因為ex，我決定向全世界嘅女人報仇: 台中

第二日起身，已經又係中午了。我地兩個都好有默契咁唔去提琴日嘅事，繼續開開心心去旅行。
「係喎，你會唔會想去台中玩？」我問Nicole。
「好呀！但係你呢間酒店唔係Book到星期四咩？」
「唔係呀我book到今日，本身都係諗住可能去台中，但係如果你唔想去嘅話我都可以繼續留係呢度～因為琴晚太攰冇問到你」我話。其實另一個原因係因為，呢間酒店真係好撚貴...
「好啦，其實我都可以，你想去邊我都陪你」佢講完就係床打側抱住我。
「傻妹」我摸一摸佢個頭。
「咁我睇下火車啲時間表同酒店先，你去刷牙先啦」我又話。
「嗯～好」
台北去台中可以搭台鐵或者高鐵...高鐵700台幣，一個鐘內到；台鐵平一半，差唔多兩個鐘先到...算啦高鐵都唔係好貴，反正而家都中午，如果搭成兩個鐘車，去到應該會晏。我上網買左兩張高鐵飛，再睇下台中嘅酒店...Nicole 呢個時候岩岩刷完牙出嚟。
「呀文～台中嘅酒店唔洗住咁貴啦，其實我都冇所謂嫁」Nicole話。佢好細心，佢知道我為左佢而Book貴酒店..識得錫住我個荷包...


「唔緊要呀，定係你想我地一齊簡？」
「好呀，今次酒店錢我比啦～」佢話。
「唔洗啦..我帶你去旅行，點可以你比」
「傻仔！咁我都有份住嫁嘛～我地搭車嗰陣一齊睇啦」
「咁...好啦」我真係洗左好多..所以我都唔再堅持一定要幫佢比。我地食完午飯再行左一陣就拖住個喼去到台北車站搭高鐵去台中。

「傻妹，我地睇下台中有咩景點？」我地上左車，等緊火車開。
「好呀！你睇一睇先，我book埋酒店～」佢話。
「好啦，我望一望」我search左啲，然後篩走左啲自己唔鍾意嘅地方。嚟台灣其實真係唔太多景點我係有興趣，主要都係食嘢最正。我自己對睇藝術或者去博物館冇咩興趣，所以啲台中國家歌劇院、臺中市眷村文物館、咩太陽餅博物館...我統統都手動filter 哂。之後我決定交比Nicole簡，睇下佢想去邊就陪佢。
「呀文～你睇下呢間o唔ok呀～」Nicole遞左部手機比我睇，我望一望。間酒店係逢甲，算係好方便，房睇落都幾好。雖然價錢都唔係平，但又唔算係好貴。


「好呀～就呢間啦」
「嗯！咁我book嫁啦～」佢話。佢Book完之後我同佢一齊簡單傾左下行程。
「傻妹～咁你睇下想去邊啦」我比部手機佢睇左一陣，佢話：
「我想去宮原眼科呀！」佢好似好開心。
「哈哈點解嘅？」
「因為佢啲雪糕睇落好似好好食，嘻嘻」佢話。
「傻妹！哈哈好呀，我地去～」
「你呢？有冇咩地方想去」
「我想去高美濕地」我話。
「好呀！！你要幫我影相嫁喎～」


「交比我啦！」
「傻仔～得唔得嫁你？一陣影到我勁樣衰你就死！」
「哇～我女神Nicole喎，點影都咁靚嫁啦」我笑住話。
「傻仔！又口花花」佢講完就挨左落我度。我地又打打鬧鬧，火車好快就去到台中。到步之後我地再轉車去左酒店checkin先，去到放低哂啲行李已經就嚟五點。
「啊～」我除哂衫褲攤左係床上面，除左係怕整污糟張床。
「傻仔，攰就休息下啦」Nicole話。
「好啦，你肚唔肚餓呀？」
「唔餓呀～你肚餓？」佢問返我。
「有少少～我抖一抖我地就出去啦」
「嗯！我去個廁所先～」佢講完我就拎起部手機，碌下IG...見到Rahcel琴晚又去飲酒...睇嚟佢今次分手真係幾痛。佢Story除左影佢飲酒之外，仲post左一大堆黑底白字嘅感想。咦，原來佢Set左我close friend。我逐個逐個Story睇：
「我對你付出咁多，到頭來你一次都唔信我」
「我掛住你了...返嚟啦好冇？」
「你肯返嚟我咩都聽哂你話....求下你..」...Rachel真係唔值得對呢個男人咁好...條仔對佢基本信任都冇..。唉，點解拍左咁多年，都會咁忍心話分就分，我有少少心痛Rachel...佢已經好似好卑躬屈膝咁求個男仔...

「Are u okay?」我都係忍唔住reply佢IG story，佢而家呢個狀態好令人擔心。


「Im fine」佢過一陣覆左我。
「really？」
「im ok arr~ wait u come back hk drink wf me and tell me your story in tw haha」佢話。
「haha sure, take care ah」我打完就放返部手機係枱。佢擺明就唔Ok，不過我諗都要等我返香港先同佢再傾。

「好～我得啦，你得就行啦～」Nicole岩岩係廁所出嚟，我望到佢個靚樣就即刻笑一笑。
「嗯～我地行啦」我換返件衫，拖住Nicole出去。其他事，返香港先再算啦。