因為ex，我決定向全世界嘅女人報仇: 天燈許願
醒返嘅時候我發現已經中午十二點....
「醒左啦？」Nicole坐係床邊望住我。
「嗯....哇...十二點啦....」我話。
「係呀，我買左早餐返嚟之後見你訓得咁冧我就冇嘈醒你了。傻仔，你係咪想食蛋餅呀..雖然凍左少少...」
「唔緊要呀，我起身刷牙先」我起身入廁所，刷刷下牙Nicole入左嚟係後面抱住我。我笑一笑：
「做咩啦傻妹」
「想抱住你囉～」
「哈哈咁sweet嘅」我另轉面錫左佢一啖。
「因為同你一齊真係好開心..」佢明明講緊開心，但又有啲唔開心..
「高曉琳」
「...嗯？」佢話。
「以後你幾時想見我，我都可以」
「傻仔....」我feel佢又有啲想喊...我好唔甘心...一諗起佢又要返去佢個仆街老公度..個心就好辛苦...
「好啦，快啲換衫啦～我地出去食嘢啦，你都應該肚餓啦」我忍住唔好唔開心，因為去旅行就係要開開心心嘛....我刷好牙，出返去換衫。
「嗯...咁啲蛋餅..？」佢問。
「哈哈，我食埋佢再食lunch」
「食咁多肥死你呀傻仔」
「咁變左肥仔你係咪就唔鍾意我嫁？哈哈」
「可能嫁～！到時可能我都係肥婆呢～」
「Nicole，望過嚟呀」我拎住部手機自拍，佢一望過嚟我就影左。
「做咩無啦啦影相嘅...」佢問，但問完又痴左埋嚟影，我地再影多好幾張。
「因為我好似冇同你合照...我想遲啲掛住你嘅時候..我都記得我地有過呢一刻，我會一直都記住你呢個靚女樣」
「傻瓜」佢講完錫左落我塊面，而我都咁岩捕捉到呢一刻，影左張自拍。
「好啦～我地去放天燈！」我話。
「好～！」佢好有活力咁撓住我手臂，成個細路女咁。
「睇下先...九份又得...十分又得..你想去邊度？」我問佢。
「我去過九份～不如直接去十分？」
「好呀～」
我地轉左幾次車，先係台北101站搭淡水信義線，再轉車搭到去十分車站。沿途嘅景色都好靚，我一直望住車出面，台灣郊區嘅風景都真係幾靚。Nicole可能因為太早起身，挨住我膊頭訓著左。對面有對應該係韓國嚟緊情侶細細聲嘈緊交...，佢地隔離有對台灣情侶，男嘅挨住女嘅訓，個女仔用緊手機。成架車廂都係一對對情侶，我地完美咁融入左呢個氛圍，如果冇人認真去了解我地嘅故事...或者可能都以為我地係一對好普通嘅香港情侶，邊個會諗到係一個單身男人同一個有老公嘅女人去旅行...
「哇...原來十分靚過九份咁多..」Nicole岩岩醒，望住出面嘅風景。
「傻妹醒啦？其實我都未去過十份」
「真係嫁？」
「係呀，我去過幾次台灣都冇放天燈，哈哈係咪好奇怪」我話。
「唔係呀，咁我咪可以拎你第一次！嘻嘻」
我地係十分車站落左車之後，慢慢行去十分老街。十分車站係台灣其中一個好出名嘅景點，如果你有睇過九把刀嘅《那些年我們一起追過的女孩》，主角柯景騰同沈佳宜就係係呢度放天燈。佢車站嘅路軌好古老好靚，冇車嘅時候，大家就行落路軌影相、放天燈。我地沿住路軌行去賣天燈嘅鋪頭，隨便簡左一間就入左去。
「我想要粉紅色！」Nicole話。
「哈哈好，但係點解嘅？」
「因為粉紅色好似就算升到好遠都望到咁，如果要藍色嘅話，升左上去咪好快睇唔到佢囉」佢話。明明人地有寫明啲顏色係用嚟祈求啲咩，不過算啦，咁岩粉紅色好似係姻緣定類似嘅嘢。
「哈哈好。不好意思～要一個粉紅色的。對，這個就好」我同老闆講。老闆拎左個粉紅色嘅過嚟，再用夾夾住佢係個架上面，咁我地就可以拎毛筆寫字。我地係天燈嘅兩邊寫，我寫一邊佢寫一邊。
「喂也！你寫你啦！唔準偷睇呀！」我控個頭過去望佢寫咩，Nicole用手遮住啲字。
「哈哈，明明一陣都睇到」
「專心啲寫啦你～！」佢話。
我寫左自己嘅願望落去，隨便寫左少少關於工作嘅，再寫左句「希望真心相愛的人能在一起」。Nicole寫左「祝身體健康」同埋希望自己日日都開心，係最底寫住「曉琳」。然後老闆行埋嚟幫我地轉做另外嗰兩邊，咁就可以四面都寫哂字。今次我同Nicole一齊寫，我望到佢慢慢寫左個「幸」字，我係佢對面寫左個「快」字。「幸福」「快樂」，係最後我地寫左嘅字。人地話..如果天燈放左上去冇跌返落嚟，願望就會成真..咁如果我地放嘅冇跌落嚟，係咪我地兩個就可以幸福快樂...寫完之後我地望住對方笑一笑，好似可以睇穿對方諗啲咩咁。
呢一刻我地都只係一對普通嘅愛侶，
祈求住屬於我地最簡單幸福嘅愛情
「老闆～可以了～我們寫完了」我話。
「好～待會我們會幫你們拍照跟拍影片，你們現在站到路軌上吧」老闆話，我拖住Nicole隻手行去路軌。
「好，現在我開始點火，你們站在路軌的兩旁拿著天燈旁，先不要放～我待會叫們放的時候就一齊放」
「好～」我同Nicole話。
我地揸住天燈嘅兩邊，望住鏡頭笑，然後佢再幫我地拍片。
「好～準備喔～三、二、一！放手吧～」老闆話。
我地兩個一齊慢慢放開左捉住天燈嘅手...今日個天陰陰地，粉紅色嘅天燈好搶眼，我望住幸福兩個字慢慢飛遠....希望..佢唔好跌落嚟。我一直望，一直望，天燈越嚟越細。Nicole行左過嚟，拖住我隻手。我望一望佢，佢都望緊天燈，好似同我一齊係心入面祈禱。我再望一望天燈..天燈已經細到好似手指甲咁細，好隱約先睇到係粉紅色。突然間，有陣風吹左過嚟，我地嘅天燈都搖左好幾下。好彩最後都係平平穩穩咁升左上去，我地拖住對方隻手一直企係度，直到我地再見唔到個天燈。咁..應該..我地嘅願望會實現..？係咪呀...Nicole。
「行啦～我地去啲食嘢好冇」我問Nicole。
「嗯～！」
手牽手 一步兩步三步四步 望著天
看星星 一顆兩顆三顆四顆 連成線
背對背默默許下心願
看遠方的星是否聽得見