因為ex，我決定向全世界嘅女人報仇: 通宵談心

我同Rachel食完飯之後我送左佢返去，佢屋企住觀塘，係旺角過去都唔算耐。途中Rachel都再冇提及過岩岩所講嘅話題，直到去到觀塘地鐵站...

「喂？」Rachel聽緊電話，我同緊佢由月台行上大堂。
「...」我見佢越傾越唔對路，好似有啲嬲。
「我廿幾歲啦，我唔係細唔女。同左你講冇事就冇事啦..你可唔可以放心少少，唔洗擔心我」佢話。
「你好啦喎！」Rachel出左閘，我跟埋佢出去。
「我同你講咗幾多次唔係！要你信我有咁難咩？我唔想同你講嘢，你唔好再搵我！」佢講完就收左線.....Opps....我係隔離聽到有啲尷尬。話晒人地嘈緊交，我一個戇鳩鳩企係隔離好似食花生咁...但我都有啲擔心佢同佢男朋友，因為我懷疑係佢同我出街，然後佢男朋友呷醋。
「Sorry呀...比你聽到呢啲..」佢話。
「傻啦道咩歉..你地冇嘢呀嘛？」
「佢真係好唔知我想點，點解就唔可以嘗試了解多啲我嘅心諗緊啲咩」


「唉..」我都唔知講咩好。
「唉好啦..我...咦？你出左閘嘅？」佢話。
「下...係呀，送你返去呀嘛..同埋見你嘈得好似好勁，都擔心你」
「傻啦，本身諗住叫你送到地鐵站就算..！但你都出左嚟..陪我行一陣？」佢話。
「可以啊，反正聽日紅日」
「我唔想返屋企住，我地行觀塘海濱好冇？」
「嗯，我都可以」

之後我地慢慢行，路過一間七仔就買左幾罐啤酒。
「哇...飲啤酒行海旁..好青春好mk～哈哈」佢話。


「真呀，但不知不覺間已經老了...」我地坐左係啲長櫈上面。
「記得我每次去海旁飲酒都係朋友失戀，基本上冇一次失戀嘅主角係我」佢好平靜咁話。
「痴線！你好想失戀咩」
「我唔想失戀，但我更加唔想維持而家咁..」
「唉...你男朋友岩岩打過嚟講左啲咩？」我問。
「佢問我做咩咁夜都唔返屋企，但係岩岩我哋食完先十點半。可能我平時好少出街出到咁夜，就算係都係同佢出。身邊啲朋友都好乖，好多女仔都準備結婚...我唔係想做壞女仔，但我真係好想反叛下。我唔係要去蒲，我都想試下係海旁同朋友飲酒飲通宵、想同男朋友去酒店過夜、想去一次Club...就算之前我去飲酒，都係11點就要返去，唔係佢就會嬲。明明係人地眼中，呢啲事係好正常，但對於我來講，就好似好奢侈。」
「我都明嘅...可能係佢管得你太多」
「係咪我唔應該要求太多，其實佢對我好好，我成日都覺得自己好似好衰咁」佢話，講完之後飲左啖啤酒。
「我反而係咁睇，如果佢真係對你好嘅話，佢應該俾你去做你想做嘅事。咁當然嗰件事唔可以係唔合理啦」我話。
「都係嘅...」


「有時有啲嘢係雙方嘅，你話你有曾經同佢講過關於surprise嘅問題，但你有冇同佢講過關於佢管住你嘅問題..」我話。
「我有輕輕提過，但係多數都係嘈交收場」
「我覺得你都有少少責任..唔好怕我咁講。我覺得你地一齊左咁耐，好多嘢應該講清楚，等大家互相了解」
「唔怕..你照直講」佢話。
「我覺得你地應該係溝通問題，你地咁多年入面，有冇好幾次曾經好認真咁講出雙方嘅問題？」
「我諗五個手指數得晒...」
「咁咪係...好多時候女人以為男人明，男人以為自己了解女人，誤會好容易產生。我感覺上你地應該好少心平氣喎咁去傾...，但你一日唔傾，個問題都冇解決過。咁當然，傾完之後都要改善，唔係一樣打回原形」我話。
「哦...我冇諗咁多嘢...」
「係呀..好多人拍拖都冇諗咁多，你鍾意我、我鍾意你就夠。就算我當你一開始一齊嘅時候好夾，但係兩個人相處點都會有啲磨擦。每個人都有一套自己嘅價值觀，好難要人同你一樣。但係最重要嘅就係溝通，你要真正明白對方點諗，知道佢想要啲咩。咁樣兩個人先可以慢慢成長、進步、甚至乎更加愛對方。」
「可能我有時都忽略左佢嘅諗法...」
「都唔出奇，同埋你都要講你嘅諗法比佢聽，千祈唔好expect佢係你男朋友就無時無刻都知道你諗啲咩」我話。
「..你講得好岩...我真係會覺得點解佢唔明我」
「我覺得你地一齊左六年咁長時間，你諗下六年前你諗嘅嘢，邊有可能同六年後一樣～大家嘅價值觀都會因為唔同因素而改變～所以最主要都係溝通、了解、同埋體諒」
「...嗯..我嘗試下」佢一啖飲左好多酒，而家塊面紅紅地。



我地吹住海風，望住個海飲酒。我對住佢真係當佢好朋友，但我諗起我都同呀婷去過海旁飲酒...唉..呀婷。
「係喎..你有冇預早同佢講你同男仔單獨食飯」
「...我..今日放工嘅時候有講」佢話。
「.....咁...佢緊係嬲啦！」
「下...咁..我又唔係同一齊，同朋友食餐飯姐」
「將心比心，如果佢今日放工嘅時候同你講佢約咗個女仔單獨食飯，你會唔會呷醋」我問。
「都係嘅..算啦唔諗啦～飲酒！」
我地一傾又傾到天光，好似我平時同佢傾電話咁樣，只不過今次佢係坐係我隔離。

分析人哋嘅感情就好似專家咁
但自己嘅感情生活就混亂不堪