因為ex，我決定向全世界嘅女人報仇: 坦白

Sophia個樣冇咩點變，佢拖住呀明嘅時候咁岩好望到我，而我都望緊佢。睇佢嘅眼神，好驚訝、尷尬、但又有少少歉意。我同佢對左半秒眼，佢就唔敢再直望我。佢眼神閃閃縮縮咁，好似一個做錯野嘅小朋友唔敢直望佢父母。呢個時候，Rachel發現左我有啲唔對路，佢順住我嘅眼神望到Sophia。
「Sophia？」佢問。
「嗯」我答。呢個時候呀明都見到我，佢都有種唔敢面對我嘅感覺。論氣場，我就好似係山頂上面，俯瞰山谷下嘅佢地。呢個情況下，我講咩都係岩，佢地就做咩都係錯。但之後嗰一刻，劇情就完全超出左劇本嘅發展。
「Hello，我叫Rachel」佢無啦啦微笑伸左隻手出去想同Sophia握手，但佢嗰種微笑係好八婆好西嗰種笑。我個腦一片空白，完全唔知Rachel 出緊咩牌...
「....Sophia」，Sophia都夾硬笑一笑。
「你係呀明？」Rachel問呀明。
「你識我？」呀明話。
「冇～聽我男朋友提起過你姐～聽聞你好叻搶人女朋友」Rachel講得唔算細聲，所以周圍嘅人都望晒過嚟。
「關你咩事，你想點呀？」呀明有啲惡咁話。
「想提醒你，你女朋友今次會出軌，佢下次都一樣會。不過唔緊要啦，你都唔係咩善男信女，都幾襯嘅～」Rachel嘅語氣勁西又勁串...我企左係隔離睇到呆左，完全唔知可以比到啲咩反應。


「你講咩呀？」呀明聽到差啲想郁手。
「喂！」我喝住左佢，之後攔住佢保護Rachel。
「算啦算啦..」Sophia扯一扯呀明件衫。
「入去啦」我同Rachel講。
「好」佢覆我。

入到去一坐低，我即刻就問佢。
「哇...頭先你真係嚇親我...我完全唔知點反應」我話。
「...我都唔知點解自己會咁做，可能係聽你講過覺得鄧你唔抵，所以就咁樣.....Sorry呀..會唔會搞到你」佢有啲歉意咁話。
「傻啦冇嘢，我都不知幾爽！係純粹冇諗過你會為左我咁做姐」


「我都曾經有姊妹比人戴帽，所以我都好明白嗰種嬲。岩岩一見到佢地就好忍唔住想串佢地」佢話。
「不過原來你嬲起上嚟係咁得人驚..所以話真係唔好得罪女人，哈哈」
「咩喎...！咁...咁我幫你出氣姐，我平時不知幾溫柔！」
「你岩岩嗰個樣我真係會記一世..，哇..塊面西到，哈哈」我笑一笑。
「喂！好啦喎..！即刻後悔幫你出氣，淨係識笑我」
「係啦講下炸～不過你岩岩真係幾型」
「真係嫁真係嫁？我都係第一次扮人地女朋友，哈哈」
「直頭可以拎奧斯卡！」我話。
「緊係！我咁叻～」
「Rachel，多謝你呀」我好認真咁同佢講多謝。


「唔洗客氣啦～你請我食呢一餐就得～」佢話。
「好！橫掂我岩岩出糧～」
「講笑炸唔洗呀！」
「得啦，當係你做演員嘅人工！」我話。
「哇，我拎奧斯卡，你請半島都唔得喎！」
「哈哈～」就咁，我地繼續打打鬧鬧，頭先嗰一幕好似冇發生過咁。其實係我心入面真係幾震驚，話晒Rachel同我第一次見，佢完全冇必要幫我咁樣做。再加上我完全冇諗過佢會主動串Sophia同呀明...佢真係幾大膽..同平時講貓講狗嘅佢，好似係變左另一個人咁。然後我發現，就算我地成日夜晚傾電話，都唔係真係好了解佢。可能係因為佢好少講佢嘅嘢比我聽...講親都係啲無關痛癢嘅小事。

「係喎，呀文」「係呢Rachel」我地一齊講...
「你講先啦」我話。
「你記唔記得呢，我識左你冇耐嗰陣，我話同你講一樣嘢」Rachel將隻蝦放落去淥。
「嗯.....有咩？」我咬緊舊肥牛。
「係呀，嗰陣你講緊Nicole嘅嘢，我話你同左我講左咁多你嘅嘢，我遲啲都同你講一樣嘢」佢話。
「係喎！你想講？」
「...嗯」
「好呀」我話。


「其實...我....唉都係算啦..」
「下..？做咩啦，關於啲咩嫁」我問。
「其實我一直都有男朋友...」佢話。Ohhh..一直以為佢單身，真係冇諗過佢有仔，雖然有冇都冇所謂。
「......噢～但做咩無啦啦同我講嘅」
「因為我唔想好似瞞住你咁，雖然我地又冇做啲咩，但係我都想話比你知呢樣嘢」
「好啦～嚇死我，等我仲以為你有事」
「你唔會好好奇點解我成日可以同你傾電話咩？」佢問。
「會呀，咁點解嘅？」
「唉...」佢嘆左一口氣，準備講佢嘅故仔。我拎起左罐啤酒，準備聽佢講故仔。