因為ex，我決定向全世界嘅女人報仇: 雨中濕吻

我地由放天燈嗰個位開始行，沿路都有食啲幾出名嘅台灣小食。一路沿着路軌行，我地去到靜安吊橋。吊橋上面掛左好多竹筒，竹筒外面寫住好多祝福語，我拖住Nicole隻手係橋上面行。
「你係度等一等我」我同佢講。
「嗯？」我已經行左過去叫人幫我地影相，然後我行返嚟攬住Nicole條腰。
「準備囉～ 一，二，三！」有個台妹幫我地影相。我同Nicole對住鏡頭笑，然後再擺其他post。我錫佢塊面，佢又錫返我塊面。
「哇～你們在好恩愛耶，在一起多久了？」個台妹問。
「哈哈沒有啦，才剛一齊」我話。講完我同Nicole都好似有少少尷尬。
「真的假的？！耶你國語講得蠻好的，你們從那裏來？」
「哈哈謝啦，我們從香港來的」我覆佢。
「好啦，你們玩得開心點～一定要幸福喔」台妹話。
「謝啦！」「謝謝～」我同Nicole一齊覆佢。


「喂也！人地係台妹你就傾得咁開心！」Nicole呷醋了。唔知點解，港女都係好鍾意呷台妹醋....
「邊有...我諗住叫佢幫我地影相炸～係佢主動問問題..」
「哼～台妹咪又係波大少少...我都唔差吖...」佢嘟起個嘴仔，好可愛。
「傻妹！你點會差，你知我最鍾意你嫁～」我捏一捏佢塊面，再抱實佢。
「算你啦，行啦～」佢扮嬲同笑都係咁吸引我。

我地拖住手由靜安吊橋行到去十分瀑布，瀑布唔算有咩特別，但我地兩個都好享受呢度嘅環境。我地邊行下又邊影下相，呢一種放鬆嘅感覺，係係香港唔會比我地嘅。所以點解香港人咁鍾意去旅行，係因為去到外國你個人先真係會放鬆落嚟，慢慢去享受異國風情。由瀑布行返十分老街，我地見到個租電動車嘅鋪頭。
「我想試下玩～」我同Nicole講。
「哈哈好呀～我之前同朋友去旅行有玩過，你冇試過？」
「係呀，真係冇試過...我一直都好想學揸電單車，所以都想試下類似嘅」我話。


「好呀我陪你」
「老闆，我能試一下嗎？」我話。
「可以呀～來，我教你一下」佢話，之後佢示範左點樣開車剎車，著引擎。
「好...等我試一下...」我一坐上去就差啲跌落嚟。
「哈哈傻仔」Nicole企係隔離笑我..
「你要先盡量平衡，然後把腳放在兩旁，開動了一會才把腳放上去～有點像是騎腳踏車的感覺」老闆話。
我再試多一陣，終於慢慢掌握到，原來都幾快上手。之後我比左錢，佢話可以租到六點先還車。老街出面有片空地，Nicole叫我係度試下揸下先，佢就咁企左係隔離睇。

我練多左一陣，就想試下車埋佢。佢慢慢坐左去後座，輕輕抱住我。我本身冇諗過佢會肯坐，話哂我都只係岩岩學識，佢竟然唔驚，好似好信任我咁。架車多左個人，平衡嘅難度會再高少少。我係空地揸左多一陣就上左車路揸，點知突然間落雨...我地附近完全冇遮陰嘅位....
「死啦...越嚟越大雨...」我同Nicole講。


「嗯...都冇辦法，我地都濕哂了...」
「算啦唔理啦！」我越揸越快，雨不停打落我地度。我揸住架電動車，我地兩個係十分老街附近穿梭橫街窄巷，然後再兜上公路。雨大到我地全身都濕哂，但背脊傳嚟Nicole嘅體溫，所以我一啲都唔覺得凍。我地漫無目的咁揸，直到見到一個巴士站，個站有個亭可以比我地避雨。我將架車泊係巴士站。坐住係電動車上面，我一另轉身，Nicole就捉住我塊面錫左落嚟....外面落住好大嘅雨，雨水不停打落樹林、車站、街道。

係出面風雨飄搖嘅時候，
至少身邊都有Nicole陪住我過

我地兩個人係巴士站濕吻，佢雙手撓實我條頸，我隻手放係佢條腰。頭髮濕左嘅佢比起平時多左幾分性感，我地不停錫對方，直到我發現時間差唔多我地先慢慢揸去還車。