因為ex，我決定向全世界嘅女人報仇: Rachel的剖白

「我同我男朋友一齊左六年，係大學開始拍拖..佢係我初戀，我都係佢嘅初戀。開頭我地都正正常常，但慢慢我發覺，我地拍拖好似同正常人拍拖唔同。佢係一個好老實嘅人，但佢算係啲幾悶嘅男仔。好多時都比唔到啲我想要嘅嘢我...好似我生日，每年都係同一款蛋糕，冇禮物。紀念日食一餐飯就完左...情人節聖誕節even係唔會慶祝。開頭第一年我都唔覺，可能係因為我第一次拍拖，我唔知應該係點。但慢慢我睇到我啲朋友嘅男朋友，我開始會好羨慕佢地。我唔係想要名牌唔係要禮物，有時只係想簡簡單單有啲浪漫，好間唔中有一次驚喜。同佢一齊佢會比到好踏實嘅感覺我，我好有安全感，知道佢唔會出軌唔會偷食....但係我真係好想有一次轟轟烈烈嘅愛情....拍拖六年我未收過花，未收過聖誕禮物。最好嘅一次禮物係佢送左部MacBook 比我。我唔係嫌棄，對我嚟講MacBook好實用，亦都唔平。但係我真係未試過有surprise嘅感覺，慢慢我唔會再期待每一次嘅紀念日。」Rachel一路講佢嘅事，我遞左一罐啤酒比佢。
「唔該...我講到邊..？」佢飲左啖之後問。
「err..講到你話你唔再期待紀念日」

「係..由前年開始我地連生日都唔會慶祝，我要自己搵朋友同我慶祝，之後我開始覺得我哋兩個之間嘅距離好似越嚟越遠。我知道佢一直都對我好好，我地好少嘈交。原本我地計劃係下年就結婚，因為佢都有一定嘅經濟能力。我記得一開始識佢嘅時候，我地都曾經講過結婚，當時我覺得自己好幸福，有股好想嫁俾佢嘅衝動。對於身邊嘅人來講，佢可能係個筍盤。佢唔煙唔酒，少異性朋友，又孝順。但我地之間真係好平淡，係平淡到....可有可無。前排我開始諗，我應唔應該下年嫁比佢。但我發現我唔係想要個咁嘅老公...我有曾經同佢講過，但佢話佢盡左力，我知佢有嘗試過...但都唔係我想要咁嘅。」Rachel 再話。

我們的愛，缺少了激情

「唉...我都明嘅，就算一開始幾愛都好，唔夾就係唔夾。你繼續～」我話。
「所以半年前左右我開始玩交友app，雖然我係瞞住男朋友玩，但我唔係想出軌。當初我係諗住試下同唔同嘅男仔傾計，睇下可唔可以比我有啲新嘅諗法。我有同過啲好賤嘅男仔傾計，佢地一嚟就想約炮。但係最無奈嘅係，我有試過抵抗唔到佢地嘅花言巧語，佢地flirt我嘅時候比到嗰種心動嘅感覺我。我知道我唔係鍾意佢地，我只係享受比人追，享受佢地嘅甜言蜜語。」佢話。


「你話你抵抗唔到，咁你同嗰啲男仔有冇做過啲咩先？」我問。
「冇呀...連見面都冇見過，佢地只係不斷用盡渾身解數想搵我約炮...而我呢個死蠢，竟然享受呢啲嘢」
「咁都好啲...」我話。好彩姐..唔係就益左班狗公。
「所以你係我第一個約出嚟見面嘅～因為你冇提過約炮，都冇講過啲曖昧嘅嘢，仲同我分享你嘅心事」
「哇，咁我咪好榮幸做第一個同護士姐姐見面嘅人！？」我話。
「哈哈～食屎啦你！」佢話。
「笑返咪幾好～」
「但我一諗起男朋友就會唔開心..所以我先每晚都同你傾電話，因為同你傾電話好舒服好開心，但你有冇對過講過啲過火嘅嘢，所以我會覺得自己唔係出軌」
「我同你傾計都好開心啊～但如果我係你男朋友，比我發現左我都會好嬲同唔開心。即使冇做啲咩，只係講下心事，但我都會呷醋同埋嬲你瞞住我...可能係我佔有慾強啦...」我話。
「唉，我有時都會咁諗，但我唔敢同佢講..」


「我咁睇啦，就算你地一齊左咁耐，而家嘅你始終都係唔開心多過開心。如果諗起男朋友會唔開心嘅話，咁拍拖仲有咩意義。就算你結咗婚，生小朋友，你同佢關係都唔會改善過」我再話。
「我知，但我冇辦法同佢講分手...佢就好似一個係我生命入面好重要嘅人，陪伴左我六年」
「我唔係教你分手，我都係純粹比下意見..最後決定嘅人都係你」我話。
「我知道啊，至少有人肯聽我呻，多謝你」
「傻啦，我同你呻左咁多嘢，係時候到你同我講返～如果你有咩唔開心，隨時搵我都得」
「...嗯...」佢話。
「好啦唔好講啲咁沉重話題啦，再講就夠鐘要走！我仲想食埋個雪糕先～哈哈」
「好～你要咩味呀我幫你拎」佢問。
「我要雲呢拿！唔該～」
...原來，Rachel都有段咁嘅故事..



黑暗中沉睡著是你的輪廓
卻碰不到你的靈魂
這一張小小的雙人床讓我迷路了

每天就好像背對背的列車
只在深夜裡會合
幸福了然後呢 愛情用什麼再確認
你是不是也記得多久沒有說愛我