因為ex，我決定向全世界嘅女人報仇: 逢甲夜市
因為仲未要晚飯時間，所以我地兩個出左去周圍行下。行行下我地見到有一間夾公仔嘅鋪頭～
「哇好可愛呀！！」Nicole望住公仔機入面一隻公仔講，我二話不說已經去左唱錢。
「你鍾意呢隻？」我指住公仔機入面嘅藍色公仔，我印象中...佢好似係叫「角落生物」？好似近排都幾多人鍾意。
「係呀！！你睇佢個樣..嘻嘻好乖呀」
「好！等我大顯身手啦！」我將啲銀入左入夾公仔機，部機嘅音樂開始響起，手制隔離嘅Mon都顯示住30秒倒計時。呼...好，推上啲先....右少少....左返少少.....嗯..差唔多了..應該可以夾住佢個藍色頭！我一嘢禁左落粒制度，個夾慢慢向下郁........
「差啲差啲....！！」Nicole捉住我隻手，好投入咁望住個夾。.....落！....夾唔住！....咁撚鬆嘅個夾！....
「唉！...個夾都夾唔實..」我話。
「唔緊要啦，咁易夾到佢就賺唔到你錢，哈哈」
「我試多幾次...應該可以用個夾郁佢幾下先，再勾住佢個頭！」我邊講邊再放左粒銀仔入機再夾。
「夾到啦！！....呀！！又跌返落嚟...」Nicole話。
「你想唔想試下？」我問佢。
「嗯嗯！」我比左啲銀仔佢，佢將銀仔入落去，然後慢慢瞄準......
「咦咦咦？我都未禁.....」Nicole未禁得切，個夾就落左去。
「哈哈傻妹，有限時嫁！」我話。
「下！唔制，我要試多次」
我地兩個不停夾，已經冇計到夾左幾多錢，之後佢又再去唱左啲錢。
「我諗到啦！今次我用個夾壓佢落去。應該夾唔到佢個頭啦，佢個頭太大啦哈哈」我話。
「嗯！你試下」佢講完我瞄準其中一隻夾，嘗試用佢壓落去嘅力將隻公仔壓入去個出口，然唔係用佢隻夾去夾。
「好...！嚟啦！..........中！」我話。
「哇！！！！」Nicole好開心，即刻打開出口個蓋令隻公仔出嚟。
「嘻嘻佢真係好可愛呀！佢個樣好乖呀」Nicole好似抱仔咁抱住佢，仲慢慢摸佢個頭。
「傻妹～你鍾意就好啦！我都覺得佢好可愛」
「嘻嘻，佢好似小朋友咁，佢就係我地嘅小朋友～」Nicole話。佢講完我諗起佢老公....小朋友....嗎...？
「哈哈..」我苦笑左一下，但佢好似冇發覺我唔開心。
「好可愛吖你！！小朋友～」佢望住隻公仔，捏住隻公仔塊面講。
「哈哈，佢個樣好乖女」我見到佢咁開心，都唔想掃興。
「咩乖女呀..佢男仔嚟嫁！」
「咩呀女仔嚟嫁，咁可愛，邊有可能係男仔..」我話。
「男仔都可以好可愛！係咪呀小朋友？」佢好甜咁望住隻公仔。
「明明就係女仔..！」我接受唔到隻咁可愛嘅公仔係男仔。
「男仔！」
「哈哈好啦好啦」我話。
「嘻～我要抱住佢周圍去」佢真係好似一個岩岩生左小朋友嘅老婆....只不過...唔係我老婆...
「嗯..」我地拖住手出左夾公仔鋪，而佢另一隻手就抱住隻「小朋友」。
「肚唔肚餓呀？」我問Nicole。
「餓啦..我想掃街！」
「好呀！我地去逢甲夜市？」我開住google map發現我地都唔係離酒店好遠，都係係逢甲。
「嗯嗯！我要飲木瓜奶！」佢話。
「哈哈，木瓜奶好呀..木瓜好」我望住佢心口奸笑咁講。
「衰人！又諗咩呀！」佢捏左我手臂一下。
去夜市真係去台灣嘅基本嘢，冇去過一個夜市真係唔好話自己去過台灣。逢甲夜市係台中都算好出名，嗰度有林林總總嘅台灣特色小食，炸雞、蚵仔煎、大腸包小腸、燒杏鮑菇....哇...真係諗起都流哂口水...。我地兩個都係好鍾意食嘢嘅人，Nicole將隻公仔綁住係佢個袋上面，然後一手揸住木瓜奶，另一手揸住隻炸雞咁食，完全冇哂佢平時嘅形象。
「哈哈，慢慢食呀！食到成個細路咁」我話。
「唔...！唔唔唔唔唔！」佢成口嘢食，完全聽唔到佢講咩。
「都唔知你講咩～」
「我話你...幫我拎一拎...」佢話。我幫佢拎住隻炸雞之後佢又去排另一間鋪...Nicole真係好大食......even係床上面都係.........。我地食左好多嘢，之後諗住行一陣。
「呀文～我想試下」佢望住一間用氣槍射汽球嘅鋪。
「好呀～不如我地鬥射得多汽球」
「哈哈～怕你呀！」佢話。我比左錢之後同佢一齊拎起左把氣槍..我試下瞄住啲汽球...「啪！」射空左..
「嘻嘻～到我啦！」...「啪！」佢射爛左一個。
「你咁準嘅！」我唔信邪，再射一下...「啪！」又射空..
「傻仔，你係咪瞄錯位呀～要對準呢個...」Nicole同我講..我自問由細打槍game打到大...cs1.6都打遍中小學學界無敵手，點解一拎呢把就發揮唔到出嚟..竟然要Nicole教返我轉頭。Nicole係後面抱住我教我，雖然suppose應該係男人教女人，但有得享受佢係後面環抱我都唔錯..。之後Nicole差少少就射哂全部汽球，而我最後都射中六、七個。
我地兩個係台中嘅街頭巷尾不停打轉，有佢係隔離根本唔洗去咩景點，隨便走走都唔會悶。我地總會有講唔停嘅話題，路邊嘅電單車、衣著奇怪嘅台灣人、便利店入面嘅貨品，一一都係我地嘅話題。同佢一齊，幾時都過得咁開心。
彷彿我們就是天生一對