因為ex，我決定向全世界嘅女人報仇: 兄弟失戀

天光之後～Rachel係長櫈上面訓著左，地下有幾罐啤酒罐，而我就坐左係長櫈下面嘅地下望住個海同個天。
「....嗯....」Rachel岩岩起左身，佢啲頭髮好亂好搞笑。
「你醒啦？」我話。
「嗯...一唔小心就訓著左..」
「我驚你有啲咩事所以冇走，但又唔忍心叫醒你」
「Sorry呀...要你陪左我成晚...」佢話。
「傻啦，你之前都陪過過我傾咁多心事～一晚通宵算得啲咩！」
「咦...咁你..你冇訓過！？」佢突然間咁講。
「冇呀」
「下！！！Sorry呀！...早知唔叫你行海旁..」


「咁陪你都係我自己決定嘅..又唔關你事，唔洗道歉喎～」我話。
「不過呢..雖然我訓到腰酸背痛，但琴晚真係好開心好青春～原來係街過夜係咁嘅感覺」佢笑一笑咁講。我聽到有啲同情..點解可以24歲都一直咁乖咁規律...佢一定錯過左好多好精彩嘅嘢。我突然間好想比佢經歷多啲，好似細細個阿哥帶阿妹做壞事咁。但係，始終佢有男朋友..我未仆街到會搞有男朋友嘅女仔.....掛。
「開心返咪好～但你都要諗下你同男朋友點講，搵返佢講啦，記住唔好再逃避！」我話。
「知道啦..你快啲返屋企休息啦！我帶你去地鐵站」
「好啦，如果可以嘅話，下次再約啦」
「可以嘅～」Rachel 話。

我返到屋企嘅時候勁精神，因為已經過左會覺得眼訓嘅時候。而家朝早七點搭四，我坐左係係電腦枱前面唔知做咩好...因為今日係復活節假嘅第一日，所以我唔洗返工。望住部電腦，我淨係諗到做嘢，先發現返工都佔左好多自己嘅時間。一唔返工，就連得閒都唔知可以做啲咩...我決定打開LOL(game名)望一望咁早有冇人online陪我打下機。

「狗公全家被狗幹」.....咩名嚟.....邊撚個嚟...我再望一望..賢狗！？What the fuck...佢幾時改左啲咁傻鳩嘅名..不過我都好幾個月冇打機。我即刻搵佢：


「改乜鳩傻西名？」
「改左好撚耐啦，你咁耐都唔On」佢話。
「搞咩？」
「邊玩邊講，入Discord」
「ok，邀」我話。
佢邀請左我入房之後我見到仲有個我唔識嘅人都一齊玩，然後我入埋Discord (你當skype..)。

「喂？聽唔聽到」我話。
「聽到呀柒頭皮」賢狗話。到簡角色嘅時候..
「你地簡先～我補位」我話。


「我想打support」有把好聲話，喂屌！點解有女同佢一齊打嘅...
「哦...好..」我嚇一嚇，然後即刻係Chatroom pm狗賢問佢點解有女，佢話係打機識，近排佢兩個成日一齊打機。開場之後我嘗試update下賢狗嘅近況，以我嘅直覺，佢同Judy似分左手。
「喂～賢狗，做咩咁早都仲打緊機」
「聽日放假...喂屌！草叢有李星唔撚講？」佢燥燥地咁話。
「sorry呀..！」個女仔細細聲講。
「做咩咁燥呀，打機姐死仔」我話。
「心情差」..睇嚟佢心情真係好差..，我懷疑個女仔受左成晚佢嘅氣。
「開大開大！叻仔！」我話。
「係喎..呀...wqwqwingq...我點稱呼你？」我問個女仔。
「你叫我wingq就得」
「好...呀Wingq，你記住下路唔見到幫幫手打燈」我嘗試搵啲嘢講下，再機會問狗賢佢嘅嘢。
「喂，林泳橋，講左好多次要打燈..我個Fd都提埋你啦」狗賢話。
「Sorry呀..岩岩冇留意..」佢又道歉。喂，狗賢，好啦喎。Btw原來wingq係泳橋...
「喂算啦，人地女仔..」我話。
「屌，唔撚想玩，成場打少個咁」賢狗好嬲。


「屌，人地都道左歉你仲想點，唔好心情差就發洩係人地到啦」我嬲返佢，咁係呀嘛..
「你當初散撚左係咪發洩左係呀婷到？定我記錯」佢好串咁講。
「喂一單還一單好喎」
「係你自己講先，扮撚哂好人」佢話。
「屌你老母，你再講多次？」
「我話你！散撚左！咪又係為左發洩屌撚左呀婷！」佢講中左我嘅傷口位。
「你再講呀！兄弟都冇得做呀！講呀！！」我大叫。講完之後佢收左聲，個女仔全程都冇出聲，賢狗都好似都意識到自己講錯嘢。
「唉...」我聽到佢大大聲嘆左口氣。「sor..我唔應該咁講」賢狗話。
「屌！道咩歉，成個女人咁。再嚟多鋪啦，wingq玩唔玩？」男人嘅友誼就係咁，可以好簡單幾句就冇嘢。之後我地三個人再玩多一場，我決定開場之前再問一問。
「死仔..你岩岩話你同Judy散左？」
「係呀，佢比個狗公溝撚左」佢話。
「唉...I know that feel...」
「但我應該冇你咁慘嘅，佢聲稱佢同我分左手先同隻狗公一齊」。之後佢繼續同我呻，我地邊玩邊傾。突然間，玩到一半，我聽到門鐘聲。
「喂屌有人禁門鐘，我開一開門」
朝早九點..邊個呀..？



「Surprise ～！」
「.....Nicole...！！！！？」