因為ex，我決定向全世界嘅女人報仇: 再見了

飛機慢慢降落係香港國際機場，而家時間係夜晚11點26分，我地兩個拖住個喼係飛機行返去T1。一路行嘅時候我都係拖住Nicole隻手行，我地兩個冇講嘢，就咁一步一步咁行。11點嘅機場，冇咩人，大家都靜靜地咁行，好似幫我營造一個寂寞嘅佈景..。由落機行去T1要搭返無人駕駛列車，入無人車之前要落一條扶手電梯。我行係Nicole前面，我將個喼放係自己前一格，我企係Nicole同個喼中間嗰格。扶手電梯落去嘅時候，我另轉面，用力抱實Nicole。用力到好似有少少整痛佢，但佢冇出聲，亦都冇推開我，反而用佢雙手抱返我。我好想抱住佢，好似越抱得大力...佢就會係屬於我咁....

我專登慢慢行，因為可以有多啲時間同Nicole一齊...但我知道就算我行得幾慢，我地兩個都冇可能一直一齊。搭完無人駕駛列車，我地過左入境，然後係度等行李。我望住一個又一個行李係行李帶上面轉..我從來未試過咁唔想拎行李。
「我見到我嗰個啦～」呢句係Nicole落左機之後同我講嘅第一句嘢。
「嗯，你拎啦」我話，我仲未見到自己嗰個。
「我等埋你啦」Nicole行左嗰嚟撓住我隻手。
「好呀」我錫左佢一啖。我等多十分鐘，終於見到我個行李係行李帶上面，我行過去拎起我嘅行李。
「行啦」Nicole話。
「嗯，行啦」我地兩個拖住手向住候機大堂行，臨行到出去之前，Nicole 停低左。



「呀文！」
「嗯？」我講完佢就錫左落我度，錫得好用力，好似想留一個美好嘅印象比我。
「我愛你，一直都愛，你要信我，好冇」佢望住我對講。
「嗯...我信你，我都好愛你，高曉琳」我話望住佢對眼講。
「呀文，我都未知你全名係咩」佢問我。
「我叫...」
「嘻嘻，個名咁特別嘅！」佢話。
「傻妹，咁你應承我，你要一世都記住呢個名」我伸左隻手指尾比佢，想同佢勾。
「嗯！我應承你..」佢伸左佢隻手指尾出嚟，勾住我隻手指尾。然後我再抱住佢，我終於忍唔住喊了...我攬住佢一直喊一直喊，喊到好似個細路仔咁。
「Nicole.....我...我真係好愛你....」我話。


「傻仔....嗚...唔準喊呀....明明....明明我忍得咁辛苦.....又話要開開心心去旅行....旅行都未完.....嗚...衰人...衰人衰人」Nicole抱住我佢都喊得好犀利，然後好似想用力打我心口但又唔忍心。
「對唔住...對唔住....Nicole..我會努力....我想你做我老婆...」我話，雖然我唔知點解我要道歉...
「傻仔....你一定要信我...我都會盡力....」佢話。
「嗯...嗯....」我忍唔住好想錫落佢度，佢嘅眼淚流左落我個嘴，咸咸地嘅感覺..但我冇理到，一直錫一直錫佢。我地已經唔理外人點睇，係臨出候機大堂個位不停錫。
「呀文，我要走啦...我司機係出面等緊我了」過左一陣，佢抹一抹眼淚咁講。
「好....」我好唔捨得咁放開佢隻手..然後我都抹一抹眼淚。
「再見啦...」佢講完就另轉頭走左出去。

再見了.....Nicole
我信我地會再見



我跟住佢出左去，佢司機已經接走左佢，我諗佢驚比人發現所以冇另轉頭。我望住佢嘅背影，又忍唔住喊...眼淚不停不停流出嚟，我隻眼越嚟越濛...啲眼淚令我睇唔清Nicole了...捽完眼之後佢已經走左了。我一個人拖住個喼行去停車場，突然間好想搵人傾....我send左個message比Rachel。
「我返左香港了，得閒？」我話。
呼...我放低手機，坐左係車入面合埋眼。我唔知之後我應該點做先可以再見到Nicole，我唔敢主動搵佢。我地係咪真係可以再見..講真....我冇信心..

心灰了還未碎 心死了還在醉
人難得只因失戀擁抱負累
未會信甚麼擁有等於失去
無情地對世界說他算是誰

不可以沉下去 總可以迷下去
人何苦要抱著清醒進睡
就以血肉之軀去滿足知覺
虔誠地去犯錯 良心 跳得清脆