後再用另一隻手輕輕掃我隻手背。
「訓啦..我係度」佢好溫柔咁話。佢把聲都好療癒，我聽完真係會有一種安心去訓教嘅feel。我好想再靠近啲...我唔係想同佢做愛..但唔知點解我好想佢抱住我。佢摸我手背隻手慢慢舉高，由摸手背變到輕輕掃我頭髮....。我覺得自己好似一隻貓....但...好舒服...。我地嘅關係好似又close左一步，但始終，我地都係朋友。

有一晚，Rachel話個男仔又約佢，嗰陣我地坐左係梳化睇電視。
「佢又搵我食飯啦」Rachel話。
「哦...你想去？」我問。
「都可以嘅...冇咩所謂」
「幾時？」
「今個禮拜五」佢話。
「哦....禮拜五」


「做咩呀..？」
「冇呀..如果你好想去咪去囉」
「又唔係話好想去...」
「咁唔好去啦」我話。
「下...但..」
「我話....咁既然都唔係好想去...咁咪唔好去囉」
「..你好似好唔想我去咁..」
「下..唔係呀..都得呀」
「真係？」佢望住我。
「咁...如果你唔去嘅話..我唔洗一個人係屋企咁悶嘛...」


「..你叫你啲fd上嚟陪你咪得」佢話
「唉呀..咁夜晚我會失眠嫁..你知啦...你又會去飲酒..咁我會訓唔著」
「咁..你係咪想我唔去先」
「.....少少啦」我話。
「咁我唔去啦」
「下..，真係嫁？」
「嗯，反正我都冇所謂，廢時有個呀叔又話失眠啦～」佢笑住話。
「哼～」我笑一笑，多謝你..Rachel，你真係好好。之後再有男仔約佢佢都推左，我叫佢唔洗為左我而咁，佢就話唔係為左我。佢話係因為約佢啲人都唔靚仔，如果佢見到好似彭于晏咁嘅男仔就會即刻唔理我..

慢慢，呢種生活方式維持左半年，呢半年佢一直都陪係我身邊。而呢半年入面，Nicole 一個message都冇send過比我。我地「拖手訓教」嘅狀態冇進一步發展，一直都只係限於拖手。但我事業上終於有啲突破，而嗜好亦都多左一個，就係間唔中去探啲冇主人嘅貓貓狗狗。Rachel將呢種愛小動物嘅心傳染左比我，令我每次去到見到啲小動物，個心都好放鬆。規律嘅日子往往過得好快，但近排有兩個好爆嘅消息。第一個就係Sophia同呀明分左手，第二個就係我發現呀婷unblock返我ig。



我放左工第一件事就係睇返呀婷ig....
「Fashion show ~ 」佢最新嘅post嘅caption。我知佢畢業之後就一直做design，當初我地大部分同學都係做返本行，而佢就好堅持話要做design。佢話就算佢唔係讀design，佢都會盡力。過左咁多年，我冇諗過佢勁到去英國幫fashion show啲model design 衫。我一直睇一直睇，決定將咁多個月冇睇過嘅post統統睇返哂。原來佢block左我冇耐就去左英國做....睇佢啲post係英國好似過得幾開心。我望住一張一張佢嘅相，都幾鄧佢開心..好似佢越我開心我就冇咁內疚咁。我有少少忍唔住想dm佢問佢近排點...但都係算了，我驚佢又block返我。唉..既然佢過得開心，咁就好了。我碌碌下發現到佢有個post嘅caption係「謝謝你，出現在我的青春裏」，張相就係台灣電影《我的少女時代》嘅女主角。呢個post係係佢block左我之後一個月出嘅...我諗佢應該係講緊我..？我記起當日係巴士，佢都同我講過多謝我，但我到而家都唔係好sure佢多謝我嘅意思.....

睇完佢啲post我決定將《我的少女時代》重新睇一次，睇下可唔可以搵到少少線索...。呢個時候Rachel都返左屋企。
「睇戲唔叫我！」Rachel話。
「哈哈～坐低一齊睇啦～」
「等等！我換衫先！」佢衝左入房換衫。
「得啦慢慢啦！等埋你先」
佢換完衫我地就一齊坐左係梳化，我將部電腦駁左落電視到睇。Rachel好專心咁睇，我都好專心，我第一次專心到每一句台詞我都唔敢miss。好似可以透過睇呢套電影去了解返呀婷咁多年嚟嘅感覺同經歷....。慢慢，Rachel睇到有少少眼濕濕..
「你第一次睇？」我好奇問一問。
「唔係呀..第二次了..」
「哦..～」我拎左張紙巾比佢。
「唔該...」



原來你是 我最想留住的幸運
原來我們 和愛情曾經靠得那麼近

戲入面播緊主題曲...我聽到好有感觸....。呀婷....對唔住...我一直以嚟都辜負左你嘅感情...

來不及感謝 是你給我勇氣 讓我能做回我自己

係呢句？...係因為我比左勇氣佢令佢可以做返佢自己？呀婷...原來你係咁諗....我終於明了。但係...對唔住......

與你相遇 好幸運
可我已失去為你淚流滿面的權利
但願在我看不到的天際 你張開了雙翼
遇見你的註定
她會有多幸運