因為ex，我決定向全世界嘅女人報仇: 倒數

落左車之後我地同呀健同Kaman佢地分別，Kaman話佢會過返數比我，反正呀健有我wtsapp，我都唔驚佢地走數。我同Nicole就去左一間個uber司機推薦嘅一間燒肉店度食飯。間燒肉店服務質素好好，加上嘢食唔算貴又好食，都難怪咁多人排隊食。食飯嘅時候Nicole好慣性咁幫我燒肉同剪肉，我想幫佢手但係佢嫌我慢。
「你坐係度等食得啦傻仔～」雖然佢咁講姐，但我都有啲唔好意思。不過既然佢嫌我慢，咁我都恭敬不如從命。
「係喎，你係咪要聽晚返，定你想星期五朝早」我問Nicole。
「應該要聽晚...我星期五朝早要返返公司了」
「...嗯...」我講完Nicole又繼續燒肉，而我個腦就不停係度諗嘢。我係度諗緊我應該點樣先可以繼續同Nicole 一齊，定係我唔應該再同佢一齊....我唔想做第三者，唔想有另一個男人同我share緊Nicole，仲要個男人咁仆街..但我好似咩都做唔到。屌！鬼叫我窮...但係有咩方法呢...叫佢搬過嚟我度住？佢呀媽啲醫藥費...我夠唔夠比呢..？定係佢過慣左有錢嘅生活...唔會肯同我捱...。我發現，就算我有幾鍾意佢都好，原來我對佢嘅認識，都只不過係冰山一角。我唔知佢真正諗緊啲咩...定係.....佢純粹係利用我，Enjoy我對佢好....應該唔係..？佢話鍾意我..又喊哂口咁...唉我唔知..。比人帽過一次之後，好多嘢我都小心翼翼，好驚Nicole又係當我玩玩下，返香港就冇左件事。或者過多幾個月，又無啦啦出現係我身邊，我唔想再要咁樣嘅愛情了...我決定要做個了斷...

「咁我而家睇下機票先」我同Nicole講。
「好呀，你睇呀」佢話。我望一望，聽日有幾班，中午到夜晚都有。
「你想早啲定夜啲？」我問佢。
「都可以呀，星期五前返到就得」


「咁我簡夜晚9點幾啦」因為我想見你耐啲...
「好呀」
「好，咁我搞埋佢先...」
「傻仔，返到去先搞啦，啲肉凍哂啦！」佢講完又夾左一舊五花腩比我。

我地返到酒店，我買左機票，然後我地開始執行李。每次去旅行，執行李對我嚟講都係好唔開心嘅過程，因為執完就要返香港。但今次..應該係我一生人入面執得最唔開心嘅一次，我將條褲放入喼，個人已經有少少眼濕濕。我忍住，至少返香港之前都唔可以唔開心咁走...因為我都想Nicole開開心心。
「我幫你執啦～你去抖下啦」Nicole 行左去我隔離，我即刻再忍住眼淚。
「嗯..唔該哂」我轉身上返床，唔想比佢見到我唔開心。
「你呢度仲有好多位嫁～我幫你放埋你對鞋入去」佢話。
「嗯～好呀」Nicole一路執嘢，我就係床上面望住佢執...我一直望住佢，好似好想永遠都記住呢一刻，記住我地曾經咩都唔理咁去左旅行，記住我地曾經咁熱戀....Nicole....我愛你.....我望下望下就訓著左..



起身嘅時候我發現...Nicole唔係我隔離！佢去左邊...？我即刻彈起身，著左對拖鞋就想出去。好彩我見到佢放左係門口個喼....佢出左去姐..冇走。我嚇到個人醒哂，入廁所刷牙，再返返上床用手機等Nicole返嚟。過左五分鐘就聽到開門聲。
「傻仔～你起身啦？我見你咁攰就冇叫醒你，但我扎醒左之後又好肚餓..所以落去買左啲嘢食，有買埋你嫁～過嚟食呀～」Nicole話。我見到佢個人好似好攰咁，琴晚應該執嘢執到好夜...
「傻妹你夠唔夠訓嫁..見你好攰咁」
「有少少眼訓..但我想食左嘢先，嘻嘻」佢話。
「好啦，快啲食啦～」我行左去張枱同佢一齊食嘢。食完嘢佢就返左上床訓，我坐左係床，用手輕輕摸佢個頭，望住佢訓教。佢訓教個樣真係百看不厭，就算素顏都好靚女。好想做佢老公..如果每朝早起身有佢係身邊..我諗我應該會好幸福。佢訓嘅時候我咩都冇做，淨係望住佢訓足足望左一個鐘，然後我都抱住佢訓著左了。我地起身已經日落，當我發現點解唔洗checkout嘅時候，Nicole 話佢book多左晚，因為廢時拎住個喼周圍去。我地食左嘢再周圍行下就差唔多要去機場，係逢甲去機場要一個鐘多少少。

上左機之後Nicole 好似仲好眼訓咁，佢戴左安全帶就挨左係我膊頭度訓。我望住出面，架飛機開始起飛，我地離地面越嚟越高、離台中越嚟越遠，而我同Nicole嘅距離...好似都越嚟越遠。我知道，返到香港，可能一切就會完結。由台中飛返香港大概一個鐘五十分鐘左右，姐係至少係呢段接近兩個鐘嘅時間，Nicole仍然係我嘅女人。我望住個mon顯示嘅飛行時間一分鐘又一分鐘咁減。

我地嘅愛情..已經開始倒數